തിരുവനന്തപുരം: തലസ്ഥാനം ആസ്ഥാനമായി ആരംഭിച്ച പുതിയ പ്രൊഫഷണല് ഫുട്ബോള് ക്ലബ്ബ് എവര്ഗ്രീനിന്റെ ലോഗോ പ്രകാശനം ചെയ്തു. സിംഗപ്പൂരിലെ മൈ സ്പോര്ട്സ് മാനേജ്മെന്റാണ് എവര്ഗ്രീന് എഫ്സി എന്ന പുതിയ ക്ലബ്ബിന്റെ ഉടമസ്ഥര്. ഈ സീസണിലെ ഐ ലീഗില് കളിക്കാന് ലക്ഷ്യമിട്ടാണ് ടീം രൂപീകരണം അടക്കമുള്ളവ നടക്കുന്നത്.
പൂര്ണ്ണമായും വിദേശ ഉടസ്ഥതതയിലുള്ള ഇന്ത്യയിലെ തന്നെ ആദ്യ പ്രൊഫഷണല് ഫുട്ബോള് ടീമാണ് എവര്ഗ്രീന്. യൂറോപ്പില് നിന്നുള്ളവരായിരിക്കും പരീശീലനം നല്കുക. യൂറോപ്പില് നിന്നുള്ള കളിക്കാരും ഉണ്ടാകുമെങ്കിലും കേരളത്തില് നിന്നുള്ള താരങ്ങള്ക്കാവും മുന്ഗണന. ഈ വര്ഷം 30 കളിക്കാരെ തെരഞ്ഞെടുക്കും. ഇത് ആഗസ്റ്റ് പത്തിന് മുമ്പ് പൂര്ത്തിയാകും.
കേരളത്തില് നിന്നുള്ള കളിക്കാര്ക്ക് പ്രൊഫഷണല് പരീശീലനം നല്കി വളര്ത്തിയെടുക്കാനായി ഫുട്ബോള് അക്കാഡമി സ്ഥാപിക്കാനും എവര്ഗ്രീന് ലക്ഷ്യമിടുന്നു. കേരളത്തിലെ സ്കൂളുകള് വഴി വിദ്യാര്ത്ഥികളെ ഫുട്ബോളിലേക്ക് എത്തിക്കാനും ക്ലബ് ലക്ഷ്യമിടുന്നുണ്ട്. വനിത ഫുട്ബോള് ടീമും സജ്ജമാക്കും. ഗ്രീന്ഫീല്ഡ് സ്റ്റേഡിയം (കാര്യവട്ടം സ്പോര്ട്സ് ഹബ്ബ്) ആണ് ഹോം സ്റ്റേഡിയമെന്ന് മൈ സ്പോര്ട്സ് സിഇഒ ജിറി സെര്ണി പറഞ്ഞു.
കേരളത്തിന്റെ ഔദ്യോഗിക പക്ഷിയായ വേഴാമ്പലാണ് ടീമിന്റെ ലോഗോയിലുള്ളത്. മൈ സ്പോര്ട്സ് ഡയറക്ടര് സിജിന്, ഫുട്ബോള് അസോസിയേഷന് ജില്ലാ സെക്രട്ടറി ഗീവര്ഗ്ഗീസ്, വൈസ് പ്രസിഡന്റ് ലെഡ്ഗര് ബാവ എന്നിവര് പരിപാടിയില് പങ്കെടുത്തു.
പ്രതികരിക്കാൻ ഇവിടെ എഴുതുക: