ഇടുക്കി: കുടിവെള്ളത്തിനായി നാട് നെട്ടോട്ടമോടുമ്പോഴും അവശേഷിക്കുന്ന വെള്ളം സംഭരിക്കാതെ ഉത്പാദനം കൂട്ടി വൈദ്യുതി വകുപ്പ്. ഇടുക്കി ഡാമിലെ ജലനിരപ്പ് 11 വര്ഷത്തിലെ ഏറ്റവും താഴ്ന്ന നിലയിലെത്തി നില്ക്കുമ്പോഴാണ് ഉത്പാദനം മൂന്നിരട്ടിയിലധികം വര്ദ്ധിപ്പിച്ചത്. മാര്ച്ച് ആദ്യവാരം 2-3 ദശലക്ഷം യൂണിറ്റിനിടയിലായിരുന്നു വൈദ്യുതി ഉത്പാദനം. 20 മുതല് 30 വരെയുള്ള അവസാന 10 ദിവസം ഇത് ശരാശരി 7 ദശലക്ഷത്തിലേക്കാണ് ഉയര്ത്തിയത്.
മാസത്തിന്റെ പാതിയില് ഒരാഴ്ചയോളം വേനല്മഴ ശക്തമായി ലഭിച്ചിരുന്നു. കഴിഞ്ഞ 10 ദിവസംകൊണ്ട് ഇടുക്കിയില് താഴ്ന്നത് 3.5 ശതമാനത്തോളം വെള്ളമാണ്. ഇതോടൊപ്പം കടുത്ത ചൂടില് നീരാവിയായി വന്തോതില് വെള്ളം നഷ്ടപ്പെടുന്നതും തിരിച്ചടിയാകുകയാണ്. മറ്റ് പ്രധാന ജലവൈദ്യുത പദ്ധതികളായ ശബരിഗിരി, ഷോളയാര്, ഇടമലയാര്, പള്ളിവാസല് എന്നിവിടങ്ങളിലെയും ഉത്പാദനം ഗണ്യമായി വര്ദ്ധിപ്പിച്ചിട്ടുണ്ട്.
അതേ സമയം കൂടംകുളത്ത് നിന്നു വൈദ്യുതി ലഭിക്കുന്നതിനുണ്ടായ തടസ്സമാണ് ഉത്പാദനം കുത്തനെ കൂട്ടാന് കാരണമെന്നാണ് അധികൃതര് നല്കുന്ന വിശദീകരണം. ഡാമിലെ ജലം ഉപയോഗിക്കാതിരുന്നാല് മഴയെത്തുമ്പോള് അത് പാഴാകുമെന്നും േസര്ക്കാരിന് പണം നഷ്ടം വരുമെന്നും സ്റ്റേറ്റ് ലോഡ് ഡെസ്പാച്ച് സെന്ററിലെ ഗ്രിഡ് വിഭാഗം ഡെപ്യൂട്ടി ചീഫ് എഞ്ചിനീയര് പറഞ്ഞു.
പരമാവധി ഉത്പാദനം മാസം ശരാശരി 14 ദശലക്ഷത്തില് അധികരിക്കില്ലെന്നും രണ്ട് മാസത്തേക്ക് കൂടി ഈ നിലയ്ക്ക് പോകാനാകുമെന്നും അദ്ദേഹം പറയുന്നു. അതേ സമയം ജൂണില് ഉദ്ദേശിച്ച മഴപെയ്തില്ലെങ്കില് എന്ത് ചെയ്യുമെന്ന ചോദ്യത്തിന് വ്യക്തമായ മറുപടിയും നല്കാന് ഉദ്യോഗസ്ഥനായില്ല. മുന്വര്ഷങ്ങളിലേക്കാള് ചൂടേറിയതിനാല് ഉപഭോഗം കുത്തനെ കൂടുന്നതും കണക്കുകൂട്ടലുകള് തെറ്റിക്കും.
ഡാമുകളില് അവശേഷിക്കുന്നത് 31 % വെള്ളം
തൊടുപുഴ: സംസ്ഥാനത്തെ ഡാമുകളില് അവശേഷിക്കുന്നത് 31.54 ശതമാനം വെള്ളം മാത്രം. കുണ്ടളയിലെ 72 ശതമാനവും ലോവര് പെരിയാറിലെ 62 ശതമാനവും ഒഴിവാക്കിയാണ് ഈ കണക്ക്. പ്രധാനമായും 11 ജലവൈദ്യുത പദ്ധതികളിലാണ് നിലവില് സംസ്ഥാനത്ത് ഉത്പാദനം നടക്കുന്നത്.
ഇടുക്കിയില് ഇന്നലെ ലഭിച്ച കണക്ക് പ്രകാരം 2324.06 അടിയാണ് ജലനിരപ്പ്. 25.803 ശതമാനം. കഴിഞ്ഞ വര്ഷമിത് 35.29 ശതമാനമായിരുന്നു. 554.246 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാനാവശ്യമായ വെള്ളം ഡാമില് അവശേഷിക്കുന്നുണ്ട്. വ്യാഴാഴ്ച 75.8343 ദശലക്ഷം യൂണിറ്റ് വൈദ്യുതി ഉപയോഗിച്ചപ്പോള് 22.157 ആണ് സംസ്ഥാനത്തെ ഉത്പാദനം. ഇതില് ഇടുക്കിയില് ഉത്പാദിപ്പിച്ചത് 8.28 ദശലക്ഷം യൂണിറ്റാണ്. മാര്ച്ച് 30 വരെയുള്ള ഒരുമാസം സംസ്ഥാനത്താകെ 2097.3873 ദശലക്ഷം യൂണിറ്റ് വൈദ്യുതി ഉപയോഗിച്ചപ്പോള് ഇവിടെ ഉത്പാദിപ്പിച്ചത് 418.5869 ദശലക്ഷം യൂണിറ്റാണ്.
പ്രതികരിക്കാൻ ഇവിടെ എഴുതുക: