കണ്ണൂര്: കണ്ണൂര് കോര്പ്പറേഷന് പരിധിയിലെ വഴിയോരകച്ചവടക്കാരെ ഒഴിപ്പിച്ച നടപടി തിരുത്തണമെന്നും വഴിയോരകച്ചവടം പൂര്വ്വസ്ഥിതിയില് സ്ഥാപിച്ചുതരണമെന്നും നാഷണല് ഫുട്പാത്ത് ഉന്തുവണ്ടി പീടിക തൊഴിലാളി യൂനിയന് (ഐഎന്ടിയുസി) ആവശ്യപ്പെട്ടു. തൊഴിലാളികള് അനുഭവിക്കുന്ന പ്രശ്നങ്ങള് ഉന്നയിക്കാനും അവയ്ക്ക് പരിഹാരം കാണാനും ജില്ലയില് സ്ട്രീറ്റ് വെന്റേഴ്സ് കമ്മറ്റി യോഗം നടത്തണമെന്നും ഭാരവാഹികള് വാര്ത്താസമ്മേളനത്തില് ആവശ്യപ്പെട്ടു.
ജില്ലാഭരണകൂടവും കോര്പ്പറേഷനും വഴിയോരകച്ചവട തൊഴിലാളികളെ നിരന്തരമായി ദ്രോഹിക്കുകയാണ്.
തൊഴിലാളികള്ക്കോ സംഘടനാ നേതാക്കള്ക്കോ യാതൊരു അറിയിപ്പും നല്കാതെയാണ് കച്ചവടം ചെയ്യുന്ന ഷെഡ്ഡുകളും മറ്റും നീക്കം ചെയ്തത്. വഴിയോരകച്ചവടക്കാരെ സംരക്ഷിക്കണമെന്ന നിയമം തന്നെ നിലനില്ക്കെ ഇത്തരത്തില് പാവപ്പെട്ട കച്ചവടക്കാരെ ദ്രോഹിക്കുന്ന നടപടികള് അധികൃതര് സ്വീകരിക്കുന്നത് ഖേദകരമാണെന്നും ഭാരവാഹികള് പറഞ്ഞു. വാര്ത്താസമ്മേളനത്തില് യൂണിയന് സംസ്ഥാന ജനറല് സെക്രട്ടറി കെ.കെ.രാജീവ്, ജില്ലാ പ്രസിഡന്റ് വി.വി.ശശീന്ദ്രന്, എം.പ്രഭാകരന്, ഫൈസല് മാലോട്ട് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: