ഇന്ന് കായിക മല്സരങ്ങള്; ജില്ലാ കലക്ടര് ഉദ്ഘാടനം ചെയ്യും
കണ്ണൂര്: പെണ്കരുത്തിന്റെ വിളംബരമായി അരങ്ങ് 2017 ജില്ലാതല കലാ-കായിക മേള. കുടുംബശ്രീ 19 ാം വാര്ഷികാഘോഷത്തിന്റെ ഭാഗമായി പാപ്പിനിശ്ശേരി ഇഎംഎസ് സ്മാരക ഹയര് സെക്കന്ഡറി സ്കൂളില് ആരംഭിച്ച കുടുംബശ്രീ പ്രവര്ത്തകരുടെ കലാമല്സരങ്ങളാണ് പ്രാതിനിധ്യം കൊണ്ടും അവതരണ മികവ് കൊണ്ടും ശ്രദ്ധേയമായത്. പ്രായ വ്യത്യാസമില്ലാതെ ജില്ലയുടെ വിവിധ ഭാഗങ്ങളില് നിന്നെത്തിയ കുടുംബശ്രീ പ്രവര്ത്തകര് തങ്ങളുടെ കഴിവുകള് പ്രകാശിപ്പിച്ചപ്പോള് മൂന്നു മല്സര വേദികളും പ്രതിഭകളുടെ സംഗമ വേദികളായി മാറി.
നാടന് പാട്ട്, നാടോടി നൃത്തം, തിരുവാതിര, സംഘനൃത്തം, ഒപ്പന, ഫാന്സി ഡ്രസ്, നാടകം, ശിങ്കാരി മേളം തുടങ്ങി പ്രധാന വേദിയില് നടന്ന ഓരോ പരിപാടികളും സദസ്സിന്റെ നിറഞ്ഞ കൈയടി നേടി. വേദി രണ്ടില് നടന്ന ലളിത ഗാനം, കവിതാപാരായണം, മാപ്പിളപ്പാട്ട്, സംഘഗാനം, പ്രസംഗം, മിമിക്രി, മോണോ ആക്ട് മല്സരങ്ങളും ഒന്നിനോടൊന്ന് മികച്ചു നിന്നു. ചിത്രരചന, കഥാ രചന, കാര്ട്ടൂണ്, കവിതാരചന തുടങ്ങിയ സ്റ്റേജിതര ഇനങ്ങളിലും മല്സരങ്ങള് നടന്നു.
അരങ്ങ് 2017 കലാ-കായിക മേള പി.കെ.ശ്രീമതി എം.പി ഉദ്ഘാടനം ചെയ്തു. കേരളത്തിന്റെ വികസന ചരിത്രത്തിലെ ശ്രദ്ധേയമായ അധ്യായമായി ചുരുങ്ങിയ കാലത്തിനിടയില് കുടുംബശ്രീ മാറിക്കഴിഞ്ഞതായി എം.പി അഭിപ്രായപ്പെട്ടു. വീടുകളുടെ നാലു ചുവരുകള്ക്കുള്ളില് ഒതുങ്ങിക്കഴിയുകയായിരുന്ന സ്ത്രീകളെ പൊതുരംഗത്തേക്ക് കൊണ്ടുവരുന്നതിലും അവരുടെ ആത്മാഭിമാനവും ആത്മവിശ്വാസവും വര്ധിപ്പിക്കുന്നതിലും കുടുംബശ്രീ മാതൃകാപരമായ പങ്കാണ് വഹിച്ചത്. കല, സാഹിത്യം, കായികം, ഐ.ടി, സംരംഭകത്വം തുടങ്ങി എല്ലാ മേഖലകളിലും കഴിവ് തെളിയിക്കാന് കുടുംബശ്രീയിലൂടെ കേരളത്തിലെ സ്തീകള്ക്ക് കഴിഞ്ഞതായും എം.പി പറഞ്ഞു. കുടുംബശ്രീയുടെ വളര്ച്ചയ്ക്ക് എല്ലാ വിധ പിന്തുണയും സംസ്ഥാന സര്ക്കാര് നല്കിവരുന്നുണ്ട്. ഈ അനുകൂല സാഹചര്യത്തില് കൂടുതല് ഉയരങ്ങള് കീഴടക്കാന് കുടുംബശ്രീക്ക് സാധിക്കണമെന്നും അവര് പറഞ്ഞു.
ചടങ്ങില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷനായിരുന്നു. ജില്ലാ പഞ്ചായത്ത് ക്ഷേമകാര്യ സ്റ്റാന്റിംഗ് കമ്മറ്റി ചെയര്പേഴ്സണ് ടി.ടി.റംല, കല്യാശ്ശേരി ബ്ലോക്ക് പഞ്ചായത്ത് പ്രസിഡന്റ് വി.വി പ്രീത, പാപ്പിനിശ്ശേരി പഞ്ചായത്ത് പ്രസിഡന്റ് കെ നാരായണന്, പാപ്പിനിശ്ശേരി പഞ്ചായത്ത് വൈസ് പ്രസിഡന്റ് സി.റീന, ജില്ലാ മിഷന് കോ-ഓര്ഡിനേറ്റര് ഡോ.എം.സുര്ജിത്ത്, പാപ്പിനിശ്ശേരി സിഡിഎസ് ചെയര്പേഴ്സണ് എ.വി സുശീല തുടങ്ങിയവര് സംസാരിച്ചു.
ജില്ലയിലെ ഇരിട്ടി, തലശ്ശേരി, കണ്ണൂര്, തളിപ്പറമ്പ് താലൂക്ക്തല മത്സരങ്ങളില് ഒന്നാം സ്ഥാനം നേടിയവരാണ് അരങ്ങ് 2017 ലെ കലാ മത്സരങ്ങളില് പങ്കെടുത്തത്. 13 സ്റ്റേജ് ഇനങ്ങളും 7 സ്റ്റേജിതര ഇനങ്ങളും ഉള്പ്പെടുന്ന മത്സരങ്ങളില് വ്യക്തിഗത-ഗ്രൂപ്പ് ഇനങ്ങളിലായി 260 കലാകാരികള് മാറ്റുരച്ചു.
സിഡിഎസ് തലത്തില് ഒന്നാം സ്ഥാനം നേടിയ 500 ലേറെ താരങ്ങള് പങ്കെടുക്കുന്ന കായിക മത്സരങ്ങള് ഇന്ന് രാവിലെ 9.30ന് പാപ്പിനിശ്ശേരി ഇ എം എസ് സ്മാരക ഹയര് സെക്കന്ഡറി സ്കൂളില് ജില്ലാ കലക്ടര് മീര് മുഹമ്മദലി ഉദ്ഘാടനം ചെയ്യും. ഫെന്സിംഗ് താരം ജിഷ പുതുശ്ശേരി മുഖ്യാതിഥിയായി പങ്കെടുക്കും. ഓട്ടം, റിലേ, ലോംഗ് ജംപ്, നടത്തം, വടംവലി, ഷോട്ട്പുട്ട് എന്നീ ഇനങ്ങളിലാണ് മല്സരങ്ങള് നടക്കുക.
കുടുംബശ്രീ കലാ-കായിക മേളയുടെ ഭാഗമായി വിത്തുമേള, കുടുംബശ്രീ ഉല്പ്പന്ന പ്രദര്ശന- വിപണന മേള എന്നിവയും സംഘടിപ്പിച്ചിട്ടുണ്ട്. ജില്ലാമിഷന് മഹിളാ കിസാന് സശാക്തീകരണ് പര്യോജന (എംകെഎസ്പി) പദ്ധതിയുടെ ഭാഗമായാണ് നാടന് കാര്ഷിക വിത്തുകളുടെ പ്രദര്ശനം സംഘടിപ്പിച്ചിരിക്കുന്നത്. പ്രദര്ശനം പി.കെ.ശ്രീമിതി എം.പിയുടെ സാന്നിധ്യത്തില് ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് ഉദ്ഘാടനം ചെയ്തു. 150ല് പരം നാടന് നെല്ലിനങ്ങളുടെയും മറ്റ് കാര്ഷിക വിളകളുടേയും നാടന് വിത്തുകള് ഇവിടെ ലഭിക്കും.
പ്രതികരിക്കാൻ ഇവിടെ എഴുതുക: