കോഴിക്കോട്: ജില്ലയിലെ വിനോദ സഞ്ചാര മേഖലയുടെ സമഗ്ര വികസനത്തിനായി പദ്ധതി തയ്യാറാക്കുന്നു. ഇതിന്റെ പ്രാരംഭ ഘട്ടമെന്ന നിലയില് ജില്ലാ ടൂറിസം പ്രൊമോഷന് കൗണ്സിലിന്റെ നേതൃത്വത്തില് ജില്ലാതല സെമിനാര് നടത്തും.
ബേപ്പൂര് പുലിമുട്ട് മുതല് താമരശ്ശേരി ചുരം വരെ നീളുന്ന ജില്ലയിലെ വിനോദസഞ്ചാര കേന്ദ്രങ്ങളില് അടിസ്ഥാന സൗകര്യങ്ങള് ഒരുക്കാന് പോലും അധികൃതര്ക്കാകുന്നില്ല. സ്വദേശികളും വിദേശികളുമായ നൂറുകണക്കിന് സഞ്ചാരികളാണ് വിനോദസഞ്ചാര കേന്ദ്രങ്ങളില് ദിനം പ്രതി എത്തുന്നത്. സൂചനാ ബോര്ഡുകള് സ്ഥാപിക്കാന് പോലും പലപ്പോഴും അധികൃതര്ക്കാകുന്നില്ല. വിനോദ സഞ്ചാരകേന്ദ്രങ്ങളില് സഞ്ചാരികളുടെ ആവശ്യം പരിഗണിച്ച് സൗകര്യങ്ങള് ഒരുക്കാറുണ്ടെങ്കിലും വേണ്ടത്ര മേല്നോട്ടം ലഭിക്കാത്തതിനാല് ഇതെല്ലാം അധികം വൈകാതെ ഉപയോഗ ശൂന്യമാകുകയാണ് പതിവ്. വിനോദസഞ്ചാര വികസനത്തിനായി കോടികള് മുടക്കുമ്പോഴും അതൊന്നും വേണ്ടത്ര പ്രയോജനപ്പെടാറില്ല. ഈ സാഹചര്യത്തിലാണ് സമഗ്ര വികസന പദ്ധതി തയ്യാറാക്കാന് ഒരുങ്ങുന്നത്.
ജൂലൈ ഒന്പതിന് കോഴിക്കോട് ഹോട്ടല് ഹൈസണ് ഹെറിറ്റേജിലാണ് സെമിനാര്. കോഴിക്കോടിന്റെ ചരിത്രവും പൈതൃകവും ടൂറിസം കേന്ദ്രങ്ങളും ഉല്പ്പന്നങ്ങളും, വിപണനവും പ്രചരണവും, ഉത്തരവാദിത്ത ടൂറിസം സാധ്യതകള് എന്നീ വിഷയങ്ങളില് വിദഗ്ധര് സെമിനാറില് വിഷയാവതരണം നടത്തും. സെമിനാറില് നിന്നും ഉരുത്തിരിയുന്ന ആശയങ്ങള് ഉള്പ്പെടുത്തി നിലവിലുള്ള വിനോദ സഞ്ചാര കേന്ദ്രങ്ങളുടെ വികസനവും പുതിയ കേന്ദ്രങ്ങളുടെ സാധ്യതകളും പരിശോധിച്ച് പദ്ധതികള്ക്ക് രൂപം നല്കും.
കോഴിക്കോടിന്റെ സാധ്യതകള്ക്കനുസരിച്ച് ടൂറിസം വ്യവസായ സംരംഭകരെ കണ്ടെത്തുക, ആവശ്യമായ പ്രോത്സാഹനങ്ങള് നല്കുക എന്നിവ സെമിനാറിന്റെ ഭാഗമായി ആവിഷ്കരിക്കുന്ന പദ്ധതികളില് ഉള്പ്പെടും.
വാസ്കോഡഗാമയുടെ ആഗമനം മുതല് വൈദേശികമായി നിലനിന്നിരുന്ന വ്യാപാര വാണിജ്യ ബന്ധങ്ങളും, കോഴിക്കോടിന്റെ ചരിത്രവും സംസ്ക്കാരവും വര്ത്തമാനകാല വിനോദ സഞ്ചാര മേഖലയ്ക്ക് ഗുണം ചെയ്യുന്ന രീതിയിലുള്ള പദ്ധതികളുടെ രൂപപ്പെടുത്തലും സെമിനാറിന്റെ ഭാഗമാകും.
പ്രാദേശിക ജനതയ്ക്ക് വിനോദ സഞ്ചാര മേഖലയിലുള്ള പങ്ക് ഉറപ്പിക്കുന്ന രീതിയിലുള്ള പദ്ധതികളുടെ ആവിഷ്ക്കരണവും സെമിനാറിലുണ്ടാവും.വിനോദ സഞ്ചാര മേഖലയുമായി ബന്ധപ്പെടുന്ന വ്യവസായ സംരംഭകര്, പഞ്ചായത്ത് തലം മുതല് മുകളിലേക്കുള്ള ജനപ്രതിനിധികള്, വിവിധ മേഖലകളിലെ വിദഗ്ധര്, വ്യാപാര വ്യവസായ സംഘടനാ പ്രതിനിധികള്, വിവിധ വകുപ്പുകളിലെ ഉദ്യോഗസ്ഥര് എന്നിവരാണ് സെമിനാറില് പങ്കെടുക്കുന്നത്. രജിസ്ട്രേഷന് ഫോണ്: 9961702 406,ംംം. റുേരസീ്വവശസ ീറല.രീാ.
പ്രതികരിക്കാൻ ഇവിടെ എഴുതുക: