ലണ്ടന്: ലോകരാജ്യങ്ങളെ ഞെട്ടിച്ച് വന് സൈബര് ആക്രമണം. ബ്രിട്ടന്, യുഎസ്, റഷ്യ, ചൈന രാജ്യങ്ങള് ഉള്പ്പെടെ ലോകത്തെ 99 രാജ്യങ്ങളിലെ കംപ്യൂട്ടര് ശൃംഖലകളെ ആക്രമണം ബാധിച്ചതായാണ് റിപ്പോര്ട്ടുകള്. ഇന്ത്യയിലെ കമ്പ്യൂട്ടറുകളെ ബാധിച്ചതായി ഇതുവരെ അറിവില്ല.
ആക്രമണം നടത്തിയ ശേഷം ഫയലുകള് തിരികെ ലഭിക്കാന് പണം ആവശ്യപ്പെടുന്ന ‘റാന്സംവെയര്’ ( Ransomware ) ആക്രമണമാണ് ഉണ്ടായിരിക്കുന്നത്. ബിറ്റ്കോയിന് ( Bitcoin ) വഴി 300 ഡോളര് മുതല് 600 ഡോളര് വരെയാണ് (ഏകദേശം 19,000 രൂപ മുതല് 38,000 രൂപ വരെ) ആക്രമണകാരികള് ആവശ്യപ്പെടുന്നത്.
ഡിജിറ്റല് കറന്സി ആയതിനാല് ബിറ്റ്കോയിന് നേടിയ കുറ്റവാളികളെ കണ്ടെത്തുക ദുഷ്കരമാണ്. ആക്രമണത്തിന് ശേഷം ബിറ്റ്കോയിന് വഴി വന്തോതില് പണം കൈമാറ്റം നടക്കുന്നതായി റിപ്പോര്ട്ടുണ്ട്. റാന്സംവെയര് ബാധിച്ച 75,000 കേസുകള് റിപ്പോര്ട്ട് ചെയ്യപ്പെട്ടതായി സൈബര് സുരക്ഷാ കമ്പനിയായ അവാസ്റ്റ് ( Avast ) പറയുന്നു.
മെക്രോസോഫ്റ്റിലെ സുരക്ഷാ പഴുത് മുതലെടുക്കുന്നതിനായി അമേരിക്കന് ചാര സംഘടനയായ നാഷണല് സെക്യൂരിറ്റി ഏജന്സി (എന്എസ്എ) രൂപപ്പെടുത്തിയ ടൂള് കവര്ന്നെടുത്താണ് ആക്രമണം നടത്തിയതെന്നാണ് വിദഗ്ധര് കരുതുന്നത്. എന്എസ്എ ടൂള് ആയ എറ്റേണല് ബ്ലൂ ( Eternal Blue ) ഓണ്ലൈനില് ചോര്ന്നിരുന്നു.
പ്രതികരിക്കാൻ ഇവിടെ എഴുതുക: