ചാത്തന്നൂര്: ചാത്തന്നൂര്-പരവൂര് റോഡില് മീനാട് മൂര്ത്തിക്കാവ് ക്ഷേത്രത്തിനു സമീപം നിയന്ത്രണം വിട്ട കാര് റോഡരികില്കിടന്നിരുന്ന പാറയില് ഇടിച്ച് കയറി ആറുപേര്ക്ക് പരിക്ക്.
ഗുരുതരമായി പരിക്കേറ്റ നെടുങ്ങോലം പ്രസന്ന തീയറ്റര് ജംഗ്ഷനു സമീപം താമസിക്കുന്ന വിഷ്ണു(25)വിനെ തിരുവനന്തപുരത്തെ സ്വകാര്യ ആശുപത്രിയില് പ്രവേശിപ്പിച്ചു. കാറിലുണ്ടായിരുന്ന നെടുങ്ങോലം സ്വദേശികളായ അഖില് (25), നിഖില് (22) എന്നിവരെ കൊട്ടിയത്തെ സ്വകാര്യ ആശുപത്രിയില് പ്രവേശിപ്പിച്ചു. മറ്റു മൂന്നുപേര് നിസാരപരിക്കുകളോടെ രക്ഷപെട്ടു. ഇന്നലെ വൈകിട്ട് നാലോടെയാണ് അപകടം. ചാത്തന്നൂരില് നിന്നും അമിതവേഗതയിലായിരുന്ന കാര് റോഡരികില് കിടന്നിരുന്ന പാറകളിലേക്ക് ഇടിച്ചുകയറുകയും പത്തടിയോളം ഉയരത്തില് തെറിച്ച കാര് വൈദ്യുതിപോസ്റ്റ് ഇടിച്ചുതകര്ത്ത ശേഷം തലകീഴായി റോഡില് വന്നു വീഴുകയായിരുന്നു.
വന്ശബ്ദം കേട്ട് ഓടിക്കൂടിയ നാട്ടുകാര് കാര് മറിച്ചിട്ട് ആറുപേരെയും പുറത്തെടുക്കുകയായിരുന്നു. ഇടിയുടെ ആഘാതത്തില് കാര് പൂര്ണമായും തകര്ന്നു. അപകടത്തില് പരിക്കേറ്റവരെ നാട്ടുകാര് കൊട്ടിയത്തെ സ്വകാര്യ ആശുപത്രിയിലും അവിടെ നിന്നും ഗുരുതര പരിക്കേറ്റ വിഷ്ണുവിനെ തിരുവനന്തപുരത്തെ സ്വകാര്യ ആശുപത്രിയിലേക്കും മാറ്റുകയായിരുന്നു. ചാത്തന്നൂര് പോലീസ് കേസെടുത്തു.
പ്രതികരിക്കാൻ ഇവിടെ എഴുതുക: