പയ്യന്നൂര്: പയ്യന്നൂര് മേഖലയില് വ്യാപക സിപിഎം അക്രമം. ആര്എസ്എസ് പയ്യന്നൂര് ജില്ലാ കാര്യാലയം ,ബിജെപി പയ്യന്നൂര് നിയോജക മണ്ഡലം ഓഫീസ് എന്നിവയും സംഘപരിവാര് പ്രവര്ത്തകരുടെ നിരവധി വീടുകളും തകര്ത്തു. ബിജെപി ഓഫീസിനും ആര്എസ്എസ് കാര്യാലയത്തിനും നേരെ ബോംബെറ് നടത്തുകയും ചെയ്തു. ഇന്നലെ വൈകുന്നേരം കുന്നരുവില് നടന്ന സിപിഎം പ്രവര്ത്തകന് ധനരാജിന്റെ അനുസ്മരണ പരിപാടിയില് പങ്കെടുത്ത സിപിഎം പ്രവര്ത്തകരുടെ നേതൃത്വത്തിലാണ് പയ്യന്നൂരിന്റെ വിവിധ ഭാഗങ്ങളില് വ്യാപകമായ അക്രമം അഴിച്ചു വിട്ടത്.
സംഘപരിവാര് പ്രവര്ത്തകരുടെ സ്ഥാപനങ്ങള്,വീടുകള് ,വാഹനങ്ങള് തുടങ്ങി കണ്ണില്കണ്ടതെല്ലാം അക്രമി സംഘം അടിച്ചു തകര്ത്തു. വീടുകള്ക്കും ബിജെപി ഓഫീസിനും നേരെ ബോംബേറ് നടത്തുകയും ചെയ്തു.
ആര്എസ്എസ് പയ്യന്നൂര് ജില്ലാ കാര്യവാഹ് പി.രാജേഷ് കുമാറിന്റെ പയ്യന്നൂര് കാരയിലുളള വീടിനും വീട്ടില് നിര്ത്തിയിട്ട വാഹനത്തിനും നേരെ ബോംബെറിയുകയും വീടും വാഹനവും അഗ്നിക്കിരയാക്കുകയും ചെയ്തു. ബിജെപി പയ്യന്നൂര് മണ്ഡലം സെക്രട്ടറി ബാലകൃഷ്ണന്റെ വീടും ബോംബെറിഞ്ഞും തീവെച്ചും സിപിഎം സംഘം നശിപ്പിച്ചു.
നിരവധി വീടുകളും വാഹനങ്ങളും പയ്യന്നൂര് മേഖലയില് അക്രമിക്കപ്പെട്ടു. അക്ഷരാര്ത്ഥത്തില് സിപിഎം സംഘം മണിക്കൂറുകളോളം പയ്യന്നൂരിലും പരിസര പ്രദേശങ്ങളിലും അഴിഞ്ഞാടുകയായിരുന്നു. ധനരാജ് അനുസ്മരണത്തില് പങ്കെടുക്കാനെത്തിയ സിപിഎം പ്രവര്ത്തകരെ ആര്എസ്എസ് പ്രവര്ത്തകര് ബോംബെറിഞ്ഞുവെന്ന വ്യാജ പ്രചാരണം അഴിച്ചുവിട്ടായിരുന്നു സിപിഎം അഴിഞ്ഞാട്ടം. ഇന്ന് സംഘപരിവാര് സംഘടനകളുടെ നേതൃത്വത്തില് പയ്യന്നൂരില് നടക്കേണ്ട ബിഎംഎസ് മേഖല പ്രസിഡണ്ടായിരുന്ന സി.കെ.രാമചന്ദ്രന് അനുസ്മരണ പരിപാടി അലങ്കോലപ്പെടുത്താനുളള നീക്കത്തിന്റെ ഭാഗമാണ് അക്രമമെന്നാണ് സൂചന.
പ്രതികരിക്കാൻ ഇവിടെ എഴുതുക: