കണ്ണൂര്: കാലാവധി അവസാനിക്കുന്ന മട്ടന്നൂര് നഗരസഭയിലേക്ക് തെരഞ്ഞെടുപ്പ് നടത്തുന്നതിനു മുന്നോടിയായി തയ്യാറാക്കിയ കരട് വോട്ടര്പട്ടിക ഇന്ന് പ്രസിദ്ധീകരിക്കും. നേരത്തേയുള്ള 34 വാര്ഡുകളിലേക്ക് തയ്യാറാക്കിയ വോട്ടര്പട്ടിക, ഡീലിമിറ്റേഷന് ശേഷമുള്ള 35 വാര്ഡുകളിലേക്കായി ക്രമീകരിച്ചാണ് പുതിയ പട്ടിക പ്രസിദ്ധീകരിക്കുന്നത്.
ഇതുമായി ബന്ധപ്പെട്ട ആക്ഷേപങ്ങളും പരാതികളും 17 വരെ സ്വീകരിക്കും. ഇവയില് 30ന് തീര്പ്പ് കല്പ്പിച്ച് ജൂലൈ മൂന്നിന് അന്തിമ വോട്ടര്പട്ടിക പ്രസിദ്ധീകരിക്കും.
2017 ജനുവരി ഒന്നിനോ അതിനു മുമ്പോ 18 വയസ്സ് തികഞ്ഞവര്ക്ക് വോട്ടര് പട്ടികയില് പേര് ചേര്ക്കാം. കരട് വോട്ടര്പട്ടിക പ്രസിദ്ധീകരിച്ച ശേഷം മരണപ്പെട്ടവരുടെ വിവരങ്ങള് മുനിസിപ്പല് സെക്രട്ടറി തയ്യാറാക്കി നഗരസഭയുടെ നോട്ടീസ് ബോര്ഡില് പ്രസിദ്ധീകരിക്കും. ഏഴ് ദിവസത്തിനകം ആക്ഷേപങ്ങള് ലഭിച്ചില്ലെങ്കില് അവ പട്ടികയില് നിന്ന് നീക്കം ചെയ്യും.
നഗരസഭയിലെ 18 വയസ്സ് തികഞ്ഞ മുഴുവന് ആളുകളും വോട്ടര് പട്ടികയില് പേരുണ്ടെന്ന് ഉറപ്പുവരുത്തണമെന്ന് ഇതുമായി ബന്ധപ്പെട്ട് ചേര്ന്ന യോഗത്തില് ജില്ലാ കലക്ടര് മീര് മുഹമ്മദലി പറഞ്ഞു. ഇപ്പോള് സ്ഥലത്തില്ലാത്തവര്ക്കും ഓണ്ലൈനായി പട്ടികയില് പേരുചേര്ക്കാം.
കലക്ടറുടെ ചേംബറില് നടന്ന യോഗത്തില് ഡെപ്യൂട്ടി കലക്ടര് സി.എം.ഗോപിനാഥന്, റിട്ടേണിംഗ് ഓഫീസര് ഡിഎഫ്ഒ സുനില് പാമിഡി, നഗരസഭാ സെക്രട്ടറി എം.സുരേശന് തുടങ്ങിയവരും സംബന്ധിച്ചു.
പ്രതികരിക്കാൻ ഇവിടെ എഴുതുക: