ഇരിട്ടി: ബുധനാഴ്ച ഉച്ചക്കുശേഷം ഉണ്ടായ ശക്തമായ ചുഴലിക്കാറ്റില് ആറളം പഞ്ചായത്തിന്റെ വിവിധ മേഖലകളില് പത്തോളം വീടുകള് തകര്ന്നു. ആറുപേര്ക്ക് കാറ്റില് മരം വീണും ഷെഡ്ഡ് തകര്ന്നും പരിക്കേറ്റു.
പഞ്ചായത്തിലെ ആറളം ഫാം, ചതിരൂര്, കോയിലോട്, മാങ്ങോട്, കണിയാറമുക്ക് , പുതിയങ്ങാടി, വീര്പ്പാട്, കീഴ്പ്പള്ളി മേഖലകളിലാണ് കാറ്റും മഴയും വ്യാപക നാശം വിതച്ചത്. മരം വീണു പ്രേദേശത്തെ വൈദ്യുതി തൂണുകള് തകര്ന്നു മേഖലമുഴുവന് ഇരുട്ടിലായി. ചതിരൂര് കീഴ്പ്പള്ളി, കീഴ്പ്പള്ളി ആറളം ഫാം കാക്കയങ്ങാട് റോഡുകളും മരം വീണു മണിക്കൂറുകളോളം ഗതാഗതം തടസ്സപ്പെട്ടു. ലക്ഷങ്ങളുടെ കൃഷിനാശമാണ് ഇതുമൂലം ഉണ്ടായത്. റബ്ബര്, കാശുമാവ്, തെങ്ങു, കമുക്, എന്നിവയാണ് വ്യാപകമായി നശിച്ചത്. ഫാമിലെ നാലാം ബ്ലോക്കില് ഷെഡിനു മുകളില് മരം വീണു അഞ്ചു തൊഴിലാളികള്ക്ക് പരിക്കേറ്റു. ആദിവാസി തൊഴിലാളികളായ മോളി (35), ബാബു (45), ശാന്ത (40), സീത (30), ലക്ഷ്മി (38) എന്നിവര്ക്കാണ് പരിക്കേറ്റത്. പരിക്കേറ്റ മോളിയേയും ബാബുവിനെയും തലശ്ശേരി ജനറല് ആശുപത്രിയില് പ്രവേശിപ്പിച്ചു. മറ്റില്ലാവര് ഇരിട്ടിയിലെ സ്വകാര്യ ആശുപത്രിയില് ചികിത്സയിലാണ്. ഇവര് കയറിനിന്നു ഷീദിനു മുകളില് കൂറ്റന് മരം വീണാണ് പരിക്കേറ്റത്. ചതിരൂരിലെ ചേന്നം കുന്നോല് ഏലിയാമ്മക്കും മരംവീണ് പരിക്കേറ്റു.
ചതിരൂര് നാമാങ്ങോട് കണിയാറമുക്കില് കുന്നുംപുറത്ത് മാത്യുവിന്റെ വീട് മരംവീണ് തകര്ന്നു. പുതിയങ്ങാടിയിലെ വലിയതോടുവില് ഖദീജ, സക്കീന, തെങ്ങുംപള്ളി അപ്പച്ചന്, സി. വിനോദ്, ടി. കദീജ, ചതിരൂരിലെ രാജു എടപ്പള്ളിക്കുളം, സന്തോഷ് കൊച്ചുപുര, ടോമി ചേന്നംകുളം, ടോമി മുണ്ടക്കല്, എത്തിക്കല് കുര്യന് എന്നിവരുടെ വീടുകളും ഭാഗികമായി തകര്ന്നു. നിരവധിപേരുടെ ഏക്കര് കണക്കിന് റബ്ബര് വാഴ, തെങ്ങു എന്നീ വിളകള് നശിച്ചു.
ആറളം ഫാമിലും ലക്ഷങ്ങളുടെ കൃഷിനാശമാണ് ഉണ്ടായത്. ആയിരത്തിലേറെ റബ്ബര് മരങ്ങള് കാറ്റില് കടപുഴകിയും പൊട്ടിവീണും നശിച്ചു. ഇരുന്നൂറോളം കശുമാവും തെങ്ങും, കമുകും കാറ്റില് നിലംപൊത്തി. ഫാമിലേക്കുള്ള റോഡുകളില് നൂറോളം റബ്ബര് മരങ്ങളാണ് പൊട്ടി വീണത്. ഇരിട്ടി, മട്ടന്നൂര്, പേരാവൂര് എന്നിവിടങ്ങളിലെ അഗ്നിശമന സേനകള് തടസ്സം നീക്കുന്നതിനുള്ള പരിശ്രമത്തില് ഏര്പ്പെട്ടു.
ആറളം പഞ്ചായത്തു പ്രസിഡന്റ് ഷിജി നടുപ്പറമ്പില്, വൈസ് പ്രസിഡന്റ് കെ.വേലായുധന്, പഞ്ചായത്തംഗങ്ങളായ ജോഷി പാലമറ്റം,റഹിയാനത്തു സുബി, ജിമി അന്തിനാട്ട്, ശാന്തി പഴയതോട്ടം, അരവിന്ദന് അക്കാനിശ്ശേരി എന്നിവര് സ്ഥലങ്ങള് സന്ദര്ശിച്ചു.
പ്രതികരിക്കാൻ ഇവിടെ എഴുതുക: