പയ്യന്നൂര്: കഴിഞ്ഞദിവസം റെയില്വേ ട്രാക്കില് മരിച്ച നിലയില് കണ്ടെത്തിയ കൊയിപ്രയിലെ കെ.സി.ശ്രീധരന്റെ മരണം കൊലപാതകമാണെന്ന സംശയമുയര്ന്നതോടെ പോലീസ് കൊലപാതകത്തിന് കേസെടുത്തു. പോസ്റ്റുമോര്ട്ടം നടത്തിയ പരിയാരം മെഡിക്കല് കോളേജിലെ ഫോറന്സിക് സര്ജന് മരണം കൊലപാതകമാണെന്ന സംശയം പ്രകടിപ്പിച്ചിരുന്നു. 25 ന് പുലര്ച്ചെയാണ് ശ്രീധരനെ റെയില്വേ ട്രാക്കില് മരിച്ച നിലയില് കണ്ടെത്തിയത്. തുടക്കത്തില് ആത്മഹത്യയാണെന്ന നിലയിലായിരുന്നു അന്വേഷണം പുരോഗമിച്ചിരുന്നത്. പോലീസ് ബന്ധുക്കളുടെ മൊഴിയെടുത്തിരുന്നുവെങ്കിലും കൊലപാതകമാണെന്ന് അവരും സംശയം പ്രകടിപ്പിച്ചിരുന്നില്ല. മരണകാരണം തലക്കേറ്റ അടിയാണെന്ന പോസ്റ്റുമോര്ട്ടം റിപ്പോര്ട്ട് പുറത്തുവന്നതോടെയാണ് പോലീസ് കൊലപാതകത്തിന് കേസെടുത്തത്. സംഭവദിവസം വൈകുന്നേരം മൂന്നാം ട്രാക്കിലൂടെ ട്രെയിന് കടന്നുപോയിട്ടില്ലെന്ന് സ്റ്റേഷന് മാസ്റ്ററും മൊഴി നല്കിയിരുന്നു. മരണപ്പെട്ട ശ്രീധരന് ശത്രുക്കള് ആരെങ്കിലും ഉള്ളതായി വിവരം ലഭിച്ചിട്ടില്ല.
പ്രതികരിക്കാൻ ഇവിടെ എഴുതുക: