കുറ്റിക്കോലില്‍ സിപിഐയുടെ വളര്‍ച്ചയില്‍ അമ്പരന്ന് സിപിഎം

Monday 22 May 2017 8:45 pm IST

കാസര്‍കോട്: കുറ്റിക്കോലില്‍ സിപിഐയുടെ വളര്‍ച്ചയില്‍ അമ്പരന്നിരിക്കുകയാണ് സിപിഎം നേതൃത്വം. സിപിഎമ്മിന്റെ ഉരുക്കുകോട്ടയെന്ന് അവകാശപ്പെടുന്ന കുറ്റിക്കോല്‍ പഞ്ചായത്തില്‍ സിപിഐയുടെ പടയോട്ടമെങ്ങനെ ചെറുക്കണമെന്നറിയാതെ നില്‍ക്കുകയാണ് നേതൃത്വം. രണ്ട് കമ്മറ്റികള്‍ മാത്രമായി ഇവിടെ ഒതുങ്ങിയിരുന്ന സിപിഐക്ക് ഇപ്പോഴുള്ളത് പതിനഞ്ച് കമ്മറ്റികളാണ്. സിപിഎം ഏരിയാ സെക്രട്ടറിയും കുറ്റിക്കോല്‍ ഗ്രാമപഞ്ചായത്ത് പ്രസിഡണ്ടുമായിരുന്ന പി.ഗോപാലന്‍ മാസ്റ്ററുടെ നേതൃത്വത്തില്‍ നൂറിലേറെ പേര്‍ മാസങ്ങള്‍ക്കുമുമ്പാണ് സിപിഐയില്‍ ചേര്‍ന്നത്. സിപിഎം ഏരിയാ സെക്രട്ടറി സി.ബാലന്‍ ഉള്‍പ്പെടെയുള്ള ഔദ്യോഗികപക്ഷത്തിനെതിരെ പി.ഗോപാലന്‍ മാസ്റ്ററുടെ നേതൃത്വത്തിലുള്ള വിഭാഗം രംഗത്തു വന്നതോടെയാണ് പാര്‍ട്ടിയില്‍ വിഭാഗീയപ്രശ്‌നങ്ങള്‍ മൂര്‍ഛിച്ചത്. സി.ബാലനെ ഏരിയാ സെക്രട്ടറി സ്ഥാനത്തു നിന്ന് മാറ്റാതിരിക്കുകയും വിമത പ്രവര്‍ത്തനം ആരോപിച്ച് കുറ്റിക്കോലിലെ ചില നേതാക്കള്‍ക്കെതിരെ നടപടി സ്വീകരിക്കുകയും ചെയ്തതോടെയാണ് ഗോപാലന്‍ മാസ്റ്ററുടെ നേതൃത്വത്തിലുള്ള വിഭാഗം സി പിഐയില്‍ ചേര്‍ന്നത്. രണ്ട് ബ്രാഞ്ച് കമ്മറ്റികള്‍ മാത്രമുണ്ടായിരുന്ന സിപിഐ ഈ അവസരം മുതലെടുത്ത് കുറ്റിക്കോല്‍ പഞ്ചായത്തില്‍ സ്വാധീനമുറപ്പിച്ചു തുടങ്ങുകയായിരുന്നു. ഇപ്പോള്‍ പാര്‍ട്ടി അനുഭാവി ഗ്രൂപ്പുകളടക്കം പതിനഞ്ച് കമ്മറ്റികളാണുള്ളത്. ഗോപാലന്‍ മാസ്റ്ററും അനുയായികളും സിപിഐയിലേക്ക് പോകാതിരിക്കാന്‍ മുഖ്യമന്ത്രി പിണറായി വിജയനും സിപിഎം സംസ്ഥാനസെക്രട്ടറി കോടിയേരി ബാലകൃഷ്ണനും വരെ ഇടപെട്ടിരുന്നു. എന്നാല്‍ വിമതരുടെ ആവശ്യങ്ങളൊന്നും അംഗീകരിക്കാന്‍ പിണറായിയും കോടിയേരിയും തയ്യാറായിരുന്നില്ല. ഗോപാലന്‍ മാസ്റ്ററുടെ നേതൃത്വത്തിലുള്ള വിഭാഗം സിപിഐയില്‍ ചേര്‍ന്നപ്പോള്‍ അതിനെ നിസാരവല്‍ക്കരിക്കുന്ന പ്രതികരണമാണ് കോടിയേരിയുടെ ഭാഗത്തുനിന്നുണ്ടായത്. കുറ്റിക്കോല്‍ പഞ്ചായത്തില്‍ സിപിഎമ്മിന് ഇതുകൊണ്ട് ഒരു പോറല്‍ പോലും സംഭവിക്കില്ലെന്നായിരുന്നു അദ്ദേഹം വ്യക്തമാക്കിയത്. എന്നാല്‍ സിപിഐ കുറ്റിക്കോലില്‍ വളര്‍ന്നു പന്തലിക്കുന്ന കാഴ്ച കണ്ട് ഇപ്പോള്‍ അമ്പരക്കുകയാണ് സി പിഎം നേതൃത്വം. സിപിഎമ്മില്‍ വിഭാഗീയ പ്രശ്‌നങ്ങള്‍ കൊടുമ്പിരിക്കൊണ്ടപ്പോള്‍ ഗോപാലന്‍ മാസ്റ്ററുടെ കൂടെ നിലയുറപ്പിച്ചിരുന്ന നേതാക്കളിലും പ്രവര്‍ത്തകരിലും ഒരു വിഭാഗം മാത്രമാണ് ഗോപാലന്‍ മാസ്റ്ററുടെ കൂടെ സിപിഐയിലേക്ക് പോയത്. ഗോപാലന്‍ മാസ്റ്ററുടെ പഴയ അനുയായികള്‍ സിപിഎമ്മില്‍ ഉണ്ടെങ്കിലും സിപിഐ കരുത്താര്‍ജിച്ചാല്‍ ഇവരും സിപിഐയിലേക്ക് പോകുമെന്ന ആശങ്ക സിപിഎം നേതൃത്വത്തിനുണ്ട്. സിപിഐയുടെ വളര്‍ച്ചക്ക് തടയിടാന്‍ കുറ്റിക്കോലില്‍ സിപിഎം സ്വീകരിക്കുന്ന അടവുനയങ്ങള്‍ അവര്‍ക്ക് തന്നെ വിനയാവുകയാണ്. വിഭാഗീയതയുടെ ചുവട് പിടിച്ചുണ്ടായ പിളര്‍പ്പ് വരും നാളുകളില്‍ പാര്‍ട്ടിയെ കൂടുതല്‍ തളര്‍ത്തുമെന്ന ആശങ്കയിലാണ് നേതൃത്വങ്ങള്‍.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.