ആലപ്പുഴ: വിദേശ നിര്മിത കാര് രജിസ്റ്റര് ചെയ്യാന് ഒരുകോടി എട്ട് ലക്ഷത്തോളം രൂപ നികുതി. ഒപ്പം ഇഷ്ടനമ്പറിന് ഒരുലക്ഷവും. ചേര്ത്തല ജോയിന്റ് ആര്.ടി ഓഫിസിലാണ് വിദേശത്തു നിന്ന് ഇറക്കുമതി ചെയ്ത് കാര് രജിസ്റ്റര് ചെയ്യുന്നത്. അരൂര് കേന്ദ്രമാക്കി പ്രവര്ത്തിക്കുന്ന ഫെയര് എക്സ്പോര്ട്സ് ഇന്ത്യ പ്രൈവറ്റ് കമ്പനിയുടെ ഡയറക്ടറുടെ പേരിലാണ് കാര് റജിസ്റ്റര് ചെയ്യുന്നത്.
ഇറ്റലിയില് നിന്നു ഇറക്കുമതി ചെയ്ത ബെന്ലി ബെന്റയ്ഗ എന്ന മോഡലിന്റെ വില 5,36,40,917 രൂപയാണ്. ഇതിന് 1,07,99,710 രൂപയാണ് നികുതി അടച്ചത്. കെ.എല് 32 എല് ഒന്ന് എന്ന നമ്പറിന് ഒരുലക്ഷം രൂപയും അടച്ചു. നാല് പേര്ക്ക് സഞ്ചരിക്കാവുന്ന പെട്രോള് കാറിന് 5950 സി.സിയാണ് ശേഷി. കാറിന് 2508 കിലോ ഭാരവുമുണ്ട്. നികുതി ഫീസ് എന്നിവ അടച്ച കാര് രജിസ്ട്രേഷനായി അടുത്ത ദിവസം ആര്ടി ഓഫിസില് എത്തിക്കും. ഓഫീസില് ഇത്രയും വലിയ തുക ഒന്നിച്ച് നികുതി ഇനത്തില് ലഭിക്കുന്നത് ആദ്യമാണെന്ന് അധികൃതര് പറഞ്ഞു.
കെഎല് – 32എല് 1 എന്ന രജിസ്റ്റര് നമ്പരാകും ലഭിക്കുക. ഈ ഫാന്സി നമ്പര് ഉദ്യോഗസ്ഥര് ലേലത്തില്വയ്ക്കാന് ഉദ്ദേശിച്ചെങ്കിലും ആവശ്യക്കാരായി ആരും എത്തിയില്ല. ഇന്നലെ രാവിലെ പതിനൊന്നിന് രജിസ്ട്രേഷന് കാര് എത്തിക്കുമെന്ന് കരുതി മാദ്ധ്യമ പ്രവര്ത്തകര് ചേര്ത്തല ആര്ടി ഓഫീസില് കാത്തിരുന്നെങ്കിലും എത്തിയില്ല. മാദ്ധ്യമ പ്രവര്ത്തകരെ ഭയന്നാണ് ഉടമ കാറുമായെത്താത്തതെന്ന് ഉദ്യോഗസ്ഥര് പറയുന്നത്.
ആഡംബരത്തിന് കുറവില്ലെങ്കിലും കേരളത്തിലെ റോഡിലൂടെ ഈ കാര് ഒച്ചുവേഗത്തില് മാത്രമെ നീങ്ങൂ. ഫോര് ലൈന് പാതയില് 90 ഉം രണ്ടുവരിയില് 70 ഉം വേഗം നിശ്ചയിച്ചിരിക്കുന്ന നമ്മുടെ റോഡില് ബെന്റ്ലിയുടെ കാര് എങ്ങനെ നീങ്ങുമെന്ന കണ്ടുതന്നെ അറിയണം. ഇത്രയൊക്കെ വിലയുണ്ടെങ്കിലും നാലില് കൂടുതല് ആളുകള്ക്ക് ഇതില് യാത്ര ചെയ്യാന് കഴിയില്ല. ഏകദേശം ബസിന്റെ എന്ജിനു തുല്യമാണ് ഈ കാറിന്റെ എന്ജിന് പവര്. ഇതോടെ കേരളത്തില് ആദ്യ റോള്സ് റോയിസ് ആഡംബരക്കാറും ബെന്റ്ലി കാറും രജിസ്റ്റര് ചെയ്യുന്ന ആദ്യജില്ലയായി ആലപ്പുഴ മാറും. 2015ല് 2.5 കോടി വിലമതിക്കുന്ന റോള്സ് റോയ്സ് കാര് രജിസ്റ്റര് ചെയ്താണ് ആലപ്പുഴ ഈ പദവി കരസ്ഥമാക്കിയത്.
പ്രതികരിക്കാൻ ഇവിടെ എഴുതുക: