മ്യൂണിച്ച്: സമകാലീന ഫുട്ബോളിലെ രണ്ട് ഇതിഹാസ താരങ്ങള്ക്കാണ് അലിയന്സ് അരീനയില് താരങ്ങളും ആരാധകരും കണ്ണീരോടെ വിട നല്കിയത്. ഒരാള് ജര്മന് ഫുട്ബോളില് സമാനതകളില്ലാത്ത നേട്ടം സ്വന്തമാക്കിയ വലതു ബാക്ക് ഫിലിപ്പ് ലാം. രണ്ടാമന് സ്പാനിഷ് സുവര്ണ തലമുറയുടെ ഭാഗമായിരുന്ന മധ്യനിരക്കാരന് സാബി അലന്സൊ.
2014 ലോകകപ്പില് ജര്മനിയെ നയിച്ച് വിജയ തിലകം ചാര്ത്തി ദേശീയ ടീമിനോട് വിട പറഞ്ഞ ലാം, മുപ്പത്തിനാലിലെത്തുമ്പോള് ക്ലബ് കരിയറും അവസാനിപ്പിക്കുന്നു. വിവിധ പ്രായ വിഭാഗങ്ങളില് ദേശീയ ടീമിനായി കളിച്ചു. സീനിയര് ടീമിനായി 113 മത്സരങ്ങളിലിറങ്ങി. 2006, 2008 ലോകകപ്പുകളില് മൂന്നാമതെത്തിയ ടീമിലും അംഗമായിരുന്നു. ദേശീയ ടീമിനായി അഞ്ചു ഗോളും നേടി.
ഇതിനേക്കാള് സമ്പന്നമായിരുന്നു ലാമിന്റെ ക്ലബ് കരിയര്. 2003-2005 സീസണില് വായ്പാടിസ്ഥാനത്തില് സ്റ്റുട്ട്ഗര്ട്ടില് പോയതൊഴിച്ചാല് ബയേണില് മാത്രമായിരുന്നു കളിക്കാലം. ബയേണിനായി 332 കളികളില് ബൂട്ടണിഞ്ഞു 12 ഗോള് നേടി. 53 കളികളില് സ്റ്റുട്ട്ഗര്ട്ട് ജേഴ്സിയുമണിഞ്ഞു. എട്ട് ബുണ്ടസ് ലിഗ കിരീടങ്ങള്, ആറ് ജര്മന് കപ്പ്, ഒരു വട്ടം ജര്മന് ലീഗ് കപ്പ്, മൂന്നു തവണ ജര്മന് സൂപ്പര് കപ്പ്, ഒരു തവണ യുവേഫ ചാമ്പ്യന്സ് ലീഗ്, രണ്ടു തവണ റണ്ണറപ്പ്, 2013ല് യുവേഫ സൂപ്പര് കപ്പ്, അതേവര്ഷം തന്നെ ഫിഫ ക്ലബ് ലോകകപ്പ് കിരീടങ്ങള് നേടിയ ബയേണ് ടീമില് നിത്യസാന്നിധ്യമായിരുന്നു ലാം.
സ്പാനിഷ് അണ്ടര് 18, 21 ടീമുകളിലും ദേശീയ ടീമിലും കളിച്ച അലന്സൊ 2010ല് ലോകകപ്പ് നേടിയ സ്പാനിഷ് ടീമിലംഗമായിരുന്നു. ദേശീയ ടീമില് 2003 മുതല് 14 വരെ 114 കളിയില് ബൂട്ടണിഞ്ഞു. 16 ഗോളും നേടി. 2008, 2012 വര്ഷങ്ങളില് യൂറോ കപ്പ് നേടിയ ടീമിലും അംഗമായിരുന്നു. 2014ല് ദേശീയ ജഴ്സി അഴിച്ചു.
ക്ലബ് ഫുട്ബോളില് സമ്മോഹനമായ കരിയറാണ് അലന്സൊയുടേത്. സ്പാനിഷ് ടീം റയല് സോസിഡാഡില് തുടങ്ങി ലിവര്പൂള്, റയല് മാഡ്രിഡ് തുടങ്ങി ലോക ഫുട്ബോളിലെ തന്നെ പ്രബലമായ ക്ലബ്ബുകളിലൂടെയാണ് മുന്നേറിയത്. രണ്ട് വ്യത്യസ്ത ക്ലബ്ബുകള്ക്കൊപ്പം യുവേഫ ചാമ്പ്യന്സ് ലീഗ് കിരീടത്തിനും അര്ഹനായി ഇദ്ദേഹം. സ്പെയിനില് നിന്ന് പുറത്തു കടന്ന ആദ്യ വര്ഷം 2004-05ല് ലിവര്പൂളിനൊപ്പവും 2013-14ല് റയല് മാഡ്രിഡിനൊപ്പവും.
ലിവര്പൂളിനൊപ്പം എഫ്എ കപ്പ്, എഫ്എ കമ്യൂണിറ്റി ഷീല്ഡ്, യുവേഫ സൂപ്പര് കപ്പ് എന്നിവയും റയലിനൊപ്പം ലാ ലിഗ, രണ്ട് കോപ ഡെല് റേ, സ്പാനിഷ് സൂപ്പര് കപ്പ് കിരീടങ്ങളും സ്വന്തമാക്കി.
2014ല് ദേശീയ ടീമിനോടു വിടപറഞ്ഞ വര്ഷം തന്നെയാണ് റയലില് നിന്ന് ബയേണിലെത്തിയത്. തുടര്ന്ന് ബുണ്ടസ് ലിഗയില് മൂന്നു കിരീടം. ജര്മന് കപ്പ്, ജര്മന് സൂപ്പര് കപ്പ് നേട്ടങ്ങളും സ്വന്തമാക്കി.
ക്ലബ് കരിയറില് 547 കളിയില് 35 ഗോള്. സോസിഡാഡിനായി 114 കളിയില് ഒമ്പത്, ലിവര്പൂളിനൊപ്പം 143 കളിയില് നാല് ഗോള്, റയലിനായി 158 കളിയില് അഞ്ചു ഗോളും സ്വന്തമാക്കി. ബയേണിനായി 79 മത്സരങ്ങളില് ബൂട്ടണിഞ്ഞു, അഞ്ച് ഗോള്. തുടക്കകാലത്ത് ലാ ലിഗ ടീം ഐബറിനായി വായ്പാടിസ്ഥാനത്തില് കളിച്ചു.
പ്രതികരിക്കാൻ ഇവിടെ എഴുതുക: