തൃശൂര്: കേരള കലാമണ്ഡലം കല്പിത സര്വ്വകലാശാലയില് സംസ്കൃത ദിനാചരണത്തോടനുബന്ധിച്ച് ആഗസ്റ്റ് 7 മുതല് 11 വരെ കൂത്തമ്പലത്തില് ബി.എ. വിദ്യാര്ത്ഥികള്ക്ക് നാട്യശാസ്ത്ര ക്ലാസ്സുകളും സംസ്കൃത ദിനാചരണവും പണ്ഡിത സമാദരണവും സംഘടിപ്പിക്കും. ആഗസ്റ്റ് 7 മുതല് 10 വരെ കൂത്തമ്പലത്തില് വൈകീട്ട് 3 മണി മുതല് ബി.എ വിദ്യാര്ത്ഥികള്ക്ക് നാട്യശാസ്ത്രവും ഭാരതീയ രംഗകലകളും എന്ന വിഷയത്തില് ക്ലാസ് ഉണ്ടായിരിക്കും. കലാമണ്ഡലം റാം മോഹന്, ഡോ. ശ്രീറാം, ഡോ.എന്.കെ. ഗീത, ഡോ.സി.എം.നീലകണ്ഠന് എന്നിവര് ക്ലാസ്സ് നയിക്കും.
ആഗസ്റ്റ് 11 ന് നടക്കുന്ന ചടങ്ങില് കാലടി ശ്രീ ശങ്കരാചാര്യ സംസ്കൃത സര്വ്വകലാശാലയിലെ ന്യായവിഭാഗം മുന് ഡീനും പ്രൊഫസറുമായ ഡോ. ആര്യാദേവിയെ കേരള കലാമണ്ഡലം രജിസ്ട്രാര് ഡോ. കെ.കെ.സുന്ദരേശന് ആദരിക്കും. കലാമണ്ഡലം ഭരണസമിതിയംഗം ഡോ.എന്.ആര്. ഗ്രാമപ്രകാശ് അധ്യക്ഷത വഹിക്കുന്ന ചടങ്ങില് ഡോ. കേശവന് വെളുത്താട്ട് മുഖ്യപ്രഭാഷണം നടത്തും. കലാമണ്ഡലം ഭരണസമിതിയംഗം ടി.കെ.വാസു ഉപഹാര സമര്പ്പണവും വള്ളത്തോള് വാസന്തി മേനോന് ആശംസയും നേരും. വൈകീട്ട് ആറു മുതല് തൃത്താല ശ്രീനി യുടെ അഷ്ടപദി അരങ്ങേറും. തുടര്ന്ന് സംസ്കൃത സിനിമയായ ഇഷ്ടിയുടെ പ്രദര്ശനവും ഉണ്ടാകും.
പ്രതികരിക്കാൻ ഇവിടെ എഴുതുക: