ഇടുക്കി: ജലനിരപ്പ് അതിവേഗത്തില് താഴുന്നതോടെ ഇടുക്കിയിലെ വൈദ്യുതി ഉല്പ്പാദനം കുറയ്ക്കാന് നിര്ബന്ധിതരായി വൈദ്യുതി വകുപ്പ്. സംസ്ഥാനത്ത് ഉല്പ്പാദിപ്പിക്കുന്ന വൈദ്യുതിയുടെ മൂന്നിലൊന്നും ഇവിടെ നിന്നാണ്. കടുത്ത വേനലിലും ഉത്പാദനം കാര്യമായി കുറയ്ക്കാതിരുന്നതാണ് ജലനിരപ്പ് ഇത്ര കണ്ട് കുറയാന് കാരണമായത്. ഇന്നലെ ലഭിച്ച കണക്ക് പ്രകാരം ഞായറാഴ്ച 2307.7 അടിയാണ് ജലനിരപ്പ്. 15.168 ശതമാനം. കഴിഞ്ഞ വര്ഷം ഇതേ സമയം ഇത് 2319.8 അടിയായിരുന്നു. 22.71 ശതമാനം. 12 അടിയോളം കുറവ്.
2280 അടി വരെ ജലനിരപ്പ് എത്തുന്നത് വരെ മാത്രമെ മൂലമറ്റം പവര് ഹൗസില് വൈദ്യുതി ഉല്പ്പാദനം സാധിക്കൂ. ഇനി 27 അടി വെള്ളംകൂടി മാത്രം. ഡാമിലാകെ 325.806 ദശലക്ഷം യൂണിറ്റ് വൈദ്യുതി ഉത്പാദിപ്പാക്കാനാവശ്യമായ വെള്ളം നിലവിലുണ്ട്. ഞായറാഴ്ച പദ്ധതി പ്രദേശത്ത് 2.6 എം എം മഴ രേഖപ്പെടുത്തി. 1.778 ദശലക്ഷം യൂണിറ്റ് വൈദ്യുതി ഉല്പ്പാദിപ്പിക്കാനാവശ്യമായ വെള്ളമാണ് ഒഴുകിയെത്തിയത്.
അതേ സമയം സംസ്ഥാനത്തെ ഡാമുകളിലാകെ 716.015 ദശലക്ഷം യൂണിറ്റ് വൈദ്യുതി ഉത്പാദിപ്പാക്കാനാവശ്യമായ വെള്ളം നിലവിലുണ്ട്. ഇടുക്കിയില് 3.88 ദശലക്ഷം യൂണിറ്റ് വൈദ്യുതി ഉല്പ്പാദിപ്പിച്ചപ്പോള് സംസ്ഥാനത്താകെ ഉല്പ്പാദിപ്പിച്ചത് 12.0016 ദശലക്ഷം യൂണിറ്റ് ആണ്. അവധി ദിവസം ആയതിനാല് മൊത്തം ഉപഭോഗം 65.0758 ദശലക്ഷം യൂണിറ്റായി ചുരുങ്ങി. ദിവസങ്ങളായി ഇത് 74-76 ദശലക്ഷം യൂണിറ്റിനും ഇടയിലാണ്.
പ്രതികരിക്കാൻ ഇവിടെ എഴുതുക: