പന്തീരാങ്കാവ്: നേത്രപടല സംബന്ധമായ തകരാറു മൂലം അന്ധത ബാധിച്ചവര്ക്ക് വെളിച്ചം പകരാന് ആയിരം പേര് മരണാനന്തരം നേത്ര ദാനത്തിന് തയ്യാറാവുന്നു. ഭിന്നശേഷിക്കാരുടെ ക്ഷേമത്തിനായി പ്രവര്ത്തിക്കുന്ന സക്ഷമയുടെ ആഭിമുഖ്യത്തിലാണ് നേത്രദാന സമ്മതപത്ര സമര്പ്പണം സംഘടിപ്പിക്കുന്നത്.
നേത്രപടല തകരാറ് മൂലം കാഴ്ചയില്ലായ്മ അനുഭവിക്കുന്നവര്ക്ക് വെളിച്ചമെത്തിക്കുന്നതി നായി സക്ഷമ ദേശീയ തലത്തില് സംഘടിപ്പിക്കുന്ന കോര്ണിയ അന്ധതമുക്ത ഭാരത് അഭിയാന്-കാംബ, ഭാഗമായാണ് നേത്ര ദാന സമ്മതപത്രം ഏറ്റുവാങ്ങുന്നത്.
ലക്ഷക്കണക്കിനാളുകളാണ് ഭാരതത്തില് നേത്ര പടല തകരാറ് മൂലം അന്ധത അനുഭവിക്കുന്നത്. ഇത്തരത്തിലുള്ളവര്ക്ക് ഈ പദ്ധതിയിലൂടെ കാഴ്ച ലഭ്യമാക്കാനുള്ള ശ്രമത്തിലാണ് സക്ഷമ. കൂടുതല് ബോധവല്ക്കരണ പ്രവര്ത്തനങ്ങളും ഇതിനായി സംഘടിപ്പിക്കുന്നുണ്ട്.
പന്തീരാങ്കാവ് അനുഗ്രഹ പാലസില് 30ന് നടക്കുന്ന ഭക്തസൂര്ദാസ് ജയന്തി കുടുംബ സംഗമത്തില് ആയിരംപേരുടെ നേത്ര ദാന സമ്മതപത്രം ഏറ്റുവാങ്ങും.
പെരുമണ്ണ, ഒളവണ്ണ, മണക്കടവ്, പുത്തൂര്മഠം, പന്തീരാങ്കാവ് തുടങ്ങിയ സ്ഥലങ്ങളില് നിന്നു സമാഹരിച്ച സമ്മതപത്രം കെ.പി. ചന്ദ്രദാസനില് നിന്നും സക്ഷമ സംസ്ഥാന സംഘടനാ സെക്രട്ടറി പി. സുഭാഷ് ഏറ്റുവാങ്ങും.
രാവിലെ 9.30ന് പഞ്ചരത്ന കീര്ത്തനാലാപനത്തോടെയാണ് പരിപാടികള്ക്ക് തുടക്കം കുറിക്കുക. തുടര്ന്ന് സക്ഷമ അംഗങ്ങളും മറ്റു കലാകാരന്മാരും അവതരിപ്പിക്കുന്ന സംഗീതാര്ച്ചനയും രാധാകൃഷ്ണ ഭജനസംഘം, പെരുമണ്ണ ഭജനസമിതി, ദിവ്യനാമ ഭജനസംഘം, ഭക്തസൂര്ദാസ് ഭജന മണ്ഡലി എന്നിവരുടെ ഭജനകളും നടക്കും. വൈകിട്ട് കുടുംബസംഗമം, സ്മാര്ട്ട് വൈറ്റ് കെയിന്, വീല്ചെയര് വിതരണം, ആദരിക്കല്, തുടങ്ങിയവയും നടക്കും.
പ്രതികരിക്കാൻ ഇവിടെ എഴുതുക: