ഐസറുകളില്‍ പഞ്ചവത്സര ബിഎസ്-എംഎസ് പ്രവേശനം

Sunday 21 May 2017 8:40 pm IST

ശാസ്ത്രവിഷയങ്ങളില്‍ സമര്‍ത്ഥരായ പ്ലസ്ടു വിജയികള്‍ക്ക് ഗവേഷണാധിഷ്ഠിത സംയോജിത പഞ്ചവത്സര ബിഎസ്-എംഎസ് കോഴ്‌സുകളില്‍ പഠനത്തിന് രാജ്യത്തെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സ് എഡ്യൂക്കേഷന്‍ ആന്‍ഡ് റിസര്‍ച്ച് (ഐസറുകള്‍) അവസരമൊരുക്കുന്നു. അടിസ്ഥാന ശാസ്ത്രവിഷയങ്ങളില്‍ ഗുണമേന്മയോടുകൂടിയ ഉന്നതവിദ്യാഭ്യാസവും ഗവേഷണവും പരിശീലനവുമൊക്കെ വിദ്യാര്‍ത്ഥികള്‍ക്ക് ലഭ്യമാക്കുകയെന്ന ഉദ്ദേശ്യത്തോടെ കേന്ദ്രമാനവവിഭവ വികസന മന്ത്രാലയമാണ് ഐസറുകള്‍ സ്ഥാപിച്ചിട്ടുള്ളത്. തിരുവനന്തപുരം, തിരുപ്പതി, പൂനൈ, മൊഹാളി, ഭോപാല്‍, ബര്‍ഹാംപൂര്‍, കൊല്‍ക്കത്ത എന്നിവിടങ്ങളിലാണ് 'ഐസറുകള്‍' പ്രവര്‍ത്തിക്കുന്നത്. ശാസ്ത്രവിഷയങ്ങളില്‍ അഭിനിവേശവും ഗവേഷണ താല്‍പര്യവുമുള്ള വിദ്യാര്‍ത്ഥികള്‍ക്ക് ഐസറുകള്‍ നടത്തുന്ന ബിഎസ്-എംഎസ് കോഴ്‌സുകള്‍ പഠിച്ച് ശാസ്ത്രഗവേഷണ വികസന സ്ഥാപനങ്ങളിലും അക്കാദമിക് മേഖലയിലും ശാസ്ത്രാധിഷ്ഠിത വ്യവസായ സംരംഭങ്ങളിലുമൊക്കെ മികച്ച കരിയറിലെത്തിച്ചേരാനാകും. ഐസറുകളില്‍ ഇക്കൊല്ലത്തെ ബിഎസ്-എംഎസ് പ്രവേശനത്തിന് ഇപ്പോള്‍ അപേക്ഷിക്കാം. അഡ്മിഷന്‍ പോര്‍ട്ടല്‍ മെയ് 23 മുതല്‍ സജ്ജമാകും. മൂന്നു വഴികളിലൂടെയാണ് പ്രവേശനം. 1) കിഷോര്‍ വൈജ്ഞാനിക് പ്രോത്സാഹന്‍ യോജന (കെവിപിവൈ)പരീക്ഷയില്‍ യോഗ്യത നേടിയവര്‍ക്ക്. 2) ജെഇഇ അഡ്വാന്‍സ്ഡ് 2017 ല്‍ യോഗ്യത നേടുന്നവര്‍ക്ക്. 3) സ്റ്റേറ്റ്/സെന്‍ട്രല്‍ ഹയര്‍ സെക്കന്ററി/തത്തുല്യ ബോര്‍ഡ് പരീക്ഷയില്‍ (എസ്‌സിബി) പ്ലസ്ടു ശാസ്ത്രവിഷയങ്ങളില്‍ ഉന്നത വിജയം വരിച്ചവര്‍. 'എസ്‌സിബി' പ്ലസ്ടു പരീക്ഷകളില്‍ ഉയര്‍ന്ന കട്ട് ഓഫ് പെര്‍സന്റേജോടെ വിജയിക്കുന്നവരെയാണ് പരിഗണിക്കുക. കൂടാതെ അപേക്ഷകര്‍, ഐസറുകള്‍ ജൂണ്‍ 25ന് ദേശീയതലത്തില്‍ നടത്തുന്ന അഭിരുചി പരീക്ഷയില്‍ (ഐഐഎസ്ഇആര്‍ ആപ്റ്റിറ്റിയൂഡ് ടെസ്റ്റ്) യോഗ്യത നേടുകയും വേണം. അപേക്ഷാഫീസ് 2000 രൂപ. എസ്‌സി/എസ്ടി/ പിഎച്ച് വിഭാഗക്കാര്‍ക്ക് 1000 രൂപ മതി. മെയ് 23 മുതല്‍ ഓണ്‍ലൈനായി www.iiseradmission.in എന്ന വെബ്‌സൈറ്റിലൂടെ അപേക്ഷാ സമര്‍പ്പണം നടത്താവുന്നതാണ്. ഒറ്റയപേക്ഷ മതി. ജോയിന്റ് അഡ്മിഷന്‍ കമ്മറ്റിയാണ് അഡ്മിഷന്‍ നടപടികള്‍ക്ക് മേല്‍നോട്ടം വഹിക്കുന്നത്. അപേക്ഷാ സമര്‍പ്പണത്തിനുള്ള നിര്‍ദ്ദേശങ്ങള്‍ വെബ്‌സൈറ്റില്‍ ലഭിക്കും. 'കെവിപിവൈ' ചാനല്‍ വഴി അപേക്ഷിക്കുന്നതിന് ജൂണ്‍ 12 വരെ സമയമുണ്ട്. ഇവര്‍ക്കുള്ള സീറ്റ് അലോക്കേഷന്‍ ജൂണ്‍ 15 മുതല്‍ ആരംഭിക്കും. 'എസ്‌സിബി' ചാനല്‍വഴിയുള്ള അപേക്ഷകള്‍ ജൂണ്‍ 18 വരെ സ്വീകരിക്കും. ജെഇഇ അഡ്‌വാന്‍സ്ഡ് ചാനല്‍ വഴിയുള്ള അപേക്ഷകള്‍ സ്വീകരിക്കുന്ന അവസാന തീയതി ജൂണ്‍ 19. അന്നേദിവസം തന്നെ സീറ്റ് അലോട്ട്‌മെന്റും ആരംഭിക്കും. 'എസ്‌സിബി' ചാനല്‍ വഴിയുള്ള അപേക്ഷാര്‍ത്ഥികള്‍ക്കായി ജൂണ്‍ 25 ന് നടത്തുന്ന ഐസര്‍ ആപ്ടിട്യൂഡ് ടെസ്റ്റിന്റെ ഫലം ജൂലൈ നാലിന് പ്രഖ്യാപിക്കും. സീറ്റ് അലോക്കേഷന്‍ ജൂലൈ അഞ്ചിന് ആരംഭിക്കും. തെരഞ്ഞെടുക്കപ്പെടുന്നവര്‍ക്ക് ഓഗസ്റ്റ് ആദ്യവാരത്തോടെ സെമസ്റ്റര്‍ ക്ലാസ് ആരംഭിക്കും. ഏഴ് ഐസറുകളിലുംകൂടി പഞ്ചവത്സര ബിഎസ്-എംഎസ് കോഴ്‌സുകളില്‍ ആകെ 1285 പേര്‍ക്കാണ് പ്രവേശനം. ഓരോ ഐസറിലും ലഭ്യമായ സീറ്റുകള്‍-തിരുവനന്തപുരം- 200, തിരുപ്പതി- 125, പൂനൈ- 200, മൊഹാളി- 200, ഭോപാല്‍- 260, ബര്‍ഹാംപൂര്‍- 100, കൊല്‍ക്കത്ത- 200. പ്ലസ്ടുതലത്തില്‍ ബയോളജി അല്ലെങ്കില്‍ മാത്തമാറ്റിക്‌സ് വിഷയം പഠിച്ചിട്ടില്ലാത്തവരെയും ഐഐഎസ്ഇആര്‍ അഭിരുചി പരീക്ഷയെഴുതുന്നതിന് അനുവദിക്കും. എന്നാല്‍ ഈ അഭിരുചി പരീക്ഷയില്‍ പ്ലസ്ടു നിലവാരത്തിലുള്ള ബയോളജി, കെമിസ്ട്രി, മാത്തമാറ്റിക്‌സ്, ഫിസിക്‌സ് വിഷയങ്ങളില്‍ ചോദ്യങ്ങളുണ്ടാവും. എല്ലാ വിഷയങ്ങള്‍ക്കും തുല്യ വെയിറ്റേജാണുള്ളത്. ഇതില്‍ തിളങ്ങുന്നവര്‍ക്കാണ് പ്രവേശനം. സമര്‍ത്ഥരായ വിദ്യാര്‍ത്ഥികള്‍ക്ക് kvpy, inspire മുതലായ സ്‌കോളര്‍ഷിപ്പുകള്‍ ലഭിക്കും. പ്രതിമാസം 5,000 രൂപയാണ് സ്‌കോളര്‍ഷിപ്പ്. പഠനമികവ് വിലയിരുത്തിയാവും സ്‌കോളര്‍ഷിപ്പ് പുതുക്കി നല്‍കുക. അഡ്മിഷന്‍ ലഭിക്കുന്നവര്‍ ഹോസ്റ്റലുകളില്‍ താമസിച്ച് പഠിക്കണം. സീറ്റ് അലോട്ട് ചെയ്തു കിട്ടുന്ന വിദ്യാര്‍ത്ഥികള്‍ 25,000 രൂപ 'സീറ്റ് അക്‌സപ്റ്റന്‍സ് ഫീ' ആയി നല്‍കണം. എസ്‌സി/എസ്ടി/ഭിന്നശേഷിക്കാര്‍ എന്നീ വിഭാഗങ്ങളില്‍പ്പെടുന്നവര്‍ 12,500 രൂപ നല്‍കിയാല്‍ മതി. ഈ തുക ആദ്യ സെമസ്റ്റര്‍ ഫീസില്‍ ക്രമീകരിക്കുന്നതാണ്. ഓരോ ഐസറിലും സെമസ്റ്റര്‍ ഫീസ് നിരക്കുകള്‍ വ്യത്യസ്തമായിരിക്കും. ഫീസ് നിരക്കുകള്‍ അതത് ഐസറുകളുടെ വെബ്‌സൈറ്റില്‍ ലഭിക്കും. ഐസറുകളിലെ അഡ്മിഷന്‍ സംബന്ധിച്ച കൂടുതല്‍ വിവരങ്ങള്‍ www.iiseradmission.in എന്ന വെബ്‌സൈറ്റില്‍ ലഭിക്കും.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.