തിരുവനന്തപുരം: പുരാരേഖകളും ചരിത്രവും സംബന്ധിച്ച് ജനങ്ങളില് അവബോധം വളരണമെന്ന് മന്ത്രി രാമചന്ദ്രന് കടന്നപ്പള്ളി പറഞ്ഞു. പുരാരേഖാ വകുപ്പിന്റെ ‘ആര്ക്കൈവ്സ് വിഷന് 2020’ കര്മ്മപദ്ധതിയുടെ ഉദ്ഘാടനം നിര്വഹിക്കുകയായിരുന്നു അദ്ദേഹം. പുതുതലമുറ ഇതിന്റെ പ്രാധാന്യം തിരിച്ചറിയണം. അവരില് ഇക്കാര്യത്തിലുള്ള താത്പര്യം വളര്ത്തി അജ്ഞത മാറ്റണം. ഭൂതകാലത്തെക്കുറിച്ചും അറിവ് നേടേണ്ടത് ആവശ്യമാണ്.
പുരാരേഖകള് സംസ്കാരത്തിന്റെ ഭാഗമാണ്. അവ സൂക്ഷിക്കാനും സംരക്ഷിക്കാനുമുള്ള മനോഭാവം കൂടുതലുണ്ടാകണം. ഇതിന് ആവശ്യമായ നടപടികളുമായി മുന്നോട്ടുപോകും. വകുപ്പിന്റെ പ്രവര്ത്തനങ്ങളും അറിവുകളും ജനങ്ങളിലെത്തിക്കുമെന്നും മന്ത്രി കൂട്ടിച്ചേര്ത്തു.
ലോക പൈതൃകദിനാചരണത്തോടനുബന്ധിച്ച് പുരാരേഖ സംബന്ധിച്ച മികച്ച വാര്ത്തകള് ചെയ്ത മാധ്യമപ്രവര്ത്തകര്ക്കുള്ള പുരസ്കാരവിതരണവും മന്ത്രി നിര്വഹിച്ചു. ചടങ്ങില് ചരിത്രകാരനും താളിയോല മ്യൂസിയം സാങ്കേതിക ഉപദേശക സമിതി ചെയര്മാനുമായ എം.ആര്. രാഘവവാര്യര് അധ്യക്ഷത വഹിച്ചു.
താളിയോല മ്യൂസിയം സാങ്കേതിക ഉപദേശക സമിതി അംഗം മലയിന്കീഴ് ഗോപാലകൃഷ്ണന്, കോഴിക്കോട് സര്വകലാശാല ചരിത്രവിഭാഗം മേധാവിയും സാങ്കേതിക ഉപദേശക സമിതി അംഗവുമായ ഡോ. പി. ശിവദാസന്, പുരാവസ്തു വകുപ്പ് ഡയറക്ടര് ജെ. രജികുമാര്, മ്യൂസിയം എക്സിക്യൂട്ടീവ് ഡയറക്ടര് ഡോ. എസ്. റെയ്മണ്, പുരാരേഖാ വകുപ്പ് ഡയറക്ടര് പി. ബിജു, ആര്ക്കൈവിസ്റ്റ് അശോക് കുമാര് തുടങ്ങിയവര് സംസാരിച്ചു.
പ്രതികരിക്കാൻ ഇവിടെ എഴുതുക: