ഹൈദരാബാദ്: ഹൃദയസ്തംഭനത്തെ തുടര്ന്ന് ആറാം ക്ളാസുകാരന് മരിച്ചു. നാദേര്ഗുല് ദല്ഹി പബ്ളിക് സ്കൂളിലെ വിദ്യാര്ത്ഥിയായ ആദര്ശാണ് മരിച്ചത്. സ്കൂളിലെ പടിക്കെട്ടുകള് ഇറങ്ങി വരുമ്പോള് പെട്ടെന്ന് ബോധം നഷ്ടപ്പെട്ട് വീഴുകയായിരുന്നു ആദര്ശ്. ഉടന് തന്നെ ആശുപത്രിയില് എത്തിച്ച കുട്ടിയെ വിശദമായി പരിശോധിച്ച ഡോക്ടര്മാര് ഹൃദയസ്തംഭനം സംഭവിച്ചതാണെന്ന് കണ്ടെത്തുകയായിരുന്നു. തുടര്ന്ന് ചികിത്സയിലായിരുന്ന ആദര്ശ് ശനിയാഴ്ച മരിക്കുകയായിരുന്നു.
നന്നായി പാടുമായിരുന്ന ആദര്ശ്, സ്കൂളില് നടന്ന ഇന്റര് സ്കൂള് മത്സരത്തില് പങ്കെടുത്ത് മൂന്നാം സ്ഥാനവും നേടിയിരുന്നു. മത്സര ശേഷം മറന്നു വച്ച ബാഗ് തിരികെ എടുക്കാനായി പോകുമ്പോഴായിരുന്നു അപകടം. എന്നാല് മകന്റെ മരണത്തില് സംശയം പ്രകടിപ്പിച്ച് ആദര്ശിന്റെ അച്ഛന് പൊലീസില് പരാതി നല്കി. ഇദ്ദേഹത്തിന്റെ പരാതിയുടെ അടിസ്ഥാനത്തില് കേസ് രജിസ്റ്റര് ചെയ്തതായി അദിഭട്ടാല പൊലീസ് പറഞ്ഞു. ആദര്ശിന്റെ കണ്ണുകള് ദാനം ചെയ്യാനാണ് മാതാപിതാക്കളുടെ തീരുമാനം.
പ്രതികരിക്കാൻ ഇവിടെ എഴുതുക: