തിരുവനന്തപുരം: നഷ്ടത്തില് നിന്ന് നഷ്ടത്തിലേക്ക് മൂക്കുകുത്തുന്ന കെഎസ്ആര്ടിസിയില്, പണിയെടുക്കാത്ത കറങ്ങി നടക്കുന്ന ഇടത് യൂണിയന് നേതാക്കളെ എംഡി രാജമാണിക്യം കൈയോടെ പിടികൂടിത്തുടങ്ങി. താക്കീതു നല്കിയും സ്ഥലം മാറ്റിയും നടപടി ശക്തമാക്കി.
ജോലി ചെയ്യാതെ കറങ്ങി നടന്നവരെ പിടികൂടി താക്കീതു നല്കി തസ്തികകളില് മാറ്റി നിയമിച്ചു. കൂടാതെ സര്വ്വീസില് കയറി ഇതുവരെയും സ്ഥലം മാറാതിരുന്നവരെ തെരഞ്ഞുപിടിച്ച് സ്ഥലം മാറ്റുക കൂടി ചെയ്തതോടെ കെഎസ്ആര്ടിഇഎ യൂണിയന് നേതാക്കളുടെ കണ്ണിലെ കരടായി എംഡി മാറി.
എംഡിക്കെതിരെ പരാതിയുമായി വകുപ്പ് മന്ത്രിയെ സമീപിച്ചെങ്കിലും കൈമലര്ത്തി. തുടര്ന്ന് മൂഖ്യമന്ത്രിയെ സമീപിച്ചെങ്കിലും യൂണിയന് നേതാക്കള്ക്ക് അനുകൂല നിലപാട് സ്വീകരിച്ചില്ല. ഇതേ തുടര്ന്ന് ചീഫ് ഓഫീസില് ഉള്പ്പെടെ കെഎസ്ആര്ടിഇഎയുടെ നേതൃത്വത്തില് പ്രതിഷേധ സമരവുമായി ഒരുവിഭാഗം രംഗത്തെത്തി. ഇതോടെ യൂണിയന് നേതാവായ വൈക്കം വിശ്വന് പ്രശ്നത്തില് ഇടപെട്ട് മുഖ്യമന്ത്രിയുമായി സംസാരിച്ച് ധാരണയായി. തീരുമാനങ്ങള് നടപ്പിലാക്കുമ്പോള് വൈക്കം വിശ്വനുമായി എംഡി കൂടിയാലോചന നടത്തണമെന്ന് മുഖ്യമന്ത്രി നിര്ദ്ദേശം നല്കി.
ഇതിനുശേഷം എംഡി നടപ്പിലാക്കിയ ഭരണപരിഷ്ക്കാരങ്ങള് വൈക്കം വിശ്വനുമായി കൂടിയാലോചിച്ചിരുന്നു. എന്നാല് സിഐടിയു നേതൃത്വത്തിലുള്ള കോര്പ്പറേഷന് ബോര്ഡ് ഇതിനെതിരെ രംഗത്ത് വന്നു. ബോര്ഡില് എടുക്കുന്ന തീരുമാനങ്ങള് നടപ്പിലാക്കണം എന്ന നിലപാടിലായി ബോര്ഡ് അംഗങ്ങള്. ഇതിനിടയില് എംപാനല്കാരെയും കരാര് ജിവനക്കാരെയും പിരിച്ചുവിടാന് എംഡി നിര്ദ്ദേശം നല്കി. പ്രതിഷേധവുമായി കെഎസ്ആര്ടിഇഎ രംഗത്തുവന്നെങ്കിലും വൈക്കം വിശ്വന് ഇടപെടാന് കൂട്ടാക്കിയില്ല. അടുത്തത് ഡ്യൂട്ടി പരിഷ്കാരമായിരുന്നു. ഡബിള് ഡ്യൂട്ടികള് പരിഷ്ക്കരിച്ച് കഴിവതും സിംഗിള് ഡ്യൂട്ടിയാക്കി.
കഴിഞ്ഞ സര്ക്കാരിന്റെ കാലത്ത് കോര്പ്പറേഷനില് നിരവധി പ്രതിഷേധ പരിപാടികള് നടത്തിയവര് ഭരണത്തില് കയറിയപ്പോള് ജീവനക്കാരുടെ അവകാശങ്ങള് സംരക്ഷിക്കുന്നില്ലെന്ന് ആരോപിച്ച് യൂണിയനില് നിന്ന് കൊഴിഞ്ഞുപോക്ക് വര്ദ്ധിച്ചു. കെഎസ്ആര്ടിഇഎ കടുത്ത പ്രതിരോധത്തിലായതോടെ യൂണിയന് നേതാക്കളുടെ ആവശ്യപ്രകാരം എംഡിക്കെതിരെ പ്രതിഷേധപരിപാടികള് സംഘടിപ്പിക്കാന് വൈക്കം വിശ്വന് അനുമതി നല്കി.
ഇതിന്റെ അടിസ്ഥാനത്തില് ഇന്നലെ സെക്രട്ടേറിയറ്റ് മാര്ച്ച് നടത്തി. യോഗത്തില് അദ്ധ്യക്ഷത വഹിച്ച വൈക്കം വിശ്വന് എംഡി എംപാനല് ജോലിയാണ് ചെയ്യുന്നതെന്നും ഉന്നതനായ നടന് ദിലീപിന്റെ അവസ്ഥ മറക്കരുതെന്നും പറഞ്ഞു.
പ്രതികരിക്കാൻ ഇവിടെ എഴുതുക: