കോട്ടയം: സമസ്ത നായര് സമാജം പ്രസിഡന്റ് അഡ്വ. തിരുവാര്പ്പ് പരമേശ്വരന് നായര് (82) അന്തരിച്ചു. തിരുനക്കര പോസ്റ്റോഫീസ് റോഡിലുള്ള വസതിയായ ശ്രീനിധിയില് ഇന്നലെ പുലര്ച്ചെ ആറിനായിരുന്നു അന്ത്യം. സമാജത്തിന്റെ കോട്ടയം ജില്ലാ പ്രസിഡന്റ്, ഡയറക്ടര് ബോര്ഡ് അംഗം എന്നീ നിലകളിലും പ്രവര്ത്തിച്ചിരുന്നു. കോട്ടയം കോ-ഓപ്പറേറ്റീവ് കാര്ഷിക ഗ്രാമ വികസന ബാങ്കിന്റെ സ്ഥാപക ഡയറക്ടറായിരുന്നു. വര്ഷങ്ങളായി വൈസ് പ്രസിഡന്റായും ഇടക്കാലത്ത് രണ്ട് പ്രാവശ്യം പ്രസിഡന്റായും സേവനം അനുഷ്ഠിച്ചിട്ടുണ്ട്.
മുട്ടമ്പലം കുന്നത്ത് നാരായണന് നായരുടെയും തിരുവാര്പ്പ് കളപ്പുരയ്ക്കല് പറത്താനത്ത് നാരായണിയമ്മയുടെയും രണ്ടാമത്തെ മകനാണ് തിരുവാര്പ്പ് പരമേശ്വരന് നായര്. ചെറുപ്പത്തില് ഇന്ത്യന് നാഷണല് കോണ്ഗ്രസില് ആകൃഷ്ടനായി ഗാന്ധിജിയുടെ വാര്ദ്ധാ ആശ്രമത്തില് പരിശീലനം നേടുകയുണ്ടായി. യുവാവായിരിക്കേ മന്നത്ത് പത്മനാഭനോടൊപ്പം എന്എസ്എസ്സില് സജീവമായി പ്രവര്ത്തിച്ചു. പിന്നീട് കിടങ്ങൂര് ഗോപാലകൃഷ്ണപിള്ളയോടൊപ്പം എന്എസ്എസ് സംരക്ഷണസമിതിക്ക് നേതൃത്വം വഹിച്ചു. എന്ഡിപി പുനരുജ്ജീവിപ്പിച്ച് അതിന്റെ ചെയര്മാനായി പ്രവര്ത്തിച്ചു. കെ. കരുണാകരന് ഡെമോക്രാറ്റിക് ഇന്ദിര കോണ്ഗ്രസ് പാര്ട്ടി രൂപീകരിച്ചപ്പോള് അദ്ദേഹത്തോടൊപ്പം ചേര്ന്ന് പ്രവര്ത്തിച്ചു.
കെ. കരുണാകരന് കോണ്ഗ്രസ്സിലേക്ക് തിരിച്ച് പോയപ്പോള് തിരുവാര്പ്പ് പരമേശ്വരന് നായര് ദേശീയ ജനാധിപത്യസഖ്യത്തിന്റ ഭാഗമായി. 1999 ല് ആലപ്പുഴയില് നിന്നു ലോക്സഭയിലേക്ക് മത്സരിച്ചു. പിന്നീട് സമസ്ത നായര് സമാജത്തിന്റെ പ്രവര്ത്തനങ്ങളില് സജീവമായി. 2012 മുതല് സമസ്ത നായര് സമാജത്തിന്റെ പ്രസിഡന്റായി. കോട്ടയം ജില്ലാ കോടതിയിലെ മുതിര്ന്ന അഭിഭാഷകരിലൊരാളായ അദ്ദേഹം 2014ല് കോട്ടയം ജില്ലാ ബാര് അസോസിയേഷന് പ്രസിഡന്റായി തെരഞ്ഞെടുക്കപ്പെട്ടിട്ടുണ്ട്.
കോട്ടയത്ത് വിവിധ സാമൂഹിക സാംസ്കാരിക മണ്ഡലങ്ങളിലും സജീവ സാന്നിധ്യമായിരുന്നു. സ്വാമി സത്യാനന്ദസരസ്വതി നേതൃത്വം കൊടുത്ത ശ്രീരാമദാസമിഷന് കോട്ടയം ജില്ലാ പ്രസിഡന്റായും, മാതാ അമൃതാനന്ദമയീ സേവാസമിതിയുടെ പ്രവര്ത്തനത്തിലും സജീവമായിരുന്നു. സംസ്കാരം ഇന്ന് ഉച്ചയ്ക്ക് 1.30 ന് മുനിസിപ്പല് ശ്മശാനത്തില്. ഭാര്യ ടി.എന് ശാന്തകുമാരിയമ്മ (റിട്ട. ജോയിന്റ് ഡയറക്ടര് ഓഫ് പഞ്ചായത്ത്).
മക്കള്: അഡ്വ. പി. രാജേഷ്, പി. രാജീവ് (സോഫ്റ്റ്വെയര് എഞ്ചിനീയര് ബാംഗ്ലൂര്), മരുമക്കള്: കല രാജേഷ്, സീമ രാജീവ്. ജസ്റ്റിസ് കെ.ടി. തോമസ്, ബിജെപി ദേശീയസമിതി അംഗം സി. കെ. പത്മനാഭന്, ഹിന്ദുഐക്യവേദി നേതാക്കളായ ഇ.എസ്. ബിജു, കെ.പി. ഹരിദാസ്, ആര്എസ്എസ് പ്രാന്ത സമ്പര്ക്കപ്രമുഖ് കെ.ബി. ശ്രീകുമാര്, പ്രാന്തകാര്യകാരി അംഗം എന്. ശങ്കര് റാം, ബിജെപി നേതാക്കളായ എം.എസ്. കരുണാകരന്, എന്. ഹരി, കെ.പി. സുരേഷ് തുടങ്ങി വിവിധരംഗങ്ങളില് നിന്നുള്ള നിരവധിപേര് വസതിയിലെത്തി അന്തിമോപചാരം അര്പ്പിച്ചു.
പ്രതികരിക്കാൻ ഇവിടെ എഴുതുക: