കോട്ടയം: കുമരകത്തുള്ള സ്വകാര്യ റിസോര്ട്ടിലെ നീന്തല്ക്കുളത്തില് നാല് വയസ്സുളള സൗദി ബാലന് മുങ്ങി മരിച്ചു. ഏഴംഗ സംഘത്തിനൊപ്പം എത്തിയ ഹമാദ്ദീന് അലാദീന് ഇബ്രാഹീം ആണ് മരിച്ചത്. വ്യാഴാഴ്ച രാത്രി എട്ട് മണിയോടെയായിരുന്നു സംഭവം. കുട്ടിയുടെ മരണത്തിന് ഉത്തരവാദികള് റിസോര്ട്ട് അധികൃതരാണെന്ന് കുടുംബം ആരോപിച്ചു.
കുട്ടികള്ക്കുള്ള നീന്തല്ക്കുളത്തില് ഇറങ്ങിയപ്പോള് ഷോക്കടിക്കുകയായിരുന്നുവെന്നാണ് കുടുംബത്തിന്റെ ആരോപണം. നീന്തല്ക്കുളത്തോട് ചേര്ന്ന് വൈദ്യുതി കടത്തി വിടുന്ന കേബിളില് നിന്നാണ് ഷോക്കേറ്റതെന്നും സുരക്ഷ ഇല്ലായിരുന്നുവെന്നും പിതാവ് ഇബ്രാഹീം കുറ്റപ്പെടുത്തി. രക്ഷിക്കാന് ശ്രമിച്ചവര്ക്കും ഷോക്കറ്റതായും പറയപ്പെടുന്നു. അതേസമയം പ്രാഥമിക പോസ്റ്റ് മോര്ട്ടം റിപ്പോര്ട്ടില് മുങ്ങി മരണമാണെന്നാണ് സൂചനയെന്ന് കുമരകം പോലീസ് പറഞ്ഞു.
വിശദമായ പരിശോധനയ്ക്ക് ഫോറന്സിക് പരിശോധനയ്ക്ക് അയച്ചിട്ടുണ്ടെന്നും പോലീസ് വ്യക്തമാക്കി. കോട്ടയം മെഡിക്കല് കോളേജില് മൃതദേഹം പോസ്റ്റ്മോര്ട്ടം നടത്തിയതിന് ശേഷം ബന്ധുക്കള്ക്ക് വിട്ട് കൊടുത്തു. കുമരകം പോലീസ് അസ്വഭാവിക മരണത്തിന് കേസെടുത്തു.
പ്രതികരിക്കാൻ ഇവിടെ എഴുതുക: