കണ്ണൂര്: നെല്വയല്-തണ്ണീര്ത്തട നിയമത്തിന്റെ അടിസ്ഥാനത്തില് തയ്യാറാക്കിയ ഡാറ്റാബാങ്കുമായി ബന്ധപ്പെട്ട് പരാതികളുള്ളവര് കൃഷി ഓഫീസര്ക്ക് അപേക്ഷ നല്കണമെന്ന് ജില്ലാ കലക്ടര് മീര് മുഹമ്മദലി ജില്ലാ വികസന സമിതി യോഗത്തെ അറിയിച്ചു. ഇതുമായി ബന്ധപ്പെട്ട് സി കൃഷ്ണന് എം.എല്.എ ഉന്നയിച്ച വിഷയത്തില് പ്രതികരിക്കുകയായിരുന്നു അദ്ദേഹം.
തെറ്റായി ഡാറ്റാബാങ്കില് ഉള്പ്പെട്ട സ്ഥലത്തിന്റെ ഉടമകള്, നിയമത്തില് സര്ക്കാര് വരുത്തിയ ഭേദഗതിയുടെ പശ്ചാത്തലത്തില്, ആഗസ്ത് 30നകം ബന്ധപ്പെട്ട കൃഷി ഓഫീസര്ക്ക് നിശ്ചിത മാതൃകയില് അപേക്ഷ നല്കണം. 100 രൂപ കോര്ട്ട് ഫീ സ്റ്റാമ്പ് പതിച്ച് ഈ വര്ഷത്തെ നികുതി ശീട്ട് സഹിതമാണ് അപേക്ഷിക്കേണ്ടത്.
പരാതിയുള്ള സ്ഥലങ്ങള് പരിശോധിച്ച് ഉപഗ്രഹചിത്രങ്ങളുടെ സഹായത്തോടെ ഭൂമിയുടെ 2008നു മുമ്പുള്ള സ്ഥിതി കണ്ടെത്തി ആവശ്യമായ ഭേദഗതികള് വരുത്താന് പ്രാദേശിക നിരീക്ഷണ സമിതികള്ക്ക് അധികാരമുണ്ടായിരിക്കുമെന്ന് ജില്ലാ കലക്ടര് അറിയിച്ചു. ഇതോടൊപ്പം ഏതെങ്കിലും നെല്വയല്-തണ്ണീര്ത്തട ഭൂമി ഡാറ്റാബാങ്കില് ഉള്പ്പെടേണ്ടതായിട്ടുണ്ടെങ്കില് അക്കാര്യവും പരിശോധിച്ച് വെവ്വേറെ പട്ടിക തയ്യാറാക്കണമെന്നും ജില്ലാ കലക്ടര് നിര്ദേശം നല്കി.
ഭൂവുടമകളില് നിന്ന് നികുതി സ്വീകരിക്കാത്തതുമായി ബന്ധപ്പെട്ട് എംഎല്എ ഉന്നയിച്ച വിഷയങ്ങളില് ഒരു മാസത്തിനകം നടപടി സ്വീകരിക്കാന് ബന്ധപ്പെട്ടവര്ക്ക് ജില്ലാ കലക്ടര് നിര്ദേശം നല്കി.
കണ്ണൂര് കെഎസ്ആര്ടിസി ബസ് സ്റ്റേഷന്റെ മുഖച്ഛായ മാറ്റി ആധുനിക വല്ക്കരിക്കുമെന്ന് പി.കെ.ശ്രീമതി എംപി അറിയിച്ചു. യാത്രക്കാര്ക്ക് വിശാലമായ കാത്തിരിപ്പ് കേന്ദ്രം, ടോയിലറ്റ് സംവിധാനം ഉള്പ്പെടെ സജ്ജമാക്കും. എംപി ഫണ്ടില് നിന്ന് ഇതിനു വേണ്ടിയുള്ള തുക വിലയിരുത്തും. പദ്ധതി എത്രയും വേഗം നടപ്പാക്കുന്നതിന് ജില്ലാ കലക്ടര് മേല്നോട്ടം വഹിക്കുമെന്നും എംപി പറഞ്ഞു. പയ്യാമ്പലം പാര്ക്കിലെ സ്മൃതി മണ്ഡപവും പരിസരവും മാലിന്യമുക്തമാക്കുന്നതിന്റെ ഭാഗമായി നേരത്തേ തീരുമാനിച്ച പ്രകാരം രണ്ട് ശുചീകരണ തൊഴിലാളികളെ ദിവസവേതനാടിസ്ഥാനത്തില് ഉടന് നിയമിക്കണമെന്ന് എംപി പറഞ്ഞു.
ഉപയോഗശൂന്യമായ കാവുമ്പായി-കരിവെള്ളൂര് റോഡ് കേന്ദ്ര റോഡ് ഫണ്ടില് ഉള്പ്പെടുത്തി വീണ്ടെടുക്കുന്നതിന് വിശദമായ പദ്ധതി രേഖ തയ്യാറാക്കാന് ദേശീയപാതാ വിഭാഗത്തിന് എംപി നിര്ദേശം നല്കി.
കലക്ടറേറ്റ് കോണ്ഫറന്സ് ഹാളില് ചേര്ന്ന വികസന സമിതി യോഗത്തില് സബ് കലക്ടര് എസ്.ചന്ദ്രശേഖര്, ജില്ലാ പ്ലാനിംഗ് ഓഫീസര് കെ.പ്രകാശന് തുടങ്ങിയവര് സംസാരിച്ചു.
പ്രതികരിക്കാൻ ഇവിടെ എഴുതുക: