കണ്ണൂര്: ബാലപീഡനത്തിനെതിരെ കുടുംബജാഗ്രത എന്ന പേരില് ബോധവത്കരണ പരിപാടി സംഘടിപ്പിക്കാന് ജില്ലാ ശിശുക്ഷേമസമിതി യോഗത്തില് തീരുമാനം. സമൂഹത്തില് കുട്ടികള് അനുഭവിക്കുന്ന മാനസിക ശാരീരിക പീഡകള്ക്കെതിരെ ശക്തമായ താക്കീത് നല്കുകയാണ് പരിപാടിയിലൂടെ ലക്ഷ്യമിടുന്നത്. എസ്.എസ്.എ, സ്കൂള് പി.ടി.എ, മദര് പി.ടി.എ, തദ്ദേശ സ്ഥാപനങ്ങള് എന്നിവയുടെ സഹകരണത്തോടെ ആദ്യം ജില്ലാ തലത്തിലും പിന്നീട് ഓരോ പ്രദേശങ്ങള് കേന്ദ്രീകരിച്ചും ബോധവത്കരണ പരിപാടി നടപ്പാക്കും. ആദിവാസി മേഖലയിലെ കുട്ടികള്ക്കായി ഓണക്കാലത്ത് ദ്വിദിന ക്യാമ്പ് സംഘടിപ്പിക്കാനും ഗാന്ധിജയന്തി ദിനത്തില് സാഹിത്യരചനാ ക്യാമ്പ് സംഘടിപ്പിക്കാനും എ.ഡി.എം ഇ മുഹമ്മദ് യൂസഫിന്റെ അധ്യക്ഷതയില് ചേര്ന്ന യോഗത്തില് തീരുമാനമായി.
കുടുംബശ്രീയുമായി ചേര്ന്നാണ് ഓണ അവധിക്കാല ക്യാമ്പ് സംഘടിപ്പിക്കുക. പിന്നോക്കം നില്ക്കുന്ന ആദിവാസി മേഖലകള് കണ്ടെത്തി ഒന്നിലധികം കേന്ദ്രങ്ങളില് ക്യാമ്പ് സംഘടിപ്പിക്കും. സാഹിത്യ അക്കാദമിയുമായി ചേര്ന്ന് ഗാന്ധി സ്മൃതിക്കൊപ്പം കുട്ടികളുടെ രചനാ പാടവം കണ്ടെത്തുന്നതിനുള്ള വിവിധ പരിപാടികളാണ് ഗാന്ധിജയന്തി ദിനത്തില് സംഘടിപ്പിക്കുക. തീരദേശമേഖലയിലെ കുട്ടികളും തടവുകാരുടെ മക്കളും ഉള്പ്പെടെ പാര്ശ്വവത്കരിക്കപ്പെടുന്ന കുട്ടികളുടെ ക്ഷേമത്തിനായി വിവിധ പദ്ധതികള് നടപ്പാക്കാനും ജില്ലയിലെ 13 ക്രഷുകളുടെ പ്രവര്ത്തനം കാര്യക്ഷമമാക്കാനും യോഗത്തില് തീരുമാനമായി. ജില്ലാ ശിശുക്ഷേമ സമിതി സെക്രട്ടറി എം.ശ്രീധരന് റിപ്പോര്ട്ട് അവതരിപ്പിച്ചു. സാമൂഹ്യനീതി ഓഫീസര് എം.എം മോഹന്ദാസ്, ശിശുക്ഷേമസമിതി ഭാരവാഹികള് എന്നിവര് യോഗത്തില് പങ്കെടുത്തു.
പ്രതികരിക്കാൻ ഇവിടെ എഴുതുക: