മലയിന്കീഴ്: നേമം ബ്ലോക്ക് പഞ്ചായത്തില് പ്രസിഡന്റ്, വൈസ് പ്രസിഡന്റ് എന്നിവര്ക്കെതിരെ പ്രതിപക്ഷ അംഗങ്ങള് കൊണ്ടുവന്ന അവിശ്വാസം വിജയിച്ചു. കോണ്ഗ്രസിനു ഭരണം നഷ്ടമായി. രണ്ടുപേര്ക്കുമെതിരെയുള്ള അവിശ്വാസത്തില് ബിജെപി അംഗങ്ങള് അനുകൂല നിലപാടെടുത്തത് നിര്ണായകമായി.
ജില്ലാ പഞ്ചായത്ത് സെക്രട്ടറി കെ. ചന്ദ്രശേഖരന്നായര്, വെള്ളനാട് ബ്ലോക്ക് സെക്രട്ടറി അനില്കുമാര് എന്നിവരുടെ സാന്നിധ്യത്തിലായിരുന്നു വോട്ടെടുപ്പ്. രാവിലെ പ്രസിഡന്റിനെതിരെയുള്ള അവിശ്വാസചര്ച്ചയില് ഒമ്പത് അംഗങ്ങള് അനുകൂലിച്ചപ്പോള് കോണ്ഗ്രസിലെ ഏഴംഗങ്ങള് വിട്ടുനിന്നു. അവിശ്വാസം പാസ്സാകാന് ഒമ്പതുപേരുടെ പിന്തുണ മതി.
തുടര്ന്ന് പ്രസിഡന്റ് അവിശ്വാസത്തില് പരാജയപ്പെട്ടതായി വരണാധികാരിയായ ജില്ലാ പഞ്ചായത്ത് സെക്രട്ടറി പ്രഖ്യാപിച്ചു. പിന്നാലെ കോണ്ഗ്രസ് അംഗമായ പ്രസിഡന്റ് എല്. അനിത സ്ഥാനമൊഴിഞ്ഞു.
ഉച്ചയ്ക്ക് വൈസ് പ്രസിഡന്റിനെതിരെ നടന്ന അവിശ്വാസത്തിലും ഇതേ സ്ഥിതിയായിരുന്നു. ഇതോടെ കോണ്ഗ്രസ് അംഗമായ വൈസ് പ്രസിഡന്റ് വീരേന്ദ്രകുമാറിനും സ്ഥാനം നഷ്ടമായി.
നടപടി പൂര്ത്തിയായ ശേഷം അവിശ്വാസത്തെ സംബന്ധിച്ച വിവരങ്ങള് തിരഞ്ഞെടുപ്പു കമ്മീഷനു മുമ്പാകെ സമര്പ്പിക്കുമെന്ന് അധികൃതര് അറിയിച്ചു.
തുടര്ന്ന് ഇല്ക്ഷന് കമ്മീഷന് വരണാധികാരിയെ നിയമിച്ചശേഷം നിശ്ചിത ദിവസത്തിനുള്ളില് രണ്ടു സ്ഥാനത്തേക്കുമുള്ള തിരഞ്ഞെടുപ്പ് നടത്തും.
പ്രതികരിക്കാൻ ഇവിടെ എഴുതുക: