കൊച്ചി: നിര്ധനരായവര്ക്ക് മൂന്ന് സെന്റ്ഭൂമിയും സുരക്ഷിത ഭവനമൊരുക്കുക എന്ന ആശയവുമായി ആരംഭിച്ച ജനസേവ കാരുണ്യ ഭവന പദ്ധതിക്ക് തുടക്കമായി. പദ്ധതിയുടെ ആദ്യസംരംഭമായി ജനസേവയുടെ സ്വന്തം സ്ഥലമായ നെടുമ്പാശ്ശേരി മധുരപ്പുറത്തുള്ള 1 ഏക്കര് ഭൂമി 3 സെന്റ് വീതം പ്ലോട്ടുകളാക്കി തിരിച്ച് നിര്ധനരായ കുടുംബങ്ങള്ക്ക് ഭവന നിര്മ്മാണത്തിനായി സൗജന്യമായി നല്കും. പദ്ധതിയുടെ ഉദ്ഘാടനവും ആദ്യഭൂമി കൈമാറ്റവും ജനസേവ വൈസ് ചെയര്പേഴ്സണ് കവിയൂര് പൊന്നമ്മ നിര്വ്വഹിച്ചു.
ആലുവ സ്വദേശിനിയും ആലുവ സെന്റ് സേവ്യേഴ്സ് കോളേജ് മൂന്നാംവര്ഷ ബിരുദ വിദ്യാര്ത്ഥിനിയുമായ അനുമോള് കെ. ജെ യുടെ കുടുംബത്തിനാണ് ആദ്യഭവന നിര്മ്മാണത്തിനുവേണ്ട ഭൂമി നല്കിയത്. സെന്റ് സേവ്യേഴ്സ് കോളേജ് എന്എസ്എസ് യൂണിറ്റിന്റെ ആഭിമുഖ്യത്തില് കേരള ആക്ഷന് ഫോഴ്സ്, ഫിലിംസ്റ്റാര് ദിലീപിന്റെ നേതൃത്വത്തിലുള്ള ജി.പി. ചാരിറ്റബിള് ട്രസ്റ്റ് മുതലായ സംഘടനകളുടെ സഹകരണത്തോടെ വീട് നിര്മ്മിക്കുന്നത്. ജനസേവ ശിശുഭവന് ചെയര്മാന് ജോസ് മാവേലി അദ്ധ്യക്ഷത വഹിച്ചു. കോളേജ് പ്രിന്സിപ്പാള് റവ. സി. റീത്താമ്മ, വൈസ് പ്രിന്സിപ്പാള് സിസ്റ്റര് ശാലിനി, ജനസേവ രക്ഷാധികാരികളായ ഡോ.ടോണി ഫെര്ണാണ്ടസ്, ഡോ. സി.എം. ഹൈദരാലി എന്നിവര് അനുഗ്രഹ പ്രഭാഷണം നടത്തി. ഡോ. അസ്മി ആന്റണി, പിടിഎ വൈസ് പ്രസിഡന്റ് അഡ്വ. അബ്ദുള് നാസര്, കേരള ആക്ഷന് ഫോഴ്സ് കോ-ഓഡിനേറ്റര് എ. എസ്. രവിചന്ദ്രന്, ജനസേവ ഭാരവാഹികളായ ജോബി തോമസ്, ക്യാപ്റ്റന് എസ്. കെ. നായര്, ചിന്നന് ടി. പൈനാടത്ത്, ടി. ജി. തമ്പി എന്നിവര് ആശംസകള് അര്പ്പിച്ച് സംസാരിച്ചു.
പ്രതികരിക്കാൻ ഇവിടെ എഴുതുക: