നാട്ടിന്പുറങ്ങളില് ആരോടെങ്കിലും വലിയ ദ്രോഹം ചെയ്താല് പറയുന്ന വാക്കാണ് എന്റെ ചേട്ടാ വെള്ളംകുടി മുട്ടിക്കല്ലെ എന്ന്. ഇതില്നിന്ന് മനസ്സിലാക്കേണ്ടത് ജീവിച്ചിരിക്കുന്ന ഒരാള്ക്ക് ഏറ്റവും പ്രധാനം വെള്ളമാണ് എന്നതാണ്. എന്നാല് കരുതി ഇരിക്കുക. ഭൂമിയിലെ മനുഷ്യന് കരുതലോടെ ജീവിച്ചില്ലെങ്കില് വെള്ളം കുടി മുട്ടുക തന്നെ ചെയ്യും.
മനുഷ്യന്റെ അതിരുകളില്ലാത്ത ചൂഷണത്തിന്റെ ഫലമായി നമ്മുടെ നാട്ടിലെ ജലസ്രോതസ്സുകളെല്ലാം വറ്റിവരളുകയാണ്. മനുഷ്യരക്തത്തിലെ ഏറ്റവും വലിയ അളവിലുള്ള ഘടകം വെള്ളമാണ്. അതുപോലെ ഭൂമിയുടെയും ജീവരക്തമാണ് ജലം. ഭൂമിയില് ജീവന് നിലനിര്ത്തുന്നതും ജലസാന്നിദ്ധ്യം തന്നെ. ഭൂമിയിലെ ജലസമ്പത്തിന്റെ ആയുസ്സ് പ്രതിദിനം കുറഞ്ഞുകൊണ്ടിരിക്കുകയാണ് എന്ന സത്യം നാം മനസ്സിലാക്കണം. ഇപ്പോഴത്തെ നിലയില് കാര്യങ്ങള് നീങ്ങിയാല് 2025 ആകുമ്പോഴേക്കും ഭൂമിയിലെ ജലസമ്പത്ത് മൂന്നിലൊന്നായി കുറയും എന്നാണ് വിദഗ്ദ്ധ പഠനങ്ങള് ചൂണ്ടിക്കാട്ടുന്നത്. അതുകൊണ്ടുതന്നെ ജലസംരക്ഷണത്തിന്റെ ഉത്തരവാദിത്വം സ്വന്തം കാര്യംപോലെ ഓരോ വ്യക്തിയും കരുതേണ്ട കാലഘട്ടത്തിലാണ് നാം ജീവിക്കുന്നത്.
ഒരാള് ദൈനംദിന ആവശ്യങ്ങള്ക്കായി ഒരുദിവസം 35 ലിറ്റര് ജലം ഉപയോഗിക്കുന്നുവെന്നാണ് കണക്ക്. നാം ഉപയോഗിക്കുന്ന ജലത്തിന്റെ മൂല്യം നാം മനസ്സിലാക്കുന്നില്ല. ഇതേ ജലം ഉപയോഗിക്കുന്ന രീതിയില്തന്നെ തിരികെ മണ്ണില് ലഭ്യമാക്കിയേ മതിയാകൂ. അതിനെ തടസ്സപ്പെടുത്തുന്നതും മലിനപ്പെടുത്തുന്നതുമായ പ്രവൃത്തികളാണ് നാം നിരന്തരം ചെയ്യുന്നത്. 44 നദികളും ശരാശരി 3000 മില്ലിമീറ്റര് മഴയും ലഭിക്കുന്ന ലോകത്തിലെതന്നെ അപൂര്വം പ്രദേശമായിരുന്നു നമ്മുടെ ഈ കേരളം. എന്നാല് ഇന്നത്തെ അവസ്ഥ വളരെ പരിതാപകരമാണ്. 160 കിലോമീറ്ററോളം നീളമുള്ള ഭാരതപ്പുഴയുടെയും പെരിയാറിന്റെയും ഇന്നത്തെ അവസ്ഥ കണ്ടാല് ഹൃദയം നുറുങ്ങിപ്പോകും.
അനധികൃത കയ്യേറ്റവും മണ്ണെടുപ്പും മാലിന്യം തള്ളലും മൂലം ഇവയൊക്കെ മരിച്ചിരിക്കുകയാണ്. വേടന്റെ അമ്പേറ്റ് പിടഞ്ഞുവീണ പക്ഷിയുടെ ദാരുണാന്ത്യം കണ്ട് മനംനൊന്തതിന്റെ ഫലമാണ് രാമായണം, എങ്കില് നമ്മുടെ നദികളുടെ പിടച്ചില് കാണാന് വാല്മീകി ഉണ്ടായിരുന്നുവെങ്കില് അതിനെക്കാള് മഹത്തായ മഹാവാക്യം ഉണ്ടാകും തീര്ച്ചയാണ്.
മലിനീകരണവും ജനസമ്പത്തിന്റെ കുറവുമാണ് കുടിവെള്ള പ്രശ്നം ഇത്രയും രൂക്ഷമാകാന് കാരണം. ശുദ്ധജല ലഭ്യത ഉറപ്പുവരുത്തുന്നതിനുവേണ്ടി മലിനീകരണ നിയന്ത്രണം, ജലസ്രോതസുകളെ പ്രയോജനപ്പെടുത്തല് തുടങ്ങിയ കാര്യങ്ങളില് ഓരോ വ്യക്തിക്കും വലിയ പങ്ക് വഹിക്കാനുണ്ട്. ഭാവിയുടെ ധനമാണ് ജലം എന്ന ബോധ്യം നമുക്ക് ഉണ്ടാവുക എന്നതാണ് ഏറ്റവും പ്രധാനം. പ്രകൃതി മനുഷ്യന്റെ മുന്പില് ഓച്ചാനിച്ച് നില്ക്കുമെന്ന് ശാസ്ത്രം പെരുമ്പറ മുഴക്കുമ്പോള് മനുഷ്യന് ഹാലിളകി ദിനംപ്രതി മണ്ണും വെള്ളവും വാഴ്വും മലിനമാക്കിക്കൊണ്ടിരുന്നു. അണിയറയിലെ കളികള് നമ്മള് അറിഞ്ഞിരുന്നില്ല. ഒരു തിരിച്ചുപോക്കല്ല, വീണ്ടെടുപ്പാണ് നമുക്ക് വേണ്ടത്. അപകടമണിയുടെ മുഴക്കമാണ് നമ്മള് കേള്ക്കുന്നത്. ഇത് നമ്മളെ ഉണര്ത്തിയില്ലെങ്കില് അത് ഭാവിയില് ദോഷം ചെയ്യും എന്ന കാര്യം തീര്ച്ചയാണ്. ഇനിയും ഉണങ്ങിയിട്ടില്ലാത്ത നമ്മുടെ നദികളുടെ ചോരപ്പാടുകള്ക്ക് മുകളില് കരിമ്പടം ഇടാന് നമ്മള് ശ്രമിക്കരുത്.
കാലാവസ്ഥ വ്യതിയാനവും വരള്ച്ചയും പിടിമുറുക്കുമ്പോള് കുടിവെള്ള വിതരണക്കാരനെ തേടിപ്പോകുന്നത് മലയാളി ശീലമാക്കിയിരിക്കുന്നു. ദൂരെയാത്രകളില് തുളസി വെള്ളവും, ജീരകവെള്ളവും കയ്യില് കരുതി ഇരുന്നത് ഓര്മ്മ മാത്രമായി അവശേഷിക്കുന്നു. കുപ്പിവെള്ളം വിലയ്ക്കുവാങ്ങുന്നത് പുതിയ ശീലത്തിന്റെ ഭാഗമാണ്. ഇന്ന് നാം പണംകൊടുത്തു വാങ്ങുന്ന ജലം ശുദ്ധമാണോ എന്ന് നമുക്ക് അറിയാനും സാധിക്കുന്നില്ല. ശുദ്ധമായ ജലം ആരോഗ്യമുള്ള സമൂഹത്തിന് അനിവാര്യമാണ്. അതിന് ആദ്യമായി ചെയ്യേണ്ടത് നമ്മുടെ ജലസ്രോതസ്സുകളെ ശുദ്ധമായി നിര്ത്താന് ഉതകുംവിധം പരിപാലിക്കുകയാണ് ജലവിനിയോഗത്തില് കൂടുതല് ശ്രദ്ധ ചെലുത്തുകയും ചെയ്യുക എന്നതാണ്.
ജലക്ഷാമത്തെക്കുറിച്ച് ചിന്തിക്കാന് പോലും കഴിയാതെ പൗരാണിക കാലത്ത് നമ്മുടെ വീടുകളില് ഉപയോഗിച്ചിരുന്ന കിണ്ടി, കൂജ തുടങ്ങിയ ഗാര്ഹിക പാത്രങ്ങള് ദുരുപയോഗം തടയാന് പൂര്വികര് കണ്ടെത്തിയ മാര്ഗങ്ങള് ആയിരുന്നു എന്നത് നാം ഓര്മിക്കണം. എന്നാല് ഇന്ന് ജലവിനിയോഗത്തില് നാം ഒരു ശ്രദ്ധയും കൊടുക്കാറില്ല. ഇത്തരത്തില് നമുക്ക് മുന്പോട്ട് പോകാനാകില്ല. ടാപ്പില്നിന്നും വെള്ളം നേരിട്ട് ഉപയോഗിക്കുന്നതിനു പകരം, പാത്രങ്ങളില് ശേഖരിച്ചുവച്ച് ഉപയോഗിക്കുന്നത് ദുരുപയോഗം തടയാന് ഒരു പരിധിവരെ സഹായിക്കും. അടുക്കളയില്നിന്നുള്ള വെള്ളം കൃഷിക്കുപയോഗിക്കാം.
വാട്ടര് അതോറിറ്റിയുടെ ജലനഷ്ടം ഉണ്ടാകുന്നത് കണ്ടാല് ഉുടന്തന്നെ ബന്ധപ്പെട്ട അധികാരികളെ അറിയിക്കണം. കിണറിന്റെ ശേഷിക്ക് അനുസരിച്ചുള്ള പമ്പ് മാത്രം വയ്ക്കുക. വെള്ളം കുറച്ചു ശക്തി കൂടിയ പമ്പും ആണെങ്കില് അടിത്തട്ടില് ചേര്ന്നുകിടക്കുന്ന പൊടി മാലിന്യങ്ങള് കൂടി ടാങ്കിലെത്തും. ജലക്ഷാമം രൂക്ഷമായ ഈ സാഹചര്യത്തില് കിണറ്റില്നിന്നും തൊട്ടിയുപയോഗിച്ച് വെള്ളം കോരി എടുത്തുപയോഗിച്ചാല് ജലം പാഴാകുന്നത് ഒരു പരിധിവരെ ഇല്ലാതാക്കാം.
പ്രതികരിക്കാൻ ഇവിടെ എഴുതുക: