ആലപ്പുഴ: മുസ്ലീം ലീഗും സിപിഎമ്മുമായുള്ള ബന്ധം കൂടുതല് മറ നീക്കി. ലീഗിന്റെ പോഷക സംഘടനയായ സ്റ്റേറ്റ് എംപ്ലോയീസ് യൂണിയന്റെ സംസ്ഥാന സമ്മേളനത്തില് മുതിര്ന്ന കോണ്ഗ്രസ് നേതാക്കളെ ഒഴിവാക്കി സിപിഎം നേതാവ് മന്ത്രി ജി. സുധാകരനെ പങ്കെടുപ്പിക്കുന്നതാണ് ലീഗില് വിവാദമായിരിക്കുന്നത്.
സമ്മേളനവുമായി ബന്ധപ്പെട്ട് സംഘടിപ്പിച്ചിരിക്കുന്ന സെമിനാറാണ് മന്ത്രി ജി. സുധാകരന് ഉദ്ഘാടനം ചെയ്യുക. ആലപ്പുഴയില് ഈ മാസം 19 മുതല് 21 വരെയാണ് സംസ്ഥാന സമ്മേളനം. ആലപ്പുഴ ജില്ലക്കാരന് കൂടിയായ പ്രതിപക്ഷ നേതാവ് രമേശ് ചെന്നിത്തലയെ സമ്മേളനത്തില് പങ്കെടുപ്പിക്കാതെ സിപിഎം നേതാവിനെ ഉദ്ഘാടകനാക്കിയത് കോണ്ഗ്രസ് പ്രവര്ത്തകര്ക്കിടയിലും കടുത്ത അമര്ഷത്തിന് ഇടയാക്കിയിട്ടുണ്ട്.
ഹൈദരലി ശിഹാബ് തങ്ങള്, പി.കെ. കുഞ്ഞാലിക്കുട്ടി തുടങ്ങിയവര് പങ്കെടുക്കുന്ന സമ്മേളനത്തിലെ സെമിനാറാണ് സുധാകരന് ഉദ്ഘാടനം ചെയ്യുന്നത്.
മലപ്പുറം ലോക്സഭാ ഉപതെരഞ്ഞെടുപ്പില് ദുര്ബ്ബലനായ സ്ഥാനാര്ത്ഥിയെ നിര്ത്തി സിപിഎം കുഞ്ഞാലിക്കുട്ടിയെ സഹായിച്ചിരുന്നു. കേരളാകോണ്ഗ്രസ് മാണിക്കു പിന്നാലെ മുസ്ലീം ലീഗും സിപിഎമ്മിനോട് അടുക്കുന്നുവെന്ന് പ്രചാരണം ശക്തമായ സാഹചര്യത്തിലാണ് സിപിഎം മന്ത്രിയെ ലീഗ് പോഷക സംഘടനയുടെ സമ്മേളനത്തില് പങ്കെടുപ്പിക്കുന്നത്.
മുസ്ലീം ലീഗിലെ തന്നെ കുഞ്ഞാലിക്കുട്ടിവിരുദ്ധനായ പ്രതിപക്ഷ ഉപനേതാവ് എം.കെ. മുനീറിനെ സമ്മേളനത്തില് അടുപ്പിച്ചിട്ടില്ല.
പ്രതികരിക്കാൻ ഇവിടെ എഴുതുക: