ബാലുശ്ശേരി: പ്രധാനമന്ത്രി നരേന്ദ്രമോദി ഇന്നലെ ഉദ്ഘാടനം ചെയ്ത കിനാലൂരിലെ സിന്തറ്റിക് ട്രാക്കില് കന്നി ഓട്ടം നടത്തിയത് കേന്ദ്ര കായിക മന്ത്രി വിജയ് ഗോയലും ഒളിമ്പ്യന് പി.ടി ഉഷയും.
ഉദ്ഘാടന ചടങ്ങിനുശേഷം സിന്തറ്റിക് ട്രാക്ക് കാണാനായിരുന്നു കേന്ദ്രമന്ത്രി വിജയ് ഗോയലും സംസ്ഥാന കായിക മന്ത്രി ഏ.സി. മൊയ്തീനും എംപി എം.കെ രാഘവനും എംഎല്എ മാരായ ഒ രാജഗോപാലും പുരുഷന്കടലുണ്ടി തുടങ്ങിയ ജനപ്രതിനിധികളും കായിക താരങ്ങളും പി.ടി. ഉഷയോടൊപ്പം ട്രാക്കിലെത്തിയത്.
ട്രാക്ക് നടന്നുകാണാന് തുടങ്ങിയപ്പോള് കേന്ദ്ര കായിക മന്ത്രിയോട് ഉഷയുടെ ചോദ്യം ഒന്ന് ഓടിയാലോ, ഒകെ പറഞ്ഞ് ഉഷയോടൊപ്പം വിജയ്ഗോയലും കുതിച്ചു. ഒപ്പം കായിക താരങ്ങളും നാട്ടുകാരും പോലീസും മാധ്യമപ്രവര്ത്തകരും. കണ്ടു നിന്നവര്ക്ക്്് ആവേശം നല്കി ട്രാക്ക് ഒരു തവണ വലം വെച്ച് നാനൂറ് മീറ്റര് പൂര്ത്തിയാക്കിയശേഷമാണ് മന്ത്രി നിന്നത്. എന്നാല് തുടക്കത്തില് ഓടിയ പലരേയും അവസാനം കണ്ടില്ല. ഏ.സി മൊയ്തീന് ഉള്പ്പെടെയുള്ളവര് പിന്മാറി. വിജയ് ഗോയലും ഉഷയും നാന്നൂറ് മീറ്റര് പൂര്ത്തിയാക്കി.
എന്നിട്ടും മന്ത്രിക്ക് ക്ഷീണം ഒട്ടും ഉണ്ടായില്ല. ഉഷ സ്കൂളിലേയും സായി സെന്ററിലേയും കായിക താരങ്ങളോപ്പം ഫോട്ടോയ്ക്ക് പോസ് ചെയ്തുമാണ് മന്ത്രി മടങ്ങിയത്.
പ്രതികരിക്കാൻ ഇവിടെ എഴുതുക: