കണ്ണൂര്: ലോകാരോഗ്യ സംഘടനയുടെയും കണ്ണൂര് മലബാര് കാന്സര് കെയര് സൊസറ്റിയുടെയും സംയുക്താഭിമുഖ്യത്തില് കണ്ണൂര് ജില്ലയിലെ എടക്കാട് ബ്ലോക്ക് പഞ്ചായത്തിലെ അഞ്ച് പഞ്ചായത്തുകളിലും കോഴിക്കോട് കോര്പ്പറേഷനിലും കഴിഞ്ഞവര്ഷം തുടക്കം കുറിച്ച സമഗ്ര സ്തനാര്ബുദ നിയന്ത്രണ പദ്ധതി-ബ്രസ്റ്റ് കാന്സര് ബ്രിഗേഡ്- കണ്ണൂര്, കോഴിക്കോട് ജില്ലകളിലെ 25 പഞ്ചായത്തുകളില്ക്കൂടി വ്യാപിപ്പിക്കുന്നു. കഴിഞ്ഞ ഒരു പതിറ്റാണ്ടായി കേരളത്തില് സ്തനാര്ബുദം ആശങ്കാജനകമായി വര്ദ്ധിച്ചുവരികയാണ്. ആധുനിക ചികിത്സാ മാര്ഗ്ഗങ്ങള് പ്രയോജനപ്പെടുത്തി സ്തനാര്ബുദം പൂര്ണമായി ചികിത്സിച്ച് ഭേദമാക്കാമെങ്കിലും സ്തനാര്ബുദ മരണങ്ങളും വര്ധിക്കുന്നതായാണ് ചികിത്സാകേന്ദ്രങ്ങളിലെ കണക്കുകള് സൂചിപ്പിക്കുന്നത്. സ്തനാര്ബുദ നിരക്ക് കുറക്കുവാന് ജനപങ്കാളിത്തത്തോടെയുള്ള പ്രതിരോധ പ്രവര്ത്തനങ്ങളും അനിവാര്യമാണ്. സ്തനാര്ബുദ നിയന്ത്രണ പദ്ധതി ഓരോ പഞ്ചായത്തുകളിലും നാല് ഘട്ടങ്ങളിലായാണ് നടപ്പിലാക്കുന്നത്. ആദ്യഘട്ടം എന്എസ്എസ് വളണ്ടിയര്മാര്, കുടുംബശ്രീ പ്രവര്ത്തകര്, അംഗനവാടി ടീച്ചര്മാര്, ആശാവര്ക്കര്മാര് എന്നിവരില് നിന്നും തെരഞ്ഞെടുക്കുന്ന പ്രധാന പരിശീലകര്ക്കുള്ള പരിശീലനം, രണ്ടാം ഘട്ടം പരിശീസനം നേടിയ പ്രധാന പരിശീലകര് വീടുകള് തോറും കയറിയും കുടുംബശ്രീ തുടങ്ങിയ ശാക്തീകരണ ഗ്രൂപ്പുകളിലും എല്ലാം പങ്കെടുത്ത് ബോധവല്ക്കരണ പ്രവര്ത്തനങ്ങള് നടത്തുന്നു. മൂന്നാം ഘട്ടത്തില് രോഗസാധ്യതാ ലക്ഷണങ്ങള് കണ്ടെത്തുന്നവര്ക്ക് വിദഗ്ധ ഡോക്ടറുടെ പരിശോധനയും തുടര് പരിശോധന ആവശ്യമുള്ളവര്ക്കായി മാമോഗ്രാം, അള്ട്രാസൗണ്ട് സ്കാന് തുടങ്ങിയ ആധുനിക പരിശോധനാ സംവിധാനങ്ങള് ഉള്പ്പെടുത്തിയുള്ള സഞ്ചീവനി മൊബൈല് ടെലിമെഡിസിന് യൂണിറ്റിന്റെ സേവനം എന്നിങ്ങനെ നല്കുന്നു. പദ്ധതിയില് ഉള്പ്പെടുത്തിയ പഞ്ചായത്തുകളില് ഗ്രാമതല സൗജന്യ ക്യാമ്പുകള് സംഘടിപ്പിക്കുകയും നാലാം ഘട്ടം രോഗം സ്ഥിരീകരിക്കുന്നവര്ക്ക് വിദഗ്ധ ചികിത്സാമാര്ഗ്ഗ നിര്ദ്ദേശങ്ങളും തുടര് ചികിത്സ പുനരധിവാസ പ്രവര്ത്തനങ്ങളും ലക്ഷ്യമിടുന്ന പദ്ധതിയുടെ ഭാഗമായി കണ്ണൂര് മലബാര് കാന്സര് കെയര് സൊസൈറ്റിയില് ആഴ്ചയില് രണ്ടുദിവസം പ്രവര്ത്തിക്കുന്ന സൗജന്യ സ്തനാര്ബുദ പരിശോധന ക്ലിനിക്കുകളും ആവശ്യമുള്ളവര്ക്ക് ആര്സിസിയിലെ വിദഗ്ധ ഡോക്ടറുടെയോ പ്രസിദ്ധ കാന്സര് രോഗ വിദഗ്ധന് ഡോ.വി.പി.ഗംഗാധരനുമായോ ഉള്ള വീഡിയോ ടെലികണ്സള്ട്ടേഷന് സൗകര്യവും ലഭ്യമാകും. പദ്ധതി നടപ്പിലാക്കുവാന് താല്പര്യമുള്ള പഞ്ചായത്തുകള്ക്കും സന്നദ്ധ പ്രവര്ത്തനങ്ങളില് പ്രവൃത്തിപരിചയമുള്ള സന്നദ്ധ സംഘടനകള്ക്കും കണ്ണൂര് മലബാര് കാന്സര് കെയര് സൊസൈറ്റിയുമായോ 04972705309 എന്ന നമ്പറിലോ ബന്ധപ്പെട്ട് അപേക്ഷ നല്കണം.
പ്രതികരിക്കാൻ ഇവിടെ എഴുതുക: