കൊല്ലം: ജില്ലയിലെ വരള്ച്ചാ ദുരിതാശ്വാസ പ്രവര്ത്തനങ്ങള് ത്വരിതപ്പെടുത്തണമെന്ന് ജില്ലാ വികസന സമിതിയോഗത്തില് ആവശ്യം. കോവൂര് കുഞ്ഞുമോന് എംഎല്എയാണ് ഈ ആവശ്യം ഉന്നയിച്ചത്.
കുന്നത്തൂര്, കരുനാഗപ്പള്ളി മേഖലകളില് കുടിവെള്ളക്ഷാമം അതിരൂക്ഷമാണ്. കൂടാതെ ജില്ലയിലെ കിഴക്കന് മേഖലയില് വേനല്മഴ ലഭിക്കാത്തതിനാല് ജനങ്ങള് ബുദ്ധിമുട്ടുകയാണെന്നും അദ്ദേഹം പറഞ്ഞു. ശാസ്താംകോട്ട തടാകത്തില് നിന്നുള്ള ജല ലഭ്യത കുറഞ്ഞതും ഷട്ടര് തകര്ന്നതിനെ തുടര്ന്ന് കെഐപി കനാല് വഴിയുള്ള ജല വിതരണത്തിലുണ്ടായ വിഷയങ്ങളുമാണ് പ്രശ്—നത്തിന് കാരണമെന്നും കനാലുമായി ബന്ധപ്പെട്ട പ്രശ്നങ്ങള് പരിഹരിക്കാന് അതിവേഗനടപടി സ്വീകരിച്ചുവരികയാണെന്നും ജില്ലാ കളക്ടര് മിത്ര.ടി അറിയിച്ചു. ടാങ്കര്ലോറികളില് ജലവിതരണം നടത്തുന്നുണ്ട്. ഇത്തരത്തില് ലഭ്യമാക്കുന്ന ജലത്തിന്റെ ഗുണനിലവാരം ഉറപ്പാക്കുന്നതിന് സംവിധാനം ഒരുക്കിയിട്ടുണ്ട്. മാത്രമല്ല ജിപിഎസ് സംവിധാനം ഉപയോഗിച്ച് എല്ലാ വാര്ഡുകളിലും വെള്ളം എത്തുന്നുണ്ടെന്ന് ഉറപ്പാക്കുന്നുണ്ടെന്നും കളക്ടര് യോഗത്തെ അറിയിച്ചു.
ജില്ലയില് പ്രവര്ത്തനരഹിതമായി കിടക്കുന്ന സ്വജല്ധാര പദ്ധതികള് പുനരുജ്ജീവിപ്പിക്കും. കേടായ മോട്ടോറുകള് മാറ്റിസ്ഥാപിക്കാനും പൈപ്പ്ലൈനുകള് മാറ്റിസ്ഥാപിക്കാനും അനുമതി നല്കിയിട്ടുണ്ട്. ജലത്തിന്റെ ദുരുപയോഗം തടയാന് ഉദ്യോഗസ്ഥരെ നിയോഗിച്ചിട്ടുണ്ടെന്നും കളക്ടര് പറഞ്ഞു. ബിവറേജ് ഔട്ട്ലറ്റുകള് അടച്ചതിനെ തുടര്ന്ന് ജില്ലയില് വര്ധിച്ചുവരുന്ന അബ്കാരി കേസുകളില് ശക്തമായ നടപടി സ്വീകരിക്കണമെന്ന് എം.നൗഷാദ് എംഎല്എ ആവശ്യപ്പെട്ടു. എക്സൈസ്-പോലീസ് സംയുക്ത സ്ക്വാഡുകള് രൂപീകരിച്ച് എല്ലായിടത്തും പരിശോധന ശക്തമാക്കണം. സ്കൂളുകളുകള്, കോളജുകള്, മാര്ക്കറ്റുകള് കേന്ദ്രീകരിച്ച് പ്രവര്ത്തിക്കുന്ന ലഹരിമരുന്ന് മാഫിയകള്ക്കെതിരെ പോലീസ് ജാഗ്രത പാലിക്കണമെന്നും അദ്ദേഹം പറഞ്ഞു.
ജില്ലയില് വ്യാപകമായി മുടങ്ങുന്ന കെഎസ്ആര്ടിസി ബസ് സര്വീസുകള് പുനരാരംഭിക്കുന്നതിന് അടിയന്തരയോഗം വിളിച്ചുചേര്ക്കണമെന്ന് കൊടിക്കുന്നില് സുരേഷ് എംപിയുടെ പ്രതിനിധി എബ്രഹാം സാമുവല് ആവശ്യപ്പെട്ടു. മാവേലി സ്റ്റോറുകളുടെ പ്രവര്ത്തനം കാര്യക്ഷമമാക്കണമെന്നും അദ്ദേഹം പറഞ്ഞു. ക്ലാപ്പന എരമത്ത് കുടിവെള്ള പദ്ധതിയുടെ പൈപ്പ് ലൈനുകള് പൊട്ടിയൊലിക്കുന്നത് ഉടന് പരിഹരിക്കണമെന്ന് കെ.സി.വേണുഗോപാല് എംപിയുടെ പ്രതിനിധി തൊടിയൂര്രാമചന്ദ്രന് ആവശ്യപ്പെട്ടു. സബ് കളക്ടര് ഡോ.എസ്.ചിത്ര, ജില്ലാ പ്ലാനിങ് ഓഫീസര് മണിലാല്, ഉദ്യോഗസ്ഥര് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: