പാലാ: കേരള സ്റ്റേറ്റ് ലീഗല് സര്വ്വീസസ് അതോറിട്ടിയുടെ മീനച്ചില് താലൂക്ക് ലീഗല് സര്വ്വീസസ് കമ്മറ്റി സമാന്തര നിയമ സേവന പ്രവര്ത്തകരാകുവാന് (പാരാ-ലീഗല് വോളന്റിയര്) താല്പര്യമുള്ളവരില് നിന്നും അപേക്ഷ ക്ഷണിച്ചു. അപേക്ഷകര് പ്രതിഫലേച്ഛ കൂടാതെ സമൂഹത്തിലെ പാര്ശ്വവല്ക്കരിക്കപ്പെട്ടവരും ദുര്ബലവിഭാഗക്കാരുമായ ജനങ്ങളുടെ പ്രശ്നങ്ങളില് ഉത്തരവാദിത്വപൂര്വ്വം ഇടപെട്ട് പ്രവര്ത്തിക്കുന്നതിന് സന്നദ്ധതയുള്ളവളായിരിക്കണം. വിരമിച്ച സക്കാര് ജീവനക്കാര്, അദ്ധ്യാപകര്, ഡോക്ടര്മാര്, കുടുംബശ്രീ അംഗന്വാടി പ്രവര്ത്തകര്, മാനവിക നിയമവിഷയങ്ങളില് ബിരുദ, ബിരുദാനന്തര ബിരുദ വിദ്യാര്ത്ഥികള്, എംഎസ്ഡബ്ല്യു വിദ്യാര്ത്ഥികള് തുടങ്ങിയവര്ക്ക് അപേക്ഷിക്കാം. ഏതെങ്കിലും കേസുകളില് പ്രതികളായിട്ടുള്ളവര്, രാഷ്ട്രീയ പാര്ട്ടികളിലെ സജീവാംഗങ്ങളും പാപ്പരായി പ്രഖ്യാപിക്കപ്പെട്ടുള്ളവരും അപേക്ഷിക്കാന് യോഗ്യരല്ല.
അപേക്ഷാ ഫോമും വിശദവിവരങ്ങളും പാലാ കോടതി സമുച്ഛയത്തില് പ്രവര്ത്തിക്കുന്ന താലൂക്ക് ലീഗല് സര്വ്വീസസ് കമ്മറ്റി ഓഫീസിലും മീനച്ചില് താലൂക്കിലെ ഗ്രാമപഞ്ചായത്ത്, മുനിസിപ്പല് കോര്പ്പറേഷന് ഓഫീസുകളിലും ലഭ്യമാണ്. അപേക്ഷകള് മീനച്ചില് താലൂക്ക് ലീഗല് സര്വ്വീസസ് കമ്മറ്റിയുടെ ഓഫീസില് മാര്ച്ച് മാസം 15ന് വൈകിട്ട് 5 വരെ സ്വീകരിക്കും.
പ്രതികരിക്കാൻ ഇവിടെ എഴുതുക: