ഡെര്ബി: ചാമ്പ്യന്സ് ട്രോഫി ക്രിക്കറ്റില് പുരുഷ ടീമിനു നേരിട്ട ദുരന്തം വനിതാ ലോകകപ്പില് ടീം ഇന്ത്യയെ കാത്തിരിക്കുന്നുവോ? ചാമ്പ്യന്ഷിപ്പില് ദുര്ബലരായ ശ്രീലങ്കയെ ഇന്നു നേരിടുമ്പോള് മിതാലി രാജിനെയും കൂട്ടരെയും ഈ ഓര്മകള് വേട്ടയാടാതിരിക്കില്ല.
തുടരെ നാലാം ജയം നേടി സെമി ലക്ഷ്യമിടുന്ന ടീമിന് ലങ്ക എതിരാളികളേ അല്ല. മൂന്നു കളിയും തോറ്റ ലങ്കയെ തുരത്താമെന്ന ആത്മവിശ്വാസത്തിലാണ് മിതാലിയുടെ സംഘം. ഡെര്ബിയിലാണ് പോരാട്ടം.
ഓള്റൗണ്ട് മികവുമായാണ് ആദ്യ മൂന്നു കളികളും ഇന്ത്യ ജയിച്ചു കയറിയത്. കരുത്തരായ ഇംഗ്ലണ്ട്, വെസ്റ്റിന്ഡീസ്, പാക്കിസ്ഥാന് ടീമുകള് മിതാലിയുടെ ചുണക്കുട്ടികളുടെ ചൂടറിഞ്ഞു. ബാറ്റിങ്ങിലും ബൗളിങ്ങിലും ഒന്നുപോലെ തിളങ്ങുന്നു ടീം. ബാറ്റിങ് പൊളിഞ്ഞാല് ബൗളര്മാര് ആ ദൗത്യം ഏറ്റെടുക്കുന്നു. രണ്ടാമത്തെ കളിയില് വിന്ഡീസിനെതിരെ ഇതു കണ്ടതാണ്.
പൂനം റൗത്തും സ്മൃതി മന്ധാനയും നല്കുന്ന മിന്നും തുടക്കം ദീപ്തി ശര്മ, മിതാലി, ഹര്മന്പ്രീത് കൗര്, മോന മേശ്രം, സുഷമ വര്മ എന്നിവര് തുടരുന്നു. മുന് നായിക ഝുലന് ഗോസ്വാമിയുടെ നേതൃത്വത്തില് ബൗളര്മാരും തകര്ത്താടുന്നു. ഏകത ബിഷ്ട്, ദീപ്തി ശര്മ, മാന്സി ജോഷി, പൂനം യാദവ്, ഹര്മന്പ്രീത് കൗര്, ശിഖ പാണ്ഡെ എന്നിവരുണ്ട് ഝുലനു തുണയായി. ആദ്യ രണ്ടു കളിയിലുണ്ടായിരുന്ന ശിഖ പാക്കിസ്ഥാനെതിരെ കളിച്ചില്ല. വിജയം തുടരുന്ന ടീമിനെ നിലനിര്ത്താന് സാധ്യത.
ന്യൂസിലന്ഡ്, ഓസ്ട്രേലിയ, ഇംഗ്ലണ്ട് ടീമുകളോട് തോറ്റു ലങ്ക. ആദ്യത്തേതില് ന്യൂസിലന്ഡിനോട് തകര്ന്നടിഞ്ഞ ലങ്ക, രണ്ടാമത്തേതില് ചാമരി അട്ടപ്പട്ടുവിന്റെ തകര്പ്പന് സെഞ്ചുറിയുടെ കരുത്തില് പൊരുതിയെങ്കിലും ഓസീസിനെ തളയ്ക്കാനായില്ല. കഴിഞ്ഞ കൡയില് ഇംഗ്ലണ്ടിനോടും പൊരുതാതെ വീണു. ബൗളര്മാര് കരുത്തു കാട്ടാത്തത് മരതക ദ്വീപുകാര്ക്ക് തിരിച്ചടി. അട്ടപ്പട്ടുവൊഴികെയുള്ള ബാറ്റ്സ്മാന്മാരും നിരാശപ്പെടുത്തുന്നു.
ടീം ഇവരില് നിന്ന്: ഇന്ത്യ-മിതാലി രാജ് (നായിക), ഏകത ബിഷ്ട്, രാജേശ്വരി ഗെയ്ക്ക്വാദ്, ഝുലന് ഗോസ്വാമി, മാന്സി ജോഷി, ഹര്മന്പ്രീത് കൗര്, വേദ കൃഷ്ണമൂര്ത്തി, സ്മൃതി മന്ധാന, മോന മേശ്രം, ശിഖ പാണ്ഡെ, പൂനം യാദവ്, നുസ്ഹത്ത് പര്വീന്, പൂനം റൗത്ത്, ദീപ്തി ശര്മ, സുഷമ വര്മ.
ശ്രീലങ്ക-ഇനോക രണവീര (നായിക), ചന്ദിമ ഗുണരത്നെ, നിപുനി ഹന്സിക, ചാമരി അട്ടപ്പട്ടു, അമ കാഞ്ചന, എഷനി ലോകുസുരിയഗെ, ചമരി പോല്ഗംപോല, ഹര്ഷിത മാദവി, ഹസിനി പെരേര, ഉദേശിക പ്രബോധനി, ഒഷാദി രണസിംഗെ, ശശികല സിരിവര്ധനെ, ദിലാനി മന്ദോര, പ്രസാദിനി വീരകോടി, ശ്രിപാലി വീരകോടി.
പ്രതികരിക്കാൻ ഇവിടെ എഴുതുക: