കാക്കനാട്: അപ്പോള്സ്റ്ററി കടക്ക് തീപിടിച്ചു. തീപിടുത്തത്തില് നാല് കടകളും മുഴുവനായി കത്തി നശിച്ചു. കാക്കനാട് പള്ളിക്കര റോഡില് അത്താണിയില് ഷാപ്പുപടിക്ക് സമീപമുള്ള നാല് കടകള്ക്കാണ് തീപിടിച്ചത്. ഇന്നലെ രാവിലെ 11 മണിയോടെയാണ് സംഭവം.
താഴത്ത് അപ്പോള്സ്റ്ററിയും അതിന് തൊട്ടടുത്ത് പ്രവര്ത്തിക്കുന്ന ബാറ്ററി കടയിലും മുകളിലായി ഷീറ്റു മേഞ്ഞ രണ്ടു കടകളുമാണ് കത്തിനശിച്ചത്. മുകളിലത്തെ നിലയില് അപ്പോള്സ്റ്ററിയുടെ സാധനങ്ങള് സൂക്ഷിച്ചിട്ടുണ്ട്. തൊട്ടടുത്തെ കടയില് നിന്നുള്ള തീപ്പൊരി പഞ്ഞിയില് വീണതാണ് തീപിടിത്തതിന് കാരണമെന്ന് ഫയര്ഫോഴ്സ് പറഞ്ഞു. തൊട്ടടുത്ത് വെല്ഡിംഗ് നടന്നിരുന്ന സ്ഥലത്ത് നിന്നും തീപ്പൊരി തെറിച്ചതാണ് തീപിടിത്തത്തിന് കാരണമെന്ന് അടുത്തുള്ള ഒരു തൊഴിലാളി പറഞ്ഞതായി ഫയര്ഫോഴ്സ് അധികൃതര് അറിയിച്ചു.
തുടര്ന്ന് പ്ലൈങ്ങിലേക്ക് തീ പടര്ന്നത് ആളിക്കത്താന് കാരണമായി.
വിവരം അറിഞ്ഞ് തൃക്കാക്കര ഫയര്സ്റ്റേഷനിലെ സ്റ്റേഷന് ഓഫീസര് വി.എസ് രഞ്ജിത്തിന്റെ നേതൃത്വത്തില് മൂന്ന് യൂണിറ്റ് വാഹനങ്ങള് എത്തിയാണ് തീയണച്ചത്.
രക്ഷാപ്രവര്ത്തനത്തിടെ ഫയര് ഫോഴ്സ് യൂണിറ്റില് നിന്നും വെള്ളം തൊട്ടടുത്തെ ബാറ്ററി കടയില് വീണതിനാല് അവിടത്തെ ഒട്ടേറെ ബാറ്ററികള് ഉപയോഗശൂന്യമായതായും ഫയര്ഫോഴ്സ് ഉദ്യോഗസ്ഥര് പറഞ്ഞു.
അപ്പോള്സ്റ്ററി കടയുടെ അശാസ്ത്രീയമായ നിര്മ്മാണം അപകടത്തിന് വഴിവെച്ചതായും ഉദ്യോഗസ്ഥര് കൂട്ടിച്ചേര്ത്തു.
കടയില് അപ്പോള്സ്റ്ററി ചെയ്യാന് കൊണ്ടുവന്ന ഉപകരണങ്ങള്, ഉരുപ്പടികള്, സ്പോഞ്ച്, റെക്സിന് തുണികള്, തുടങ്ങിയവയാണ് കത്തി നശിച്ചത്. മൂന്ന് ലക്ഷം രൂപ നാശനഷ്ടം ഉണ്ടായതായി കണക്കാക്കപ്പെടുന്നു.
പ്രതികരിക്കാൻ ഇവിടെ എഴുതുക: