തിരുവനന്തപുരം: കൗമാരക്കാരെ ആത്മഹത്യയിലേക്ക് നയിക്കുന്ന മാരക ഗെയിമായ ബ്ലൂ വെയിലിനെതിരെ (നീലത്തിമിംഗലം) ജാഗ്രതാ നിര്ദേശവുമായി തിരുവനന്തപുരം മെഡിക്കല് കോളേജിലെ മാനസികാരോഗ്യ വിഭാഗം.
ലോകത്തെമ്പാടുമായി നൂറോളം കുട്ടികളെ ആത്മഹത്യയിലേക്ക് നയിച്ചെന്ന് കരുതപ്പെടുന്ന ഈ ഗെയിമിനെതിരെ സംസ്ഥാന സര്ക്കാരും കര്ശനമായ നിലപാടാണെടുത്തത്. മനുഷ്യന്റെ ബുദ്ധിയെ തകിടം മറിച്ച് സമനില തെറ്റിക്കുന്ന ഇത്തരം ഗെയിമുകള്ക്കെതിരെ രക്ഷിതാക്കളും അധ്യാപകരും ബന്ധുക്കളും സുഹൃത്തുക്കളുമെല്ലാം അതീവ ജാഗ്രത പാലിക്കേണ്ടതുണ്ട്.
കൗമാര ജീവിതത്തെ ഏറെ പ്രതിസന്ധിയിലാക്കുന്നതാണ് ബ്ലൂ വെയില് ഗെയിം. ഒരിക്കല് അകപ്പെട്ടു കഴിഞ്ഞാല് പെട്ടതു തന്നെ. തിരിച്ചുവരാന് ശ്രമിച്ചാല് ഭീഷണിയാകും ഫലം. ഇതെല്ലാം രക്ഷിതാക്കളറിയുമെന്ന ഭീതി മൂലമാണ് ഗെയിം തുടരുന്നതും അവര് ആത്മഹത്യാ വെല്ലുവിളി ഏറ്റെടുക്കുന്നതും. തലച്ചോറില് ഡോപമിന് എന്ന രാസപദാര്ഥമാണ് സന്തോഷമുണ്ടാക്കുന്നത്.
സന്തോഷമുണ്ടാക്കുന്ന എന്തുകാര്യം ചെയ്താലും ഡോപമിന്റെ അളവു കൂടും. ഈയൊരു സന്തോഷമാണ് ഇത്തരം കളികളിലൂടെ ഉണ്ടാക്കുന്നതും. കുട്ടികളിലുണ്ടാകുന്ന ചെറിയ പ്രശ്നങ്ങള് പോലും രക്ഷിതാക്കള് അറിയണം. രക്ഷിതാക്കളെ പേടിച്ച് കുട്ടികള് ഒന്നും പറയാത്ത അവസ്ഥ സൃഷ്ടിക്കരുത്. എല്ലാത്തിനും പരിഹാരമുണ്ടെന്ന രീതിയില് കുട്ടിയെ ആശ്വസിപ്പിക്കുകയും സംരക്ഷണം നല്കുകയും വേണം.
കുട്ടികളുടെ പെരുമാറ്റത്തില് ഇത്തരം അസ്വാഭാവികതകള് കണ്ടാല് ഉടന് തന്നെ മാനസികാരോഗ്യ വിദഗ്ധന്റെ സേവനം തേടേണ്ടതാണെന്ന് പ്രമുഖ മാനസികാരോഗ്യ വിദഗ്ധനും തിരുവനന്തപുരം മെഡിക്കല് കോളേജ് ആര്എംഒയുമായ ഡോ. മോഹന് റോയ് പറഞ്ഞു.
പ്രതികരിക്കാൻ ഇവിടെ എഴുതുക: