ആലപ്പുഴ: കാര്ഷിക മേഖലയില് അധിഷ്ഠിതമായ ജില്ലയുടെ വികസനക്കുതിപ്പിന് ഉതകുന്നതാണ് കേന്ദ്രബജറ്റ്. കുട്ടനാട് അടക്കമുള്ളകാര് ഷിക മേഖലയ്ക്ക് പുതുജീവന് പകരുന്നതാണ് ബജറ്റ് നിര്ദ്ദേശങ്ങള്. കര്ഷകര്ക്ക് ഒട്ടേറെ ആശ്വാസ പദ്ധതികളാണ് ബജറ്റില് ഉള്പ്പെടുത്തിയിട്ടുള്ളത്.
10ലക്ഷം കോടി രൂപയാണ് കാര്ഷിക വായ്പ നല്കുന്നതിനായി കേന്ദ്ര സര്ക്കാര് പ്രഖ്യാപിച്ചിട്ടുള്ളത്. ഇത് സര്വ്വകാല റെക്കോഡാണ്. വിള ഇന്ഷുറന്സിനായി 9,000 കോടി നീക്കിവച്ചിട്ടുണ്ട്.
കാലാവസ്ഥാ വ്യതിയാനം മൂലവും കീടങ്ങളുടെ ആക്രമണം മൂലവും നിരന്തരം കൃഷിനാശം നേരിടുന്ന കുട്ടനാടന് കര്ഷകര്ക്ക് ഏറെ പ്രയോജനകരമാണ് ഈ പ്രഖ്യാപനം. കൂടാതെ കൃഷിഭൂമിയുടെ ഗുണനിലവാരവും വളക്കൂറും മെച്ചപ്പെടുത്താന് കൃഷി വിജ്ഞാനകേന്ദ്രങ്ങളില് മിനി ലാബുകളും ആരംഭിക്കും.
കോണ്ട്രാക്ട് ഫാമിങിന് പുതിയ നിയമം കൊണ്ടുവരും. ക്ഷീരമേഖലയ്ക്കും ഒട്ടേറെ ആശ്വാസ പദ്ധതികളുണ്ട്. ക്ഷീരവികസനത്തിന് നബാഡിന്റെ കീഴില് 8,000 കോടിയുടെ ഫണ്ടാണ് അനുവദിച്ചിട്ടുള്ളത്. തൊഴിലുറപ്പ് പദ്ധതിയില് 48,000 കോടി നീക്കിവച്ചതിന്റെ നേട്ടവും ആലപ്പുഴ ജില്ലയ്ക്ക് ഉണ്ടാവും.
അടിസ്ഥാന സൗകര്യ വികസനം
ത്വരിതപ്പെടുത്തും: ബിഎംഎസ്
ആലപ്പുഴ: കേന്ദ്ര ബജറ്റ് അടിസ്ഥാന സൗകര്യവികസനത്തിന് ഊന്നല നല്കുന്നതാണെന്ന് ബിഎംഎസ് അഭിപ്രായപ്പെട്ടു. തൊഴിലവസരങ്ങള് വര്ദ്ധിപ്പിക്കാനുള്ള നീക്കവും ദേശീയപാതകളുടെ വികസനത്തിന് 64,000 കോടി അനുവദിച്ചതും സത്വര വികസനം ലക്ഷ്യമിട്ട് നിശ്ചിത റോഡ്പൂര്ത്തീകരിക്കണമെന്നുള്ള നിബന്ധന കൊണ്ടുവന്നതും മെഡിസിന് രംഗത്ത് ഉപരിപഠനത്തിന് വിദ്യാര്ത്ഥികള്ക്ക് അധിക സീറ്റ് വര്ദ്ധിപ്പിച്ചതും റെയില്വേ യാത്രക്കാര്ക്ക് സുരക്ഷാ സംവിധാനം ഉറപ്പാക്കുന്നതിന് ഒരുലക്ഷം കോടി രൂപ വകയിരുത്തിയതും വൃത്തിയുള്ളതും നവീകരിച്ചതുമായ റെയില്വേ കോച്ചുകള് കൊണ്ടുവരുമെന്ന പ്രഖ്യാപനവും ഏറ്റവും സ്വാഗതാര്ഹമാണെന്ന് ജില്ലാഭാരവാഹിയോഗം വിലയിരുത്തി.
പ്രധാനമന്ത്രിയെയും ധനമന്ത്രിയെയും യോഗം അഭിനന്ദിച്ചു. ജില്ലാ പ്രസിഡന്റ് ബി. രാജശേഖരന് അദ്ധ്യക്ഷത വഹിച്ചു. സംസ്ഥാന വൈസ് പ്രസിഡന്റ് ബി. ശിവജി സുദര്ശന്, ജില്ലാ സെക്രട്ടറി സി.ജി. ഗോപകുമാര് എന്നിവര് സംസാരിച്ചു.
ജനക്ഷേമ ബജറ്റ്: ബിജെപി
ആലപ്പുഴ: സാധാരണക്കാരുടെ ജീവിത പുരോഗതി ലക്ഷ്യംവെച്ചുള്ള ജനക്ഷേമ ബജറ്റാണ് കേന്ദ്ര ധനമന്ത്രി അവതരിപ്പിച്ചത് എന്ന് ബിജെപി ജില്ലാ പ്രസിഡന്റ് കെ. സോമന്. വരുമാന നികുതിയുടെ പരിധി ഉയര്ത്തിയതും പട്ടികജാതി ക്ഷേമത്തിനും തൊഴിലുറപ്പിനും പ്രാധാന്യം നല്കിയതും ബജറ്റിന്റെ ജനപ്രിയതയാണ് വ്യക്തമാക്കുന്നത്.
കര്ഷകര്ക്കും യുവാക്കള്ക്കും പ്രതീക്ഷ നല്കുന്ന ബജറ്റ് റയില് സുരക്ഷയ്ക്ക് പ്രാധാന്യം നല്കിയതായും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: