കണ്ണൂര്: ഐതിഹാസികമായ ക്വിറ്റിന്ത്യാ സമരത്തിന്റെ 75-ാം വാര്ഷികത്തോടനുബന്ധിച്ച് ദേശീയ തലത്തില് നടന്ന സങ്കല്പ് പര്വ് പരിപാടിയുടെ ഭാഗമായി നവഭാരത സൃഷ്ടിക്കായി പ്രതിജ്ഞയെടുത്തു. നവഭാരതം കെട്ടിപ്പടുക്കുമെന്ന പ്രതിജ്ഞ ജില്ലാ കലക്ടര് മീര് മുഹമ്മദലി ചൊല്ലിക്കൊടുത്തു.
ക്വിറ്റിന്ത്യാ സമരപ്രഖ്യാപനത്തോടെ ദേശീയനേതൃത്വത്തെ മുഴുവന് ബ്രിട്ടീഷ് പോലിസ് അറസ്റ്റ് ചെയ്ത് ജയിലിലടച്ചെങ്കിലും രാജ്യത്തെ ജനത ആ സമരം ഏറ്റെടുത്ത് വിജയിപ്പിക്കുകയായിരുന്നുവെന്ന് ഇതുമായി ബന്ധപ്പെട്ട് പ്രധാനമന്ത്രി നല്കിയ സന്ദേശം ഉദ്ധരിച്ച് ജില്ലാ കലക്ടര് പറഞ്ഞു. അതുപോലെ നവഭാരത സൃഷ്ടിക്കായി ആരെയും കാത്തുനില്ക്കാതെ രാജ്യത്തിലെ ഓരോ പൗരനും മുന്നിട്ടിറങ്ങണമെന്നാണ് ക്വിറ്റിന്ത്യാ സമരത്തിന്റെ ഓര്മ നല്കുന്ന സന്ദേശമെന്നും അദ്ദേഹം അഭിപ്രായപ്പെട്ടു. ജില്ലാ പഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷത വഹിച്ചു.
കലക്ടറേറ്റ് ഓഡിറ്റോറിയത്തില് നടന്ന ചടങ്ങില് ജില്ലാ പഞ്ചായത്ത് വൈസ് പ്രസിഡന്റ് പി.പി.ദിവ്യ, സ്റ്റാന്റിംഗ് കമ്മിറ്റി ചെയര്മാന്മാരായ കെ.പി.ജയബാലന് മാസ്റ്റര്, വി.കെ.സുരേഷ് ബാബു, ഡിഎംഒ കെ.നാരായണ നായിക്, ജില്ലാ പ്ലാനിംഗ് ഓഫീസര് കെ. പ്രകാശന് എന്നിവര് സംസാരിച്ചു. നവകേരളം മിഷന് പദ്ധതികളുടെ തുടര് പ്രവര്ത്തനങ്ങളെക്കുറിച്ച് ഡോ. കെ.വി.ലതീഷ് (ആര്ദ്രം), ഇന്ദിര.എ.ജി (ലൈഫ്), ഇ.കെ.സോമന് (ഹരിതകേരളം) എന്നിവര് വിശദീകരിച്ചു. ജില്ലയിലെ തദ്ദേശ സ്ഥാപന പ്രതിനിധികള് യോഗത്തില് സംബന്ധിച്ചു.
പ്രതികരിക്കാൻ ഇവിടെ എഴുതുക: