തൊടുപുഴ: നഗരമദ്ധ്യത്തില് ഹോട്ടലിന് തീപിടിച്ചു. ലക്ഷങ്ങളുടെ നാശനഷ്ടം. തലനാരിഴക്കാണ് വന് അപകടം ഒഴിവായത്. സംഭവത്തില് ആര്ക്കും പരിക്കില്ല. ഹോട്ടല് പ്രവര്ത്തിച്ചിരുന്നത് മൂന്ന് നില കെട്ടിടത്തില്.
ഇടുക്കി റോഡില് പുതിയ കെഎസ്ആര്ടിസി ബസ് ടെര്മിനലിന് സമീപമുള്ള അക്ഷയ ഭവന് എന്ന ഹോട്ടലിലാണ് തീ പിടുത്തമുണ്ടായത്. ഇന്നലെ വൈകിട്ട് ആറ് മണിയോടെയാണ് തീ പടരുന്നത് ഹോട്ടല് ജീവനക്കാര് കാണുന്നത്. ഹോട്ടലിന്റെ അടുക്കളയില് നിന്നുമാണ് തീ പടര്ന്നത്.
ഈ സമയം ഹോട്ടലിനുള്ളില് നിറയെ ആളുകളുണ്ടായിരുന്നു. തീയും പുകയും ഉയര്ന്നത് കണ്ട ആളുകള് പുറത്തേക്ക് ഇറങ്ങിയോടുകയായിരുന്നു. തീ വായു കടക്കാനുള്ള അറയിലൂടെ കട പ്രവര്ത്തിക്കുന്ന കെട്ടിടത്തിന്റെ മൂന്നാം നില വരെയെത്തി. ഓരോ നിലയുടേയും ജനലിനുള്ളില് നിന്നും തീ പുറത്തേക്ക് ആളിക്കത്തി. തീ പടരുന്നത് കണ്ട് തൊഴിലാളികള് കെടുത്താന് ശ്രമിച്ചെങ്കിലും സാധിച്ചില്ല.
സംഭവമറിഞ്ഞയുടന് സ്ഥലത്തെത്തിയ തൊടുപുഴ അഗ്നി ശമന സേനാ വിഭാഗമാണ് നിയന്ത്രിച്ചത്. രണ്ട് യൂണിറ്റ് വാഹനം സ്ഥലത്തെത്തിയിരുന്നു. കെട്ടിടത്തിന്റെ മൂന്നാം നിലയിലേത്തി എയര് ഹോളിലൂടെ വെള്ളം പമ്പ് ചെയ്താണ് തീ കെടുത്തിയത്. മൂന്ന് നിലകളുള്ള കെട്ടിടത്തില് പത്തിലധികം സ്ഥാപനങ്ങളാണ് പ്രവര്ത്തിക്കുന്നത്. ഗ്യാസ് കുറ്റികളെല്ലാം ഹോട്ടലിന് പുറത്ത് സൂക്ഷിച്ചതിനാല് വന് അപകടം ഒഴിവായി.
തീപിടുത്തമുണ്ടായ കെട്ടിടത്തിനിരുവശവും നിരവധി വ്യാപാര സ്ഥാപനങ്ങള് പ്രവര്ത്തിക്കുന്നുണ്ട്. ഗ്യാസ് ഉപയോഗിച്ച് പ്രവര്ത്തിക്കുന്ന അടുപ്പില് നിന്നുമാണ് തീപടര്ന്നത്. ഏകദേശം 5 ലക്ഷം രൂപയുടെ നാശനഷ്ടം ഉണ്ടായതായാണ് പ്രാഥമിക വിലയിരുത്തല്.
പ്രതികരിക്കാൻ ഇവിടെ എഴുതുക: