കൊല്ലം: ജാതിചിന്ത ഇല്ലാതായാല് മാത്രമേ ഹിന്ദുസമൂഹം നേരിടുന്ന ജീര്ണതകള്ക്ക് പരിഹാരം കാണാനാകുവെന്ന് ആര്എസ്എസ് സഹപ്രാന്ത കാര്യവാഹ് എം. രാധാകൃഷ്ണന് പറഞ്ഞു.
രണ്ടാംകുറ്റി ചേരിയില് ക്ഷേത്ര ആഡിറ്റോറിയത്തില് ഹിന്ദുഐക്യവേദി ജില്ലാസമിതി വാര്ഷികസമ്മേളന ഭാഗമായി സംഘടിപ്പിച്ച കുടുംബസംഗമത്തില് സംസാരിക്കുകയായിരുന്നു അദ്ദേഹം.
ഹിന്ദുസമൂഹം നേരിടുന്ന വെല്ലുവിളികള് വര്ദ്ധിക്കുകയാണ്. ഇതിനുകാരണം ഹിന്ദുസമൂഹത്തില് ഇന്നും നിലനില്ക്കുന്ന ജാതീയചിന്തകളാണ്. സമൂഹത്തില് ഒരു പ്രശ്നം ഉണ്ടാകുമ്പോള് അത് ജാതീയചിന്തകളിലൂടെ നോക്കികാണുന്നു. ഈ പ്രശ്നം പരിഹരിക്കേണ്ടത് കുടുംബങ്ങളിലൂടെയാണ്. ജാതി മറന്ന് ഹിന്ദു ഒന്നിക്കണം.
ഹിന്ദുസമൂഹത്തെ സ്നേഹിക്കുന്ന കളരികളായി കുടുംബങ്ങള് മാറണം. ശ്രീനാരായണ ഗുരുദേവനെ പോലെയുള്ള ആദ്ധ്യാത്മിക ആചാര്യന്മാര് ജീവിച്ചിരുന്ന നാട്ടില് ഇന്നും ഹിന്ദുക്കള് ബുദ്ധിമുട്ട് അനുഭവിക്കുന്നു. വിദ്യാഭ്യാസ കാര്ഷിക വ്യാവസായിക മേഖലകളില് പൊതുസമൂഹത്തിന്റെ ഉയര്ച്ച എങ്ങനെയായിരിക്കണമെന്ന് അദ്ദേഹം കാട്ടിത്തന്നു. ഇത് ഹിന്ദു സമൂഹം പാഠമാക്കേണ്ടതായിരുന്നു.
എന്നാല് അദ്ദേഹത്തെയും ഒരു ജാതിയുടെ കീഴില് തളച്ചിടാനായിരുന്നു ശ്രമം. അനാചാരങ്ങളെ ഇല്ലാതാക്കി ആരാധനാപരമായ നവീകരണം നടത്തിയ അദ്ദേഹം ആദ്ധ്യാത്മികമായി ആത്മാഭിമാനവും അന്തസുമുള്ള സമൂഹത്തെ സൃഷ്ടിക്കാന് ശ്രമിച്ചു. പക്ഷേ അത് ആരും കാണാനും നടപ്പില് വരുത്താനും ശ്രമിച്ചില്ല.
ഹിന്ദുസമൂഹത്തിന് വേണ്ടി വാദിക്കുന്നവരെ തെരഞ്ഞുപിടിച്ച് ഒറ്റപ്പെടുത്തി പിന്തിരിപ്പിക്കാനുള്ള ശ്രമം ഇപ്പോഴും നടക്കുന്നു. ശാരീകമായി മാത്രമല്ല സാമൂഹ്യമാധ്യമങ്ങളിലൂടെയും ആ ശ്രമം നടക്കുന്നു. കണ്ണൂരില് സ്വാമി ചിദാനന്ദപുരി സംസാരിച്ച വേദിയില് കാട്ടികൂട്ടിയ ആക്രമണം സൂചിപ്പിക്കുന്നത് ഇതാണ്. അസഹിഷ്ണുത എന്ന വാക്ക് ഉപയോഗിക്കുന്നവര് ഇത് കണ്ടില്ലെന്ന് നടിച്ചു. കെ.പി. ശശികല ടീച്ചറെ നിശബ്ദമാക്കാനുള്ള ശ്രമം നടക്കുന്നു.
ടീച്ചര് വര്ഗീയപരാമര്ശം നടത്തിയിട്ടില്ല എന്നതിനാലാണ് പോലീസ് കേസ് ചാര്ജ്ജ് ചെയ്യാന് തയാറാകാത്തത്. ഒരു പ്രസംഗത്തിന്റെ ഇത്തിരി ഭാഗം മാത്രം കാട്ടിയാണ് ഇക്കൂട്ടര് ടീച്ചര്ക്കെതിരെ പരാതി നല്കിയത്. ടീച്ചര് പ്രസംഗിക്കുന്ന വേദികളില് ആയിരങ്ങള് ഒഴുകിയെത്തുന്നതാണ് ഇത്തരക്കാരെ പ്രകോപിപ്പിക്കുന്നതെന്നും അദ്ദേഹം പറഞ്ഞു.
ഹിന്ദു ഐക്യവേജി ജില്ലാ പ്രസിഡന്റ് ഡോ.പി. ശശിധരന്പിള്ള അദ്ധ്യക്ഷത വഹിച്ചു. പത്തനംതിട്ട ശാന്താനന്ദമഠം ഋഷിജ്ഞാന സാധനാലയത്തിലെ സ്വാമിനി ജ്ഞാനാഭനിഷ്ഠ കുടുംബസംഗമം ഉദ്ഘാടനം ചെയ്തു. ഹിന്ദുഐക്യവേദി സംസ്ഥാന സെക്രട്ടറിമാരായ തെക്കടം സുദര്ശനന്, പുത്തൂര് തുളസി എന്നിവര് സംസാരിച്ചു. വൈകിട്ട് സമാപനസഭയില് സംസ്ഥാന ജനറല് സെക്രട്ടറി കെ.പി. ഹരിദാസ് മുഖ്യപ്രഭാഷണം നടത്തി.
ജില്ലാ വൈസ് പ്രസിഡന്റ് അശോകന് വാളത്തുംഗല് അദ്ധ്യക്ഷത വഹിച്ചു. പ്രോഗ്രാം കണ്വീനര് പി. രമേശ്ബാബു സ്വാഗതവും താലൂക്ക് ജനറല് സെക്രട്ടറി പ്രവീണ് തെക്കടം നന്ദിയും പറഞ്ഞു.
പ്രതികരിക്കാൻ ഇവിടെ എഴുതുക: