കൊച്ചി: ഡിജിറ്റല് സമ്പദ് ഘടനയ്ക്ക് അനുകൂലമായ സാഹചര്യമാണ് കേരളത്തിലുള്ളതെന്ന് ഹൈബി ഈഡന് എംഎല്എ. കറന്സി രഹിത ഇടപാടുകളെക്കുറിച്ച് ഫീല്ഡ് പബ്ലിസിറ്റി ഡയറക്ട്റേറ്റും ഡിഎവിപിയും സംയുക്തമായി സംഘടിപ്പിച്ച ത്രിദിന ബോധവല്ക്കരണ പരിപാടികളും പ്രദര്ശനവും ഉദ്ഘാടനം ചെയ്യുകയായിരുന്നു.
കേന്ദ്രാവിഷ്കൃത പദ്ധതികളെക്കുറിച്ചുള്ള വിവരങ്ങള് സാധാരണക്കാരിലേക്ക് എത്തിക്കുന്നതിന് ഇത്തരം ബോധവല്ക്കരണ പരിപാടികള് സഹായകരമാണെന്നും അദ്ദേഹം കൂട്ടിച്ചേര്ത്തു. കറന്സി രഹിത ഇടപാടുകള് മൊബൈല് ആപ്പുകളിലൂടെ നടത്തുന്നതിനെക്കുറിച്ചും വിവിധ സാമൂഹ്യ സുരക്ഷ പദ്ധതികളെക്കുറിച്ചും എറണാകുളം സാമ്പത്തിക സാക്ഷരതാ കൗണ്സിലര് ടി.സി. ജോണ് ക്ലാസെടുത്തു. തുടര്ന്ന് കേന്ദ്ര സോംഗ് ആന്ഡ് ഡ്രാമാ ഡിവിഷനുവേണ്ടി സീന പള്ളിക്കരയും സംഘവും അവതരിപ്പിച്ച കഥാ പ്രസംഗവും നടന്നു. പ്രധാനപ്പെട്ട പദ്ധതികളെക്കുറിച്ചുള്ള ഫോട്ടോ പ്രദര്ശനവും പരിപാടിയുടെ ഭാഗമായി ഒരുക്കിയിട്ടുണ്ട്.
എറണാകുളം വിമന്സ് അസോസിയേഷന് ഹാളില് നടന്ന ചടങ്ങില് കേന്ദ്ര ഫീല്ഡ് പബ്ലിസിറ്റി തൃശൂര് അസിസ്റ്റന്റ് ഡയറക്ടര് ജോര്ജ്ജ് മാത്യു അധ്യക്ഷത വഹിച്ചു. എസ്ബിടി ചീഫ് മാനേജര് രാമചന്ദ്രന്, ഡിഎവിപി ഫീല്ഡ് എക്സിബിഷന് ഓഫീസര് എല്.സി. പൊന്നുമോന്, ഫീല്ഡ് പബ്ലിസിറ്റി എറണാകുളം അസിസ്റ്റന്റ് ഡയറക്ടര് കെ.എ. ബീന, ഫീല്ഡ് പബ്ലിസിറ്റി അസിസ്റ്റന്റ് അംജിത്ത് ഷേര് എന്നിവര് സംസാരിച്ചു.
സര്ക്കാരിന്റെ കര്ഷക ക്ഷേമ പ്രവര്ത്തനങ്ങള്, യുവാക്കള്ക്കായുള്ള വിവിധ പദ്ധതികള്, സ്ത്രീ സുരക്ഷാ പദ്ധതികള്, ദരിദ്രര്ക്കായുള്ള വിവിധ ക്ഷേമ പദ്ധതികള്, സാമൂഹ്യ സുരക്ഷാ പദ്ധതികള് തുടങ്ങിയവയെക്കുറിച്ച് അവബോധം വളര്ത്തുക എന്നതും ബോധവല്ക്കരണ പരിപാടിയുടെ പ്രധാന ലക്ഷ്യമാണ്. നാളെ സമാപിക്കും.
പ്രതികരിക്കാൻ ഇവിടെ എഴുതുക: