ആറാട്ടുപുഴ: ആറാട്ടുപുഴ പൂരത്തിന് ആതിഥ്യമരുളുന്ന ആറാട്ടുപുഴ ക്ഷേത്രത്തില് ഏപ്രില് 2ന് രാത്രി 8.30ന് കൊടിയേറ്റം നടക്കും. തന്ത്രി കെ.പി.ഉണ്ണിഭട്ടതിരിപ്പാട്, ക്ഷേത്രഊരാളന് കുടുംബാംഗങ്ങളായ മാടമ്പ് ഹരിദാസന് നമ്പൂതിരി, ചിറ്റിശ്ശേരി കപ്ലിങ്ങാട്ട് കൃഷ്ണന് നമ്പൂതിരി, കരോളില് എളമണ്ണ് ത്രിവിക്രമന് നമ്പൂതിരി ചോരഞ്ചേടത്ത് ശ്രീകുമാര്, ഓട്ടൂര് മേക്കാട്ട് ജയന് നമ്പൂതിരി എന്നിവരുടെ സാന്നിദ്ധ്യത്തിലാണ് കൊടിയേറ്റം.
പൂരമഹോത്സവത്തിനു നാന്ദികുറിച്ചുകൊണ്ട് രോഹിണിനാളില് ശുദ്ധികലശം ആരംഭിക്കുന്നു. മകീര്യം നാളിലാണ് കൊടിയേറ്റം. ദേശത്തെ ആചാരി എ.ജി.ഗോപിയുടെ നേതൃത്വത്തില് നാട്ടുകാര് മുറിച്ചുകൊണ്ടുവരുന്ന കവുങ്ങ് ചെത്തിമിനുക്കിയാണ് കൊടിമരമാക്കുന്നത്. അലങ്കരിച്ച കൊടിമരം രാത്രി 8.30ഓടുകൂടി ഭക്തജനങ്ങളാണ് ഉയര്ത്തുന്നത്.
പൂരത്തോടനുബന്ധിച്ച് 28 മുതല് ഏപ്രില് 9വരെ ചുറ്റുവിളക്ക്, നിറമാല, ചന്ദനം ചാര്ത്ത് എന്നിവ ഉണ്ടായിരിക്കും. ഈ ദിവസങ്ങളില് ശ്രീലകത്ത് നെയ്വിളക്കുകളാണ് ഉപയോഗിക്കുക.
ആറാട്ടുപുഴ പൂരത്തോടനുബന്ധിച്ച് ശാസ്താവിന്റെ എഴുന്നള്ളിപ്പുകള്ക്കായി ആലവട്ടം, ചാമരം, കുടകള്, വക്ക, മണിക്കൂട്ടം എന്നിവ ഭക്തര് ആറാട്ടുപുഴ ശാസ്താവിന് വഴിപാടായി ലഭിച്ചു. ഏപ്രില് ഒന്നിന് വൈകീട്ട് 5 മണിക്ക് ഈ ചമയങ്ങള് ശാസ്താവിന് സമര്പ്പിക്കും.ആറാട്ടുപുഴ ദേവസംഗമത്തിന്റെ ആതിഥേയനായ ആറാട്ടുപുഴ ശാസ്താവിന്റെ പാണ്ടി-പഞ്ചാരി മേളങ്ങള്ക്ക് പെരുവനം കുട്ടന്മാരാര് നേതൃത്വം നല്കും. കൊടകര ശിവരാമന്നായര് കുറുങ്കുഴലിനും കുമ്മത്ത് രാമന്കുട്ടിനായര് കൊമ്പിലും, തലോര് പീതാംബരന് വീക്കം ചെണ്ടയിലും, മണിയാംപറമ്പില് മണിനായര് ഇലത്താളത്തിലും സഹപ്രമാണിമാരാകും. തിരുവാതിരവിളക്ക്, ആറാട്ടുപുഴ പൂരം ദിവസങ്ങളില് പഞ്ചാരിമേളവും, പെരുവനം പൂരം, തറക്കല് പൂരം എന്നീ ദിവസങ്ങളില് പാണ്ടിമേവുമാണ് അരങ്ങേറുക.
പൂരത്തിന് നടുനായകത്വം വഹിക്കുന്ന തൃപ്രയാര് തേവര്ക്ക് നിലകൊള്ളാനുള്ള തേവര് സ്വീകരണ പന്തലിന് ഞായറാഴ്ച രാവിലെ 8നും തേവര് പന്തലിന് രാവിലെ 8.30 നും കാല് നാട്ടും. ആലിലകളും മാവിലകളും ചാര്ത്തിയ കവുങ്ങ് ആറാട്ടുപുഴ ക്ഷേത്ര ഉപദേശക സമിതി അംഗങ്ങളും വിവിധ സബ്ബ് കമ്മറ്റി കണ്വീനര്മാരും ഭക്തജനങ്ങളും ദേശക്കാരും ചേര്ന്നാണ് ഉയര്ത്തുക. ആറാട്ടുപുഴയിലെ കൈതവളപ്പിന് കിഴക്ക് ഭാഗത്തായി (തേവര് പന്തല്) ഉയര്ത്തുന്ന ബഹുനില വര്ണ്ണപന്തലിന്റെ നിര്മ്മാണവും ദീപാലങ്കാരവും നടക്കും. ആറാട്ടുപുഴ ക്ഷേത്ര ഉപദേശക സമിതിയുടെ നേതൃത്വത്തിലാണ് രണ്ട് പന്തലുകളും ഒരുക്കുന്നത്.
പ്രതികരിക്കാൻ ഇവിടെ എഴുതുക: