പോലീസ് സ്‌റ്റേഷന് പുതിയ കെട്ടിടം നടപടികള്‍ ഇഴഞ്ഞു നീങ്ങുന്നു

Sunday 11 June 2017 10:45 pm IST

കാഞ്ഞിരപ്പള്ളി: റവന്യൂ വകുപ്പില്‍ നിന്നും സ്ഥലം വിട്ട് കിട്ടിയിട്ടും കാഞ്ഞിരപ്പള്ളി പോലീസ് സ്‌റ്റേഷന് പുതിയ കെട്ടിടം നിര്‍മ്മിക്കാനുള്ള നടപടികള്‍ ഇഴഞ്ഞു നീങ്ങുകയാണ്. ധനകാര്യ വകുപ്പില്‍ നിന്നും തുക അനുവദിച്ച് ലഭിക്കാത്തതാണ് കെട്ടിട നിര്‍മ്മാണം തുടങ്ങുന്നതിനുള്ള നിലവിലെ തടസ്സം. എസ്റ്റിമേറ്റടക്കം തയ്യാറാക്കി ധനകാര്യ വകുപ്പിന് ആഭ്യന്തര വകുപ്പ് ഫയല്‍ കൈമാറിയിട്ട് മൂന്ന് മാസങ്ങള്‍ കഴിഞ്ഞു. ഇതു വരെ അനുകൂല തീരുമാനമൊന്നും ഇക്കാര്യത്തില്‍ ധനകാര്യ വകുപ്പിന്റെ ഭാഗത്ത് നിന്ന് ഉണ്ടായിട്ടില്ല. ഒരു കോടി എണ്‍പത്തഞ്ച് ലക്ഷം രൂപയുടെ എസ്റ്റിമേറ്റാണ് ധനകാര്യ വകുപ്പിന്റെ പരിഗണനയ്ക്കായി നല്‍കിയിരിക്കുന്നത്. റവന്യൂ വകുപ്പില്‍ നിന്നും വിട്ട് കിട്ടിയ പതിനൊന്ന് സെന്റ് സ്ഥലത്ത് മൂന്ന് നില ബില്‍ഡിംഗ് പണികഴിപ്പിക്കാന്‍ ലക്ഷ്യമിട്ടാണ് എസ്റ്റിമേറ്റ് തയ്യാറാക്കിയിരിക്കുന്നത്.ആദ്യ നിലയില്‍ പോലിസ് സ്‌റ്റേഷനും രണ്ടാമത്തെ നിലയില്‍ സി.ഐ ഓഫീസും, ട്രാഫിക് യൂണിറ്റും, ഏറ്റവും മുകളില്‍ പോലീസുകാര്‍ക്ക് വിശ്രമസ്ഥലവും അടക്കം ക്രമീകരിക്കാന്‍ ലക്ഷ്യമിട്ടാണ് എസ്റ്റിമേറ്റ് തയ്യാറാക്കിയത്.നിലവില്‍ പോലീസ് സ്‌റ്റേഷന്‍ പ്രവര്‍ത്തിച്ച് കൊണ്ടിരിക്കുന്നതിന്റെ മുന്‍വശത്തായി റവന്യൂ വകുപ്പ് വിട്ട് നല്‍കിയ സ്ഥലത്ത് കെട്ടിടം നിര്‍മ്മിക്കാനാണ് തീരുമാനം. ധനകാര്യ വകുപ്പിന്റെ അനുമതി ലഭിച്ചാല്‍ കെട്ടിടം നിര്‍മ്മാണം തുടങ്ങാന്‍ പിന്നിട് തടസ്സങ്ങളൊന്നും ഉണ്ടാകാനിടയില്ല. പോലിസ് ഹെഡ്ക്വാര്‍ട്ടേഴ്‌സിലേക്ക് ഫണ്ടനുവദിച്ച് ലഭിക്കുന്നതോടെ ഇത് കെട്ടിടനിര്‍മ്മാണ ചുമതലയുള്ള പോലീസ് ഹൗസിംഗ് കണ്‍സ്ട്രക്ഷന്‍ കോര്‍പ്പറേഷന് കൈമാറും. കോര്‍പ്പറേഷനാകും ടെന്‍ണ്ടര്‍ വിളിച്ച് നിര്‍മ്മാണത്തിന് കരാര്‍ നല്‍കുക.ഇതിനിടെ റവന്യൂ വകുപ്പില്‍ നിന്നും ഇപ്പോള്‍ ലഭിച്ച സ്ഥലം അപര്യാപ്തമാണന്നും ഇവിടെയുള്ള നാല്പത് സെന്റ് സ്ഥലവും പോലീസ് സ്‌റ്റേഷനായി വിട്ട് നല്‍കണമെന്നും ആവശ്യപ്പെട്ട് പോലീസ് ഡിപ്പാര്‍ട്ട്‌മെന്റ് റവന്യൂ വകുപ്പിനെ സമീപിച്ചെങ്കിലും ഇക്കാര്യത്തിലും അനുകൂല തീരുമാനമുണ്ടായിട്ടില്ല. ജില്ലയില്‍ തൃക്കൊടിത്താനം കഴിഞ്ഞാല്‍ സ്വന്തമായി കെട്ടിടമില്ലാത്ത എക പോലിസ് സ്‌റ്റേഷനാണ് കാഞ്ഞിരപ്പള്ളി. നിലവില്‍ പഴയ താലൂക്കോഫീസ് കെട്ടിടത്തില്‍ പ്രവര്‍ത്തിക്കുന്ന കാഞ്ഞിരപ്പള്ളി പോലീസ് സ്‌റ്റേഷന്‍ മഴക്കാലമായതോടെ ചോര്‍ന്നൊലിക്കുകയാണ്. ഡ്യൂട്ടി കഴിഞ്ഞെത്തുന്ന പോലീസുകാര്‍ക്ക് വിശ്രമിക്കുവാനോ വസ്ത്രം മാറുവാനോ പോയിട്ട് ,പ്രാഥമികാവശ്യങ്ങള്‍ നിറവേറ്റാന്‍ പോലും മതിയായ സൗകര്യമില്ലാത്ത സ്ഥിതിയുമുണ്ട്.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.