കോട്ടയം: സിപിഎം അക്രമത്തില് പ്രതിഷേധിച്ച് ബിജെ പി പുതുപ്പള്ളി നിയോജക മണ്ഡലത്തില് നടത്തിയ ഹര്ത്താല് പൂര്ണ്ണം. ഗ്രാമീണ മേഖലകളില്വരെ കടകമ്പോളങ്ങള് അടഞ്ഞുകിടന്നു. ദീര്ഘദൂര ബസ്സുകള് ഒഴികെ വാഹനങ്ങളൊന്നും നിരത്തിലിറങ്ങിയില്ല. സമാധനപരമായിട്ടാണ് ഹര്ത്താല് നടന്നത്.
വിവിധ പഞ്ചായത്ത് കേന്ദ്രങ്ങളില് പ്രവര്ത്തകര് പ്രതിഷേധ പ്രകടനം നടത്തി. ജില്ലാ പ്രസിഡന്റ് എന്. ഹരി, ജില്ലാ ഭാരവാഹികളായ കെ.പി. ഭുവനേശ്, പി. സുനില്കുമാര്, നീറിക്കാട് കൃഷ്ണകുമാര്, നിയോജകമണ്ഡലം പ്രസിഡന്റ് എ.ജി. ഹരിപ്രസാദ് എന്നിവര് വിവിധ കേന്ദ്രങ്ങളില് പ്രതിഷേധ യോഗങ്ങളില് പ്രസംഗിച്ചു. ഭരണത്തിന്റെ തണലില് ജില്ലയുടെ പല ഭാഗങ്ങളിലും സിപിഎം ആക്രമണം അഴിച്ചുവിടുകയാണെന്ന് നേതാക്കള് കുറ്റപ്പെടുത്തി. പ്രതികളെ സംരക്ഷിക്കുന്ന പോലീസിന്റെ നടപടി അവസാനിപ്പിക്കാന് തയ്യാറായില്ലെങ്കില് ശക്തമായ പ്രക്ഷോഭങ്ങള്ക്ക് നേതൃത്വം നല്കുമെന്നും ഇവര് പറഞ്ഞു.
വാകത്താനം, ഞാലിയാകുഴി നഗരങ്ങളില് നടന്ന പ്രതിഷേധ പ്രകടനത്തിന് ഒബിസി മോര്ച്ച ജില്ലാ സെക്രട്ടറി അനില്കുമാര് മുള്ളനളയ്ക്കല്, പഞ്ചായത്ത് പ്രസിഡന്റ് സജി തോമസ്, പഞ്ചായത്ത് വൈസ്പ്രസിഡന്റ് തമ്പാന് കുന്നക്കാട് എന്നിവര് നേതൃത്വം നല്കി. ബിജെപി പ്രവര്ത്തകരെ തെരഞ്ഞുപിടിച്ച് ആക്രമിക്കുന്നതില് നേതാക്കള് പ്രതിഷേധിച്ചു. പാമ്പാടിയില് നടന്ന പ്രതിഷേധ പ്രകടനത്തിന് പഞ്ചായത്ത് കമ്മിറ്റി പ്രസിഡന്റ് കെ. ഹരികൃഷ്ണന് നേതൃത്വം നല്കി.
പ്രതികരിക്കാൻ ഇവിടെ എഴുതുക: