തൃക്കരിപ്പൂര്: ദേശീയതയെ വെട്ടിമാറ്റി പേരും പ്രശസ്തിയും നേടാന് ശ്രമിക്കുകയാണ് ചില കലാകാരന്മാരെന്ന് സിനിമ സംവിധായകന് അലിഅക്ബര്. നമ്മളെ കോര്ത്തിണക്കുന്ന പ്രധാന ഘടകം ദേശീയതയാണ്. എന്നാല് സംസ്കൃത ശ്ലോകം ചൊല്ലിയാല് സംഘി എന്ന മുദ്ര കുത്തുകയാണ് സംസ്കാരിക നായകരെന്നും സംസ്കൃത ശ്ലോകം ചൊല്ലിയാല് കേസ്സെടുക്കുന്ന മന്ത്രി കേരളത്തില് ഉണ്ടെന്നും അദ്ദേഹം കൂട്ടിച്ചേര്ത്തു. പേക്കടം മാരാര്ജി സ്മൃതി മന്ദിരത്തിന്റെ സ്നേഹാദരം പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അലിഅക്ബര്.
ലോകത്തിലെ എല്ലാം ഈശ്വര അംശമായി കാണുന്ന സംഘ കുടുംബത്തില് ഞാനും ഒരു കണ്ണിയായതില് അഭിമാനം തോന്നുന്നുവെന്നും അലിഅക്ബര് പറഞ്ഞു. നമ്മള് എല്ലാ മതങ്ങളെയും സ്വികരിച്ചു. എല്ലാവര്ക്കും തണലായി നിന്നത് ഭാരതം എന്ന വടവൃക്ഷമാണ്. യൂറോപ്യന് രാജ്യങ്ങള് പോലും സംസ്കൃതവും യോഗയും പഠിക്കുന്നു. ബ്രിട്ടിഷുകാര് എഴുതപ്പെട്ട ചരിത്രം മാത്രം പഠിക്കാന് വിധിക്കപ്പെട്ടവരാണ് നമ്മളെന്നും പ്രകൃതിയെക്കുറിച്ചുള്ള ജ്ഞാനം ഇവിടെ നിന്നും ഉണ്ടായതാണെന്നും നമ്മുടെ മൂല്യങ്ങള് നാം തിരിച്ചെടുക്കണമെന്നും അലിഅക്ബര് പറഞ്ഞു.
ചടങ്ങില് വെച്ച് പൂരക്കളി മറത്തുകളി രംഗത്ത് സമഗ്ര സംഭവനക്കുള്ള യുആര്എഫ് പുരസ്കാരം നേടിയ വി.പി.ദാമോദര പണിക്കരെയും, ഫോക്ലര് അക്കാദമി അവാര്ഡ് ഉള്പ്പെടെ നിരവധി പുരസ്കാരങ്ങള് നേടിയ കെ.വി.പൊക്കന് പണിക്കരെയും കാഞ്ഞങ്ങാട് പി. പി.ദാമോദര പണിക്കര് പൊന്നാടയണിയിച്ച് ആദരിച്ചു. സംസ്ഥാന അധ്യാപക അവാര്ഡ് ജേതാവ് പി.പി.അശോകന്മാസ്റ്ററെയും പ്രശസ്തഗായകന് രാജേഷ് തൃക്കരിപ്പൂരിനെയും അലിഅക്ബര് ആദരിച്ചു. കൂടാതെ മലേഷ്യയില് വെച്ച് നടന്ന മാസ്റ്റേഴ്സ് അത്ലറ്റിക് മീറ്റില് സ്വര്ണ്ണ മെഡല് ജേതാവായ എം.പവിത്രന്, കെമിസ്ട്രിയില് ഡോക്ടറേറ്റ് നേടിയ ടി.വി.ബൈജു, കണ്ണൂര് യൂനിവേഴ്സിറ്റിയില് നിന്നും എല്എല്ബിയില് റാങ്ക് നേടിയ രബിന കെ.രവീന്ദ്രന്, കണ്ണൂര് യൂനിവേഴ്സിറ്റിയില് നിന്നും എംഎ മലയാളത്തില് ഒന്നാം റാങ്ക് നേടിയ പി. ശ്രീധു എടാട്ടുമ്മല് സംസ്ഥാന സ്ക്കൂള് കലോത്സവത്തില് പുരക്കളിയില് ഒന്നാം സ്ഥാനം നേടിയ കലാകാരന്മാരെയും അനുമോദിച്ചു. പി.പി.കുഞ്ഞിക്കണ്ണന് അധ്യക്ഷനായിരുന്നു. ഭാരതീയ വിചാര കേന്ദ്രം സഹ സംഘടനാ സെക്രട്ടറി വി.മഹേഷ് മുഖ്യ പ്രഭാഷണം നടത്തി. തപസ്യ ജില്ലാ പ്രസിഡണ്ട് കെ.രവീന്ദ്രന്, പി.പി.അമ്പു കുഞ്ഞി, ടി.ഗംഗാധരന്, എന്നിവര് സംസാരിച്ചു. വി.എം.അനില് കുമാര് സ്വാഗതവും കെ.പത്മനാഭന് നന്ദിയും പറഞ്ഞു. തുടര്ന്ന് പൂരക്കളി പ്രദര്ശനം നടന്നു
പ്രതികരിക്കാൻ ഇവിടെ എഴുതുക: