തിരുവനന്തപുരം: വിഴിഞ്ഞം കരാര് സംസ്ഥാന താല്പര്യങ്ങള്ക്ക് എതിരാണെന്ന സിഎജി റിപ്പോര്ട്ടിന്റെ അടിസ്ഥാനത്തില് ജുഡീഷല് അന്വേഷണം നടത്താന് മന്ത്രിസഭായോഗം തീരുമാനിച്ചു. ജസ്റ്റീസ് സി.എന്. രാമചന്ദ്രന്റെ നേതൃത്വത്തില് ജുഡീഷല് കമ്മീഷന് അന്വേഷണം നടത്തും.
ജുഡീഷല് അന്വേഷണത്തിന്റെ പരിഗണനാ വിഷയങ്ങള് പിന്നീട് തീരുമാനിക്കും. അന്വേഷണം എത്രയുംവേഗം പൂര്ത്തിയാക്കാന് സര്ക്കാര് നിര്ദ്ദേശം നല്കും. വിഴിഞ്ഞം കരാര് സംസ്ഥാന താല്പര്യത്തിന് വിരുദ്ധമാണെന്നും കരാര് കാലാവധി 40 വര്ഷമാക്കിയത് സംസ്ഥാന താല്പര്യം ഹനിക്കുന്നതാണെന്നും നിയമവിരുദ്ധമാണെന്നും കംപ്ട്രോളര് ആന്ഡ് ഓഡിറ്റര് ജനറലിന്റെ (സിഎജി) റിപ്പോര്ട്ടില് കുറ്റപ്പെടുത്തിയിരുന്നു.
നിര്മാണകാലാവധി 10 വര്ഷം കൂട്ടിനല്കിയത് നിയമവിരുദ്ധമെന്നും ഇതിലൂടെ 29.21 കോടി രൂപയുടെ അധികവരുമാനം അദാനിക്ക് ലഭിക്കുമെന്നും സിഎജി വ്യക്തമാക്കി. 20 വര്ഷം കൂടി വേണമെങ്കില് അധികം നല്കാമെന്ന വ്യവസ്ഥയും ചട്ടവിരുദ്ധമാണ്. ഇങ്ങനെ ചെയ്താല് 61095 കോടി രൂപ അധികവരുമാനം അദാനിക്കു ലഭിക്കുമെന്നും റിപ്പോര്ട്ടില് വ്യക്തമാക്കിയിട്ടുണ്ട്.
പ്രതികരിക്കാൻ ഇവിടെ എഴുതുക: