കുറ്റിയാടി: പക്രംതളം ചുരം റോഡില് ചാത്തങ്കോട്ട് നട മുതല് ചുങ്കക്കുറ്റി വരെയുള്ള റോഡിനിരു വശവും കാടു വളര്ന്നു യാത്ര അപകടാവസ്ഥയില്. കാട്ടുചെടികള് വളര്ന്നതു കാരണം റോഡിന്റെ പല ഭാഗങ്ങളിലും വാഹനങ്ങള് പരസ്പരം കാണാന് പറ്റാത്ത നിലയിലാണ്. ഒമ്പത് ഹെയര്പിന് വളവുകളുള്ള റോഡില് ഇടതൂര്ന്ന് കാട്ടുചെടികള് വളര്ന്നത് ഗതാഗതത്തിന് ഭീഷണിയായിരിക്കുകയാണ്.
രാത്രികാല യാത്രക്കാരാണ് ഇതുകാരണം കൂടുതല് ദുരിതത്തിലാവുന്നത്. എതിരെ വരുന്ന വാഹനങ്ങള് തൊട്ടുമുന്നിലെത്തുമ്പോള് മാത്രമാണ് ശ്രദ്ധയില്പ്പെടുന്നത്. റോഡരികില് സ്ഥാപിച്ച ദിശാസൂചക ബോര്ഡുകള് പോലും കാണാന് കഴിയാത്ത നിലയിലാണ്. ചില ബോര്ഡുകളാവട്ടെ സാമൂഹ്യ ദ്രോഹികള് നശിപ്പിച്ചിട്ടുമുണ്ട്.
റോഡിന്റെ അവസ്ഥ ചൂണ്ടിക്കാട്ടി നാട്ടുകാര് പലതവണ വകുപ്പുദ്യോഗസ്ഥര്ക്ക് പരാതി നല്കിയിട്ടും ആരും തിരിഞ്ഞുനോക്കിയിട്ടില്ല. വകുപ്പ് മന്ത്രിക്ക് പരാതി നല്കാനുള്ള ഒരുക്കത്തിലാണ് നാട്ടുകാര്. റോഡ് വശങ്ങളില് കാടുകയറിയിരിക്കുന്നത് കാല്നടയാത്രക്കാര്ക്കും ഭീഷണിയായിരിക്കുകയാണ്.
പ്രതികരിക്കാൻ ഇവിടെ എഴുതുക: