കണ്ണൂര്: സംസ്ഥാന സര്ക്കാര് നടപ്പാക്കി വരുന്ന നവകേരള മിഷന് പദ്ധതികള് പഞ്ചായത്തുകളെ കൂടുതല് ശക്തിപ്പെടുത്തുകയും ജനങ്ങള്ക്ക് പഞ്ചായത്തുമായുള്ള ബന്ധം കൂടുതല് ദൃഢമാക്കുകയും ചെയ്യുമെന്ന് ചീഫ് സെക്രട്ടറി എസ്.എം.വിജയാനന്ദ്. പഞ്ചായത്ത് ദിനാഘോഷത്തിന്റെ ഭാഗമായി സംഘടിപ്പിച്ച നവകേരളത്തിനായി ജനകീയാസൂത്രണം എന്ന സെമിനാറില് മുഖ്യപ്രഭാഷണം നടത്തുകയായിരുന്നു അദ്ദേഹം. നവകേരള മിഷന് വഴി പഞ്ചായത്തുകള്ക്ക് കൂടുതല് പിന്തുണ ലഭിക്കുമെന്നും ഓരോ പദ്ധതികളുടെയും ഗുണനിലവാരം വര്ധിക്കുമെന്നും അദ്ദേഹം അറിയിച്ചു.
പദ്ധതി വഴി പഞ്ചായത്തുകള്ക്ക് കൂടുതല് ഫണ്ട് ലഭിക്കുന്നതോടെ ജനോപകാരപ്രദമായ കൂടുതല് പദ്ധതികള് നടപ്പാക്കാന് സാധിക്കും. നവകേരള മിഷന് പദ്ധതിയെക്കുറിച്ചും ഇതിന്റെ ഭാഗമായി നടപ്പിലാക്കുന്ന ഹരിതകേരളം, ആര്ദ്രം, ലൈഫ്, വിദ്യാഭ്യാസ സംരക്ഷണം എന്നീ നാല് പദ്ധതികളെക്കുറിച്ചും അദ്ദേഹം വിശദീകരിച്ചു.
തുടര്ന്ന് ജനപ്രതിനിധികളില് നിന്നുയര്ന്ന ചോദ്യങ്ങള്ക്കും സംശയങ്ങള്ക്കും അദ്ദേഹം മറുപടി നല്കി. കണ്ണൂര് ജില്ലാ പഞ്ചായക്ക് വൈസ് പ്രസിഡന്റ് പി.പി.ദിവ്യ അധ്യക്ഷത വഹിച്ചു. പഞ്ചായത്ത് വകുപ്പ് ജോയിന്റ് ഡയറക്ടര് എം.പി.അജിത് കുമാര്, കുടുംബശ്രീ എക്സിക്യൂട്ടീവ് ഡയറക്ടര് ഹരികിഷോര്, ബ്ലോക്ക് പഞ്ചായത്ത് അസോസിയേഷന് ജില്ലാ പ്രസിഡന്റ് ആര്.സുഭാഷ്, കേരള ഗ്രാമ പഞ്ചായത്ത് അസോസിയേഷന് വൈസ് പ്രസിഡന്റ് അബ്ദുള് ജബ്ബാര് തുടങ്ങിയവര് സംസാരിച്ചു.
പ്രതികരിക്കാൻ ഇവിടെ എഴുതുക: