സ്കൂളുകള് കേന്ദ്രീകരിച്ചുള്ള മയക്കുമരുന്ന് മാഫിയക്കെതിരെ ജാഗ്രത
കണ്ണൂര്: സൈബര് ലോകത്തെ തെറ്റായ പ്രവണതകള് മനുഷ്യജീവന് തന്നെ അപകടംവിതയ്ക്കുന്ന രീതിയിലേക്ക് വഴിമാറിയ വര്ത്തമാനകാല സാഹചര്യത്തില് ഇന്റര്നെറ്റിലെ ചതിക്കുഴികള് കരുതിയിരിക്കാന് ജില്ലാ പഞ്ചായത്ത് യോഗം പ്രമേയത്തിലൂടെ ആവശ്യപ്പെട്ടു. ഇക്കാര്യത്തില് തികഞ്ഞ ജാഗ്രതയും സൂക്ഷ്മതയും പുലര്ത്താന് ഓരോരുത്തരും തയ്യാറാവണം. ചെറിയ അശ്രദ്ധ പോലും വലിയ ദുരന്തമായി മാറുന്ന അവസ്ഥയാണ് ഇന്നുള്ളത്. ഉത്തരവാദിത്തത്തോടെയുള്ള ഇന്റര്നെറ്റ് ഉപയോഗം ഉറപ്പുവരുത്താന് സമൂഹം മുന്കൈയെടുക്കണം. ഇളം തലമുറ സൈബര് ലോകത്തെ അപകടങ്ങളില് ചെന്നുചാടാതിരിക്കാന് രക്ഷിതാക്കളും സ്കൂള് അധികൃതരും നിയമപാലന സംവിധാനങ്ങളും മുന്കരുതലുകളെടുക്കണം. അവയെക്കുറിച്ച് അവബോധം സൃഷ്ടിക്കാന് ശക്തമായ ബോധവല്ക്കരണ പരിപാടികള് സംഘടിപ്പിക്കണമെന്നും പ്രസിഡന്റ് കെ.വി.സുമേഷിന്റെ അധ്യക്ഷതയില് ചേര്ന്ന ജില്ലാ പഞ്ചായത്ത് യോഗം ആവശ്യപ്പെട്ടു.
വിദ്യാലയങ്ങള് കേന്ദ്രീകരിച്ച് കുട്ടികളെ ശല്യം ചെയ്യുന്ന സാമൂഹ്യദ്രോഹികള്ക്കെതിരെ പോലിസിന്റെ സഹായത്തോടെ ശക്തമായ നടപടികള് സ്വീകരിക്കാന് യോഗം തീരുമാനിച്ചു. വിദ്യാലയങ്ങള് കേന്ദ്രീകരിച്ചുള്ള മയക്കുമരുന്ന് മാഫിയകളുടെ പ്രവര്ത്തനങ്ങള് സജീവമാണെന്നും അവരെ നിയന്ത്രിക്കുന്നതിനുള്ള സത്വര നടപടികള് ആവശ്യമാണെന്നും യോഗം വ്യക്തമാക്കി.
സ്കൂള് ഗ്രൗണ്ടുകളുടെയും മറ്റും പൂര്ണ സംരക്ഷണം ഏറ്റെടുക്കാന് തയ്യാറുള്ളവര്ക്കു മാത്രമേ സ്പോര്ട്സ് ഉള്പ്പെടെയുള്ള കലാ-കായിക-സാംസ്കാരിക പരിപാടികള്ക്കായി അവ വിട്ടുനല്കാവൂ എന്ന് ജില്ലാ പഞ്ചായത്ത് യോഗം സ്കൂള് അധികൃതര്ക്ക് നിര്ദേശം നല്കി. ക്രഷറുകള്ക്കും ക്വാറികള്ക്കുമുള്ള നിയന്ത്രണം കാരണം ജില്ലയിലെ നിര്മാണ മേഖല സ്തംഭനാവസ്ഥയിലാണെന്നും ജില്ലയിലെ പദ്ധതികള്ക്ക് അയല്ജില്ലകളില് നിന്ന് സാധനങ്ങള് എത്തിക്കേണ്ട അവസ്ഥയാണെന്നും അംഗങ്ങള് ചൂണ്ടിക്കാട്ടി. ഇക്കാര്യം ജില്ലാ ഭരണകൂടത്തിന്റെ സത്വര ശ്രദ്ധയില്പ്പെടുത്താന് യോഗം തീരുമാനിച്ചു.
ജൈവകൃഷി പ്രോല്സാഹിപ്പിക്കുന്നതിന്റെ ഭാഗമായി ജൈവ ഉല്പ്പന്നങ്ങളുടെ വിപണനത്തിന് വേദിയൊരുക്കുകയെന്ന ലക്ഷ്യത്തോടെ ജില്ലാ തല ജൈവ കര്ഷക സൊസൈറ്റി രൂപീകരിക്കാന് കൃഷി വകുപ്പ് ഡെപ്യൂട്ടി ഡയരക്ടറെ യോഗം ചുമതലപ്പെടുത്തി. ജി.എസ്.ടിയുടെ മറവില് ജില്ലയിലെ പല ഹോട്ടലുകളും പകല്ക്കൊള്ളയാണ് നടത്തുന്നതെന്നും ഇരട്ടിയിലേറെ വിലയാണ് ചിലര് ഈടാക്കുന്നതെന്നും അംഗങ്ങള് ചൂണ്ടിക്കാട്ടി. ഇക്കാര്യം ബന്ധപ്പെട്ടവരുടെ ശ്രദ്ധയില്പ്പെടുത്താനും തീരുമാനമായി.
ജില്ലാ പഞ്ചായത്ത് മിനികോണ്ഫറന്സ് ഹാളില് നടന്ന യോഗത്തില് വൈസ് പ്രസിഡന്റ് പി.പി.ദിവ്യ, സ്റ്റാന്റിംഗ് കമ്മറ്റി ചെയര്മാന്മാരായ കെ.പി.ജയബാലന്, വി.കെ.സുരേഷ്ബാബു, ടി.ടി.റംല, കെ.ശോഭ തുടങ്ങിയവര് സംസാരിച്ചു.
പ്രതികരിക്കാൻ ഇവിടെ എഴുതുക: