കൊച്ചി: ഗിന്നസ് റിക്കാര്ഡ് ലക്ഷ്യമിട്ട് കിഴക്കമ്പലത്ത് ഏഴായിരത്തോളം പേര് അണിനിരക്കുന്ന തിരുവാതിര നടത്തുമെന്ന് ചാവറ കള്ച്ചറല് സെന്റര് ഡയറക്ടര് ഫാ. റോബി കണ്ണന്ചിറ പത്രസമ്മേളനത്തില് അറിയിച്ചു. മെയ് ഒന്നിന് വൈകിട്ട് അഞ്ചിന് കിഴക്കമ്പലം കിറ്റെക്സ് അപ്പാരല് പാര്ക്കില് നടക്കുന്ന തിരുവാതിര എറണാകുളം ചാവറ കള്ച്ചറല് സെന്റര്, കിറ്റെക്സ് ഗ്രൂപ്പ്, പാര്വണേന്ദു നൃത്ത വിദ്യാലയം എന്നിവ സംയുക്തമായാണ് സംഘടിപ്പിക്കുന്നത്.
ഇരുപതു സംസ്ഥാനങ്ങളില് നിന്നുള്ളവര് പങ്കെടുക്കുന്ന തിരുവാതിരയില് കിഴക്കമ്പലം പഞ്ചായത്തിലെ വിവിധ വാര്ഡുകളില് നിന്നുമുള്ള ആയിരക്കണക്കിന് സ്ത്രീകളും വിവിധ വിദ്യാലയങ്ങളില് നിന്നുള്ള വിദ്യാര്ഥിനികളും പങ്കെടുക്കും. ഗിന്നസ് പ്രതിനിധികള് റിക്കാര്ഡ് രേഖപ്പെടത്താന് സ്ഥലത്തെത്തും.
2015 ല് 5211 സ്ത്രീകളെ പങ്കെടുപ്പിച്ച് ഇരിങ്ങാലക്കുടയില് നടന്ന തിരുവാതിരയാണ് ഇതുവരെയുള്ള റിക്കാര്ഡില് മികച്ചത്. ട്വന്റി 20 കോര്ഡിനേറ്റര് അഗസ്റ്റിന് ആന്റണി, പാര്വണേന്ദു നൃത്തവിദ്യാലയം ഡയറക്ടര് മാലതി ജി. മേനോന്, പ്രഫ. പ്രേമ ഡി നമ്പൂതിരി എന്നിവരും പങ്കെടുത്തു.
പ്രതികരിക്കാൻ ഇവിടെ എഴുതുക: